وڭىرىمىزدەگى جۇمىس ساپارىن پارلامەنت ءماجىلىسىنىڭ دەپۋتاتتارى، حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى قۇدايبەرگەن ەرجان، بەكبولات تىلەۋحان تاراز قالاسىنداعى «ماڭگىلىك ەل» مونۋمەنتىنە گۇل شوقتارىن قويۋدان باستادى. بۇدان كەيىن «تاراز–ارەنا» سپورت كەشەنىنە بارىپ، ونداعى جۇمىس بارىسىمەن تانىستى.
وبلىس اكىمدىگى دەنە شىنىقتىرۋ جانە سپورت باسقارماسى باسشىسىنىڭ ورىنباسارى نۇرجان جولداسبەكوۆ بۇل كەشەندە «ايشا ءبيبى» كلۋبىنىڭ سپورتشىلارى جاتتىعاتىنىن مالىمدەپ، بۇگىندە سۋ دوبىنان جامبىلدىق قىزدار قۇراماسى حالىقارالىق دەڭگەيدە جوعارى جەتىستىكتەرگە قول جەتكىزگەنىن ايتىپ ءوتتى. سونداي-اق، وسىندا جاتتىعۋ جيىندارىن وتكىزەتىن ۆولەيبولشىلاردىڭ (ەرلەر قۇراماسى) 2014 جىلى ەل چەمپيونى بولعانىن ءسوز ەتتى. جالپى، «تاراز–ارەنانىڭ» 12 زالىندا 18 سپورت ءتۇرى بويىنشا تاۋلىگىنە 1320 ادام جاتتىعادى ەكەن.
ءماجىلىس دەپۋتاتى ۆولەيبول، فۋتبول سپورتىنا، جالپى جاتتىعۋ زالدارىن، باسسەيندى ارالاپ كورىپ، سپورتشىلارعا جاسالعان مۇمكىندىككە كوڭىلى تولدى. «جامبىلدىقتار ەلباسىنىڭ قولداۋىن ايقىن سەزىنىپ وتىر. سەبەبى، بۇل – ەلىمىزدەگى ەڭ ءىرى سپورت نىسانىنىڭ ءبىرى. مۇندا تاۋلىگىنە 1300 ادام جاتتىعادى. وسىنىڭ ءوزى – ۇلكەن جەتىستىك. بارلىعى سپورتتا ءىرى جەتىستىككە جەتپەسە دە، دەنساۋلىعى مىقتى، سەرگەك، شىمىر بەلسەندى ازاماتتار بولىپ قالىپتاساتىنى انىق»، – دەدى قۇدايبەرگەن تولەپ ۇلى.
نەگىزى «تاراز–ارەنا» سپورت كەشەنىنىڭ اشىلۋى قالا تۇرعىندارىنىڭ سپورتقا بەت بۇرۋىنا ىقپال ەتكەنى انىق. سونىڭ ارقاسىندا سالاماتتى ءومىر سالتىن ۇستانىپ، دەنە شىنىقتىرۋمەن اينالىساتىندار كوبەيدى. تاراز قالاسى اكىمىنىڭ ورىنباسارى كەنجەبەك ولجابايدىڭ ايتۋىنشا، ەلباسىنىڭ بۇقارالىق سپورتتى دامىتۋ جونىندەگى باستاماسىنا سايكەس بۇل كۇندە شاھارداعى تۇرعىنداردىڭ 28 پايىزى بۇقارالىق سپورتپەن شۇعىلدانادى ەكەن.
بۇدان كەيىن ءماجىلىس دەپۋتاتى قۇدايبەگەن ەرجان جەكەمەنشىك «اتلەتيك» سپورت كەشەنىن ارالاپ كوردى. سپورت كەشەنىنىڭ اتقارۋشى ديرەكتورىنىڭ كومەكشىسى ازات اعايداروۆتىڭ ايتۋىنشا، مۇندا بىرنەشە سپورت تۇرىنەن ۇلتتىق قۇرامالار جانە وبلىس كوماندالارى جاتتىعادى ەكەن. ولارعا 75 ورىندىق قوناق ءۇي، 75 ورىندىق اسحانا ساپالى قىزمەت كورسەتەدى. جالپى، 80 ادام تۇراقتى جۇمىسپەن قامتىلعان.
2014 جىلى اشىلعان كەشەننىڭ 11 زالىندا سپورتتىڭ 20 ءتۇرى بويىنشا وقۋ-جاتتىعۋ جيىندارىن وتكىزۋگە مۇمكىندىك بار. باپكەرلەرگە بولەك جاتىن ورىن كوزدەلگەن. بارلىعى تالاپقا ساي، تولىق جاعداي جاسالعان. ءماجىلىس دەپۋتاتى ق.ەرجان ۇلكەن امبەباپ سپورت زالىن، كىشى فۋتبول الاڭىن، اسحانانى، قوناق ءۇيدى، كوشەدەگى جاتتىعۋ الاڭدارىن ارالاپ كورىپ، مۇنداعى جۇمىستارعا دا وڭ باعاسىن بەردى.
– تارازدا وسىنداي زاماناۋي جەكەمەنشىك سپورت كەشەنى بارى قۋانتادى. بۇل – ءوڭىردىڭ عانا ەمەس، ەلىمىزدىڭ سپورت سالاسى ءۇشىن ۇلكەن ولجا. جاس كەزىمىزدە ۆولەيبول، باسكەتبول وينايتىنبىز، سىرت ەلدەرگە دەيىن بارعان ەدىم. ول كەزدە ءبىزدىڭ سپورتشىلاردىڭ مۇنداي ءزاۋلىم زالداردا ەركىن جاتتىعۋعا مۇمكىندىكتەرى جوق ەدى. مۇنى سالعان ناعىز وتانىن سۇيەتىن ازامات ەكەن، – دەپ ءسوزىن تۇيىندەدى قۇدايبەرگەن تولەپ ۇلى.
ءماجىلىس دەپۋتاتى وڭىرىمىزگە كەلگەن جۇمىس ساپارى بارىسىندا كوپتەگەن كاسىپورىندار مەن الەۋمەتتىك نىسانداردى ارالايدى دەپ كۇتىلۋدە. جۇمىس كەستەسى بىرنەشە كۇنگە جوسپارلانعان.
ەسەت دوسالى
جامبىل اۋدانى.