قۇرمەتتى جامبىلدىقتار!
بارشاڭىزدى ۇلى دالا ەلىنىڭ تورىنە شىققالى وتىرعان جاڭا جىل مەرەكەسىمەن شىن جۇرەكتەن قۇتتىقتايمىن!
جاڭا جىل – ءجۇرىپ وتكەن جىلعا لايىقتى باعا بەرىپ، بولاشاققا تىڭ قادام جاسايتىن، ادامزات بالاسىنا رۋحاني سەرپىلىس بەرەتىن، جارقىن ومىرگە جول سىلتەيتىن، سەنىمگە سەرىك بولاتىن ايتۋلى مەرەكە.
جىل سايىن ءبىز ونى ۇكىلى ۇمىتپەن، ىزگى تىلەكپەن قارسى الىپ، تولايىم تابىسقا ۇلاسقان ءسان-سالتاناتىمەن شىعارىپ سالامىز.
2017 جىل دا ەلىمىز ءۇشىن بەرەكەلى ءارى جەمىستى جىل بولدى. تاريح جىلناماسىنا كەتىپ بارا جاتقان جىل ەلباسى ن.ءا.نازارباەۆتىڭ قازاقستان حالقىنا ارناعان ءداستۇرلى جولداۋىندا كورىنىس تاپقان قازاقستاننىڭ ءۇشىنشى جاڭعىرۋى باستاۋ الىپ، قوعامدىق ساناعا سەرپىلىس اكەلگەن «بولاشاققا باعدار: رۋحاني جاڭعىرۋ» تاريحي ماقالاسىمەن جاراسىمدى جالعاسىن تاپتى. دامۋ مەن وركەندەۋدى كوزدەگەن ۇلت جوسپارىنىڭ ەكىنشى جىلىن اسا زور تابىسپەن اياقتادىق.
وسى جىلى ەلدىگىمىزدىڭ ايشىعى قازاقستان رەسپۋبليكاسىنىڭ مەملەكەتتىك رامىزدەرىنە 25 جىل، ال الاش قوزعالىسىنا 100 جىل تولدى. ەڭسەلى ەلوردامىزدا يسلام ىنتىماقتاستىق ۇيىمىنىڭ ءسامميتى ءوتتى. ەلىمىز ازيا مەملەكەتتەرىنىڭ اراسىنان بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قىزمەتىن باستادى. سونداي-اق، 2017 جىلى استانا قالاسىندا بۇكىل الەم كوز تىككەن «ەحرو-2017» حالىقارالىق ايشىقتى كورمەسى ءوتتى. الەمنىڭ 115 مەملەكەتى قاتىسىپ، 4 ميلليوننان استام تۋريست تاماشالاعان كورمە ەگەمەن ەلىمىزدىڭ اتىن شارتاراپقا پاش ەتتى.
ال وتكەن جىل قاسيەتتى اۋليەاتا وڭىرىندە دە ايتۋلى وقيعالارعا تولى بولدى. ونىڭ ىشىندە، ازيانىڭ V اگروحيميالىق فورۋمى، «ANCIENT TARAZ-2017» حالىقارالىق تۋريستىك فورۋمى، « ۇلى دالا وركەنيەتى» حالىقارالىق كونگرەسى وتكىزىلدى. ءوتىپ بارا جاتقان جىلى ءوندىرىسىمىز وركەندەپ، ءتۇرلى سالالار بويىنشا يگى وزگەرىستەرگە قول جەتكىزدىك. جاڭا مەكتەپتەر مەن بالاباقشالار، اۋرۋحانالار مەن ەمحانالار، باسقا دا الەۋمەتتىك نىساندار پايدالانۋعا بەرىلدى. جۇزدەگەن وبلىس تۇرعىندارى جاڭا پاتەردە جاڭا جىلدى قارسى الاتىن بولدى. اگروونەركاسىپ كەشەنى جىلدى تابىستى اياقتادى. سونداي-اق، مادەني-رۋحاني سالاداعى جاڭا ىزدەنىستەر دە ناتيجەلى بولدى. وبلىس سپورتشىلارى الەمدىك جارىستاردا توپ جارىپ، ەگەمەن ەلىمىزدىڭ نامىسىن ابىرويمەن قورعاپ قايتتى.
وسىنداي يگى ىستەردىڭ بارلىعى ەلباسى، ۇلت كوشباسشىسى ن.ءا.نازارباەۆتىڭ سىندارلى ساياساتىنىڭ ناتيجەسى ەكەنى بارشاعا ايان.
قۇرمەتتى جەرلەستەر!
تاتۋلىعى مەن ىنتىماعى جاراسقان كوپ ۇلتتى وبلىسىمىزدىڭ ءاربىر تۇرعىنىنا تۋعان ولكەمىزدى وركەندەتۋ مەن گۇلدەندىرۋ جولىنداعى ەرەن ەڭبەكتەرى مەن رۋحى بيىك سۇيىسپەنشىلىكتەرى ءۇشىن العىسىمدى جەتكىزگىم كەلەدى. ويتكەنى، ءبىز، وسىنشاما تولاعاي تابىسقا جۇدىرىق بولىپ جۇمىلا جۇمىس اتقارۋىمىزدىڭ ارقاسىندا قول جەتكىزدىك.
جاڭا جىل جاڭا جەڭىستەر مەن جاڭا مۇمكىندىكتەرگە جول اشسىن. ويلاعان ويلارىمىز ورىندالىپ، تاتۋلىق پەن دوستىق نىعايىپ، قوعامدا ءوزارا الەۋمەتتىك بەرىك سەنىم ورنىقسىن. ويتكەنى، ءبىز ءار جىلدارى قالىپتاسقان ءداستۇر بويىنشا كەلە جاتقان جاڭا جىلدان جاقسىلىق پەن قۋانىش، باقىت پەن مەرەكەلىك سالتانات كۇتەرىمىز بەلگىلى.
سىزدەرگە زور دەنساۋلىق، وتباسىلارىڭىزعا اماندىق، اشىق اسپان، باق-بەرەكە تىلەيمىن! تاۋەلسىز قازاقستانىمىزدىڭ تۇعىرى بيىك، عۇمىرى ۇزاق بولسىن!
جاڭا جىلدا بارشامىزعا ساتتىلىك سەرىك بولسىن!
ەلىمىزدە بالالاردىڭ شات كۇلكىسى ەستىلسىن.
جاڭا جىل قۇتتى بولسىن، ارداقتى اعايىن!
كارىم كوكىرەكباەۆ،
جامبىل وبلىسىنىڭ اكىمى.