بيلىكتىڭ بيىك بەينەسى

وبلىس اكىمى كارىم كوكىرەكباەۆتىڭ
23 ماۋسىم – مەملەكەتتىك قىزمەتشى كۇنىمەن قۇتتىقتاۋى

قۇرمەتتى مەملەكەتتىك قىزمەتشىلەر!
قادىرمەندى ارىپتەستەر!
ءاربىر وركەنيەتتىڭ ورىنە قادام باستاعان مەملەكەتتىڭ ەڭ باستى تىرەگى، ونىڭ يدەياسى مەن ساياساتىن العا اپارۋشى مەملەكەتتىك قىزمەتكەر ەكەنى بەلگىلى.سوندىقتان دا، ۇلت مارتەبەسىن كوتەرەتىن، ەل ابىرويىن اسقاقتاتاتىن مەملەكەتتىك قىزمەتكەر بولۋ – مارتەبەلى مىندەت. ويتكەنى، مەملەكەتتىك قىزمەتشى – بيلىكتىڭ بيىك بەينەسىن، ىسكەرلىك قابىلەتىن كورسەتەدى.
بارشاعا بەلگىلى، بىرىككەن ۇلتتار ۇيىمىنىڭ باس اسسامبلەياسى 2003 جىلى ءار جىلدىڭ 23 ماۋسىمىن مەملەكەتتىك قىزمەتشىلەر كۇنى دەپ اتاپ ءوتۋ جونىندە ۇيعارىم جاساعان بولاتىن. بۇل شارانىڭ – حالىقارالىق ارەنادا مەملەكەتتىك قىزمەت پەن مەملەكەتتىك قىزمەتشىنىڭ ستاتۋسىن كوتەرۋگە وڭ ىقپال ەتكەنى اقيقات. وسىعان وراي ەلباسى نۇرسۇلتان ءابىش ۇلى نازارباەۆ وتكەن جىلى 23 ماۋسىمدى مەملەكەتتىك قىزمەتشى كۇنى دەپ جاريالاپ، ارنايى جارلىققا قول قويدى. بۇگىن وسى مەملەكەتتىك قىزمەتشى كۇنى كاسىبي مەرەكەسىن تۇڭعىش رەت رەسمي تۇردە اتاپ وتكەلى وتىرمىز.
مەملەكەتتىك قۇرىلىمدار مەن مەملەكەتتىك قىزمەتشى – حالىق پەن قوعام اراسىن جالعاستىرىپ وتىرعان التىن كوپىر. ال، ساپالى مەملەكەتتىك قىزمەت كورسەتۋ – ءاربىر مەملەكەتتىك قىزمەتشىنىڭ پارىزى. ويتكەنى، ول ءوزى بەرگەن انتىنا ادالدىق كورسەتىپ، مەملەكەتتىك قىزمەتشىنىڭ ار-نامىس كودەكسى مەن ەتيكاسىنىڭ ەتالونى بولۋى كەرەك.
بۇگىندە وبلىستا باسقارۋدىڭ «ا» كورپۋسى بويىنشا 16، ال، اتقارۋشى «ب» كورپۋسىندا 5157 قىزمەتشى مەملەكەتتىك ورگانداردا تابىستى ەڭبەك ەتۋدە. قازىرگى تاڭدا وبلىسىمىزدا مەملەكەتتىك قىزمەتتە ناتيجەلى جۇمىس اتقارىپ، جاڭادان كەلگەن مەملەكەتتىك قىزمەتشىلەرگە ۇلگى كورسەتەتىن تاجىريبەلى ارىپتەستەرىمىز بارشىلىق. ەل يگىلىگى ءۇشىن ايانباي قىزمەت ەتىپ، كوپشىلىكتىڭ العىسىنا بولەنىپ، مەملەكەتتىك ناگرادالارعا قول جەتكىزىپ جاتقان قىزمەتشىلەر سانى جىل ساناپ ارتۋدا. بۇل سان جىلعى ادال ەڭبەكتىڭ ءادىل باعاسى.
قۇرمەتتى ارىپتەستەر!
حالقىمىزدا «بيلىگى مىقتى ەلدىڭ – تىرلىگى قۇتتى بولادى» دەگەن دانا ءسوز بار. سوندىقتان دا، قاشان دا جۇگى اۋىر بيلىك مىندەتىنىڭ اۋقىمدى جانە ماقساتىنىڭ بيىك بولارى بارلىق مەملەكەتتىك قىزمەتشىلەردىڭ ارقاشان جادىندا بولۋى كەرەك. بۇگىنگى تاڭداعى مەملەكەتتىك قىزمەتشىنىڭ باستى مىندەتى – تۋعان وتانى مەن حالقىنا ادال قىزمەت ەتۋىمەن باعالانادى.
بارشا كوپشىلىكتى مەملەكەتتىك قىزمەتشى كۇنى كاسىبي مەرەكەسىمەن شىن جۇرەكتەن قۇتتىقتايمىن! «باستى مىندەت – ەلگە قىزمەت!» دەگەن مازمۇنى تەرەڭ، مىندەتى جاۋاپتى ءسوزدى ەسكە سالا وتىرىپ، ارىپتەستەرىمىزدىڭ مەملەكەتتىك قىزمەتشى دەگەن ابىرويلى اتاققا ۇنەمى لايىقتى بولۋلارىنا تىلەكتەسپىن.