اق جول جامبىل وبلىستىق قوعامدىق- ساياسي گازەت
اۋداندا ءار اپتانىڭ جۇما جانە سەنبى كۇندەرى كورىكتەندىرۋ، كوگەرىشتەندىرۋ جانە سانيتارلىق تازالىق كۇنى بولىپ جاريالانعالى ۇلكەن مەن كىشى قولىنا كۇرەگى مەن سىپىرعىشىن الىپ، كوشەگە شىعۋدى ادەتكە اينالدىرعان. وتكەن سەنبىدە بايزاق اۋدانىمەن شەكتەسەتىن شەكارادان باستاپ «الماتى-تاشكەنت» تاس جولىنىڭ بويىنداعى تال-داراقتى اكتەۋ جۇمىسى قولعا الىندى. جول بويىن قوقىستان تازارتۋ مەن اباتتاندىرۋعا 37 مەكەمە قىزمەتشىلەرى قاتىستى. جەتى شاقىرىم بولاتىن جولدىڭ ەكى جاعىنداعى اعاش تۇپتەرى تۇگەل اكتەلدى.
ءدال وسى كۇنى بارلىق ەلدى مەكەندەردە جۇرت جاپپاي سەنبىلىككە شىعىپ، كوشەلەردى، اۋلالار مەن گۇلزارلاردى، ەسكەرتكىش توڭىرەگىن، ساياباقتاردى كۇل-قوقىستان تازارتتى. 100 توننادان اسا قالدىق شىعارىلدى.
ال، جارلىسۋ اۋىلىندا جاڭا ساياباقتىڭ نەگىزى قالاندى. ءشىناسىلوۆ اتىنداعى ورتا مەكتەپتىڭ ديرەكتورىمەن حابارلاسقانىمىزدا:
– اعايىندى سايرامباي جانە مەيرامباي دونەنباەۆتار دەمەۋشىلىك جاساپ، اشارشىلىق قۇرباندارى مەن قۋعىن-سۇرگىنگە ۇشىراعاندارعا، مايدانگەرلەرگە ارنالعان ەسكەرتكىش-مونۋمەنت پەن اۋماعى 1،8 گەكتار جەردى الىپ جاتقان ساياباقتى قورشاپ، وعان ءار ءتۇرلى ساندىك اعاشتارىن وتىرعىزۋ ماقساتىنا 50 ميلليوننان اسا تەڭگە قاراجات ءبولدى. مەكتەپ پەن ينتەرنات ارالىعىنداعى وسىناۋ ساياباق پەن «تۇلەكتەر اللەياسىن» جاساۋعا ەكى جۇزگە تارتا مەكتەپ وقۋشىلارى مەن مۇعالىمدەر، اۋىل ازاماتتارى جۇمىلدى، – دەدى ول.
مونۋمەنتتىڭ جوباسى جاسالىپ، ءۇش بايتەرەككە شانشىلعان شاڭىراق سۇلبالى بەلگى قازىر ساۋلەتشىلەردىڭ قولىنان وتۋدە. كەلەشەكتە ول دا شاعىن عانا اۋىلدىڭ رەڭىن اشىپ، وتكەن كۇندەردەن بەلگى بار ەكەنىن بارشا جۇرتقا ەسكەرتىپ تۇراتىنىنا كۇمان جوق. ال، جار جاعالاي ەگىلگەن 600 ءتۇپ بايتەرەك پەن 130 ءتۇپ ارشا، 150 ءتۇپ ەمەن اعاشى ءبىر كەزدە جارلىسۋلىقتاردىڭ ءجيى كەلەتىن دەمالىس ورنىنا اينالارى ءسوزسىز.
سەيسەن قوجەكە،
«اق جول».
ت. رىسقۇلوۆ اۋدانى.