«نۇروتاندىقتار» ارقاشان ساياسي-قوعامدىق وقيعالاردىڭ بەل ورتاسىنان تابىلاتىنى كوپشىلىككە جاقسى ءمالىم. «نۇر وتان» پارتياسىنىڭ وبلىستىق فيليالى جىل ىشىندە مەملەكەتتىك باعدارلامالاردىڭ ورىندالۋ بارىسىن باقىلاۋعا الىپ، اۋقىمدى جۇمىستار اتقاردى. بۇل تۋرالى ساياسي كەڭەس بيۋروسىنىڭ وتىرىسىندا ايتىلدى.
وبلىس اكىمى، پارتيانىڭ وبلىستىق فيليالىنىڭ توراعاسى كارىم كوكىرەكباەۆتىڭ توراعالىعىمەن وتكەن جيىن ماراپاتتاۋ راسىمىنەن باستالدى. ساياسي كەڭەستىڭ مۇشەسى، «اسار» قوعامدىق بىرلەستىگىنىڭ توراعاسى رۋسلان تولەگەنوۆكە قازاقستان رەسپۋبليكاسىنىڭ قۇرمەت گراموتاسىن سالتاناتتى جاعدايدا تاپسىرعان كارىم ناسبەك ۇلى بۇل ماراپاتتىڭ «نۇروتاندىقتاردىڭ» بەلسەندى جۇرگىزگەن جۇمىسىنىڭ جەمىسى ەكەنىن اتاپ ايتتى.
بيۋرو وتىرىسىندا پارتيانىڭ وبلىستىق فيليالى جانىنداعى سىبايلاس جەمقورلىققا قارسى ءىس-قيمىل جونىندەگى قوعامدىق كەڭەستىڭ توراعاسى باقتيار الداشوۆ پەن پارتيالىق باقىلاۋ كوميسسياسى ءتورايىمىنىڭ ورىنباسارى باقىت ءالمۇراتوۆتىڭ ەسەپتەرى تىڭدالىپ، اتقارىلعان جۇمىستارعا باعا بەرىلدى. سونداي-اق ايماقتىق فيليالدىڭ 2018 جىلدىڭ ءى جارتىجىلدىعىنا ارنالعان جۇمىس جوسپارى، پارتيانىڭ وبلىستىق ماسليحاتتاعى دەپۋتاتتىق فراكتسياسى مۇشەلەرى وتكىزەتىن قوعامدىق قابىلداۋلاردىڭ كەستەسى، «نۇروتاندىقتاردىڭ» اقپاراتتىق توبىنىڭ قۇرامى مەن جىلدىق بيۋدجەتى بەكىتىلدى.
جالپى اتالعان قوعامدىق كەڭەس پەن پارتيالىق باقىلاۋ كوميسسياسىنىڭ مالىمەتتەرىنەن «نۇروتاندىقتاردىڭ» وڭىردەگى كوپتەگەن ءىرى فورماتتاعى قوعامدىق-ساياسي شارالار وتكىزۋگە باستاماشىلدىق جاساپ، ءوزىنىڭ بەلسەندى پوزيتسياسىن ساقتاعانىن بايقاۋعا بولادى. بۇل – «نۇر وتان» پارتياسىنىڭ وبلىستىق فيليالى 2017 جىلدى تابىستى اياقتاعانىنىڭ ايقىن كورىنىسى. جيىندى قورىتىندىلاعان وبلىس اكىمى كارىم كوكىرەكباەۆ وسىعان توقتالدى.
– پارتيا فيليالدارى مەن ونىڭ باستاۋىش پارتيا ۇيىمدارى ەلباسىنىڭ جولداۋى مەن «بولاشاققا باعدار: رۋحاني جاڭعىرۋ» ماقالاسىن وبلىس جۇرتشىلىعى اراسىندا كەڭىنەن ناسيحاتتاۋ جۇمىستارىنا قاتىسۋدا ەرەكشە بەلسەندىلىك تانىتتى. سونىمەن قاتار وبلىستىڭ پارتيا فيليالدارى ءوڭىر تۇرعىندارىنىڭ استانا قالاسىندا وتكەن «ەحرو» حالىقارالىق كورمەسىن تاماشالاۋعا بارۋعا ۇلكەن ىقپال ەتە بىلگەندىگىن ايرىقشا اتاپ وتكىم كەلەدى. سونداي-اق اعىمداعى جىلدىڭ 26 ناۋرىزى مەن 29 قازانىندا جەرگىلىكتى ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋدى دا ۇيىمشىلدىقپەن وتكىزدى. ءبىزدىڭ وبلىستان سايلانعان ءماسليحات دەپۋتاتتارىنىڭ بارلىعى پارتيالىق كادرلىق رەزەرۆتەن ىرىكتەلىپ الىندى، – دەي كەلە كارىم ناسبەك ۇلى جىل سايىنعى ءداستۇرلى «ۇزدىك باستاۋىش پارتيا ۇيىمى» رەسپۋبليكالىق بايقاۋىندا قورداي اۋداندىق فيليالىنىڭ «ماسانشى» باستاۋىش پارتيا ۇيىمى 3-ورىنعا يە بولعانىن اتاپ ءوتتى.
«نۇروتاندىقتارعا» الداعى ۋاقىتتا دا وسىلاي قارقىندى جۇمىس جۇرگىزۋدى تاپسىرعان ءوڭىر باسشىسى كەلەر جىلدىڭ پارتيا فيليالدارى ءۇشىن جاۋاپتى كەزەڭ ەكەنىن ەسكە سالدى. «2018 جىلى – وبلىس پارتيا ۇيىمدارىندا ەسەپ بەرۋ-سايلاۋ جينالىستارى مەن كونفەرەنتسيالارى وتەدى. وعان دايىندىق جۇمىستارىن بۇگىننەن باستاۋ قاجەت»، – دەگەن كارىم كوكىرەكباەۆ پارتيانىڭ وبلىستىق فيليالى ساياسي كەڭەسى بيۋرو جۇمىسىنا تىڭ سەرپىن بەرىپ، پارتيا جۇمىسىنىڭ ساياسي مارتەبەسىن جاڭا بيىكتەرگە كوتەرەتىنىنە سەنىم ءبىلدىردى.
ارداق ۇسەيىنوۆا
سۋرەتتى تۇسىرگەن
اقادىل رىسماحان.