ارداگەرلەر ءاردايىم قۇرمەتكە لايىق

 جاڭا جىل قارساڭىندا تارازدىق بىرقاتار سوعىس جانە ەڭبەك ارداگەرلەرى ايرىقشا ەلەۋلى سىي-قۇرمەتكە يە بولدى. ولاردىڭ قاتارىندا ۇلى وتان سوعىسىنىڭ ارداگەرى، بايىرعى تەمىرجولشى بازارباي بۇرباەۆ تا بار. وبلىس اكىمى كارىم كوكىرەكباەۆ ونىڭ وتباسىنا ارنايى بارىپ قارت مايدانگەردى جالپىحالىقتىق مەرەكەمەن قۇتتىقتاپ، «اراي-2» شاعىن اۋدانىنان پاتەر كىلتىن تابىس ەتتى. 

سوناۋ جىلدارى بوزبالا جاسىندا ەل مەن جەردى قورعاۋ ءۇشىن قولىنا قارۋ ۇستاپ، وت پەن وق كەشىپ، سۇراپىل سوعىس مايدانىن باستان وتكەرگەن، جاسى 93-كە تولعاندا وزىنە مۇنداي سىي-قۇرمەت كورسەتىلەدى دەپ تە كۇتپەگەن قاريانىڭ قۋانىشتان ءجۇزى بال-بۇل جاينايدى.
– ەلباسىنىڭ سارابدال ساياساتى قوعام ءومىرىنىڭ بارلىق سالاسىنا قوزعاۋ سالۋمەن كەلەدى. اسىرەسە قۇرىلىس قارقىن الىپ، قالالار مەن ەلدى مەكەندەردە ساۋلەتتى عيماراتتار بوي كوتەرۋدە. مىڭداعان قازاقستاندىق باسپانالى بولدى. تەك تاراز قالاسىندا 2017 جىلى 1200 ازامات قونىس تويىن تويلادى. جاڭا جىل قارساڭىندا بىرقاتار قالا تۇرعىندارىنا پاتەرلەر بەرىلۋدە. سونىڭ ىشىندە 5 سوعىس جانە ەڭبەك ارداگەرى دە بار. سول پاتەردىڭ ءبىرى – وزىڭىزدىكى. جاڭا ۇيىڭىزگە ارنالعان جاڭا تەلەديدارىمىزدى دا الا كەلدىك. جاڭا جىلىڭىز قۇتتى بولسىن! – دەگەن كارىم ناسبەك ۇلى كەشەگى مايدانگەر – بۇگىنگى ارداگەر، ابىز قارتقا پاتەر كىلتى مەن ونىڭ قۇجاتتارىن، گۇل شوقتارى، سەبەت تولى جەمىس-جيدەك، ءتاتتى تاعامدار تۇرىندەگى جاڭا جىلدىق سىي-تارتۋىن دا قوسا ۇسىندى.
توقساننىڭ تورىنە شىققان قارت مايدانگەردى جاڭا جىلمەن قۇتتىقتاۋشىلار قاتارىندا قالا اكىمى رۇستەم داۋلەت، وبلىستىق جانە قالالىق ارداگەرلەر كەڭەستەرىنىڭ توراعالارى ەركىنبەك سولتىباەۆ، الديار ءتۇسىپوۆ قاتارلى ازاماتتار بولدى. «جاسىمدى سىيلاپ، ەڭبەگىمدى ەلەپ-ەسكەرىپ، وسىنداي قۋانىش سىيلاعان ەلباسىمىزعا، وبلىس پەن قالا باسشىلارىنا ايتار العىسىم شەكسىز» دەپ تەبىرەنە تولقي سويلەگەن قاريا: «ە، قۇدايىم وڭداسىن، قايدا بارساڭ، جول بولسىن، نە تىلەسەڭ سول بولسىن! ومىردە باقىتتى بولىڭدار، وسىڭدەر، ونىڭدەر!» – دەپ اق باتاسىن بەردى.
بازارباي قاريا سوناۋ 1942 جىلى اسكەر قاتارىنا شاقىرىلىپ، قيىر شىعىستاعى شەكارادا جاساقتالعان 393-اتقىشتار پولكى قۇرامىندا مينومەتشى بولعان ەكەن. مانچجۋريا، مۋگدەن، حاربين تاعى باسقا دا قالالاردى ازات ەتۋگە اتسالىسىپتى. ۇلكەن حينگان تاۋىندا وتكەن اۋىر شايقاسقا دا قاتىسىپ، «قىزىل جۇلدىز» وردەنىمەن، «ەرلىگى مەن قايسارلىعى ءۇشىن»، «جاپونيانى جەڭگەنى ءۇشىن» مەدالدارىمەن ماراپاتتالىپتى. مانچجۋريادان ەلگە 1947 جىلى ءبىر-اق ورالعان. بەيبىت ومىردە دە ەل ەكونوميكاسى وسۋىنە ايانباي وزىندىك ۇلەسىن قوسىپ، 1947 جىلدان 1988 جىلعا دەيىن جامبىل لوكوموتيۆ دەپوسىندا ماشينيست بولىپ ەڭبەك ەتىپتى. «ەڭبەك ارداگەرى» توسبەلگىسىنىڭ يەگەرى. ءومىر جولىندا نەبىر قيىنشىلىق پەن جوقشىلىقتى، اشارشىلىقتى دا كورگەن قاريا بۇگىندە ءوزىنىڭ ەڭبەگىنىڭ جەمىسىنە بولەنىپ، بەس ۇل، ەكى قىزىنان تاراعان 15 نەمەرە، 13 شوبەرەسىنىڭ اراسىندا ادەمى قاريالىق شاعىن وتكەرۋدە ەكەن.
بۇدان كەيىنگى اڭگىمە بۇرباەۆتار اۋلەتى قۋانىشقا وراي جايعان مەرەكەلىك داستارحان ۇستىندە ودان ءارى جالعاستى.
وسى كۇنى، سونداي-اق اتالعان «اراي-2» شاعىن اۋدانىنان ءبىر بولمەلى پاتەرگە تارازدىق ۇلى وتان سوعىسىنىڭ ارداگەرى تيموريان شاڭعاراەۆ تا يە بولدى. جاڭا پاتەردىڭ كىلتىن وبلىس اكىمىنىڭ ورىنباسارى عالىمجان ءابدىرايىموۆ ارداگەر قاريانىڭ ۇيىنە ارنايى بارىپ تابىستاپ، جاڭا جىلمەن قۇتتىقتادى. تارازدىق جانە ءبىر ۇوس ارداگەرى، سولتۇستىك كاۆكاز مايدانىنداعى ەڭ اۋىر شايقاستاردىڭ بەل ورتاسىندا بولعان بالتاباي ساتۋۆالديەۆتىڭ وتباسىندا بولعان وبلىس اكىمىنىڭ ورىنباسارى تيمۋر جانكە ءوڭىر باسشىسى اتىنان سىي-سياپات جاسادى.
ايتا كەتۋ كەرەك، بيىل جالپى وبلىس بويىنشا 320 مىڭ شارشى مەتر تۇرعىن ءۇي القاپتارى سوعىلدى. بۇل دەگەنىمىز – بىلتىرعى جىلمەن سالىستىرعاندا 37 پايىزعا ارتىق. بۇل تاۋەلسىزدىك جىلدارى ايماقتىڭ جەتكەن ەڭ جوعارى جەتىستىكتەرىنىڭ ءبىرى رەتىندە باعالانۋدا.

بايماحانبەت احمەت

سۋرەتتى تۇسىرگەن
ۆيكتور بارباش

About admin

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>