Білімді ұрпақ – ел ертеңі. Қазіргі заман жастары терең білім – жарқын болашақтың кепілі екенін ерте түсінгендей. Олардың оқуға, білуге деген құштарлығына қарап, сүйсінесің. Сондай жас ізденушілердің бір шоғыры жуырда Байқоңыр қаласында өткен ІХ халықаралық «Ғылым әлемін ашамыз» атты ғылыми жобалар жарысынан үлкен жетістікпен оралды.

В. Челомея атындағы халықаралық космос мектебінің базасында өткен айтулы додаға облысымыздан 16 оқушы қатысты. Соның тоғызы жақсы нәтижеге қол жеткізіп, екі алтын, жеті күміс медальды жеңіп алды. Қос алтын жүлдені еншілегендер – Тараз қаласындағы №8 гимназиямен №31 орта мектептің оқушылары. Облыстық «Дарын» мектеп-интернатының үш шәкірті, қаладағы №21 және № 31, Қордай ауданындағы №4 орта мектептің оқушылары екінші орыннан көрінді.
Жалпы, ғылыми жоба жарыстарының артықшылығы – жарысқа қатысушылар мен жүлдегерлердің ұлттық бірыңғай тестілеуден босатылатындығында. Ал, жеңімпаздарға оқу гранттары табыс етіледі. Былтыр отыз алты жамбылдық жас дарын халықаралық додалар мен олимпиадаларда жүлдегер атанып, осындай мүмкіндіктерге ие болған-ды.

Камила Борашова,
журналист.