جاڭا پاتەردىڭ كىلتى تابىس ەتىلدى

ۇلى وتان سوعىسىنىڭ ارداگەرى مۇساحان بەردىباەۆ جاڭا جىل قارساڭىندا ۇلكەن قۋانىشقا كەنەلدى. وعان تاراز قالاسىنىڭ «اراي» تۇرعىن ءۇي القابىنان جاڭادان بوي كوتەرگەن تۇرعىن ءۇي كەشەنىنەن جاڭا  پاتەر بەرىلدى. ارداگەرگە  تۇرمىستىق-الەۋمەتتىك  قولايلى  جاعداي  جاسالعان  ءبىر بولمەلى پاتەردىڭ كىلتىن وبلىس اكىمىنىڭ ءبىرىنشى ورىنباسارى بەكبولات ورىنبەكوۆتىڭ تىكەلەي ءوزى بارىپ تابىس ەتتى. جاڭا جىل قارساڭىندا قۋانىشقا بولەنىپ، قونىس تويىن تويلاعان قاريانىڭ وتباسى وبلىس باسشىلىعىنا العىس جاۋدىرىپ، اق داستارحان جايدى. پاتەر يەسىن قۇتتىقتاپ، ىزگى تىلەك-نيەتىن جەتكىزگەن بەكبولات سەرىكبەك ۇلى بەيبىت ءومىر كەشىپ، بەرەكەگە كەنەلىپ جۇرگەنىمىز كەشەگى مايدانگەرلەر – بۇگىنگى ارداگەرلەردىڭ، ەلباسىنىڭ سىندارلى ساياساتىنىڭ ارقاسى ەكەندىگىن، ارداگەرلەرىمىزگە لايىقتى قۇرمەت كورسەتىلە دە بەرەتىنىن  اتاپ ءوتتى. 

 قاريانى جاڭا قونىسىمەن قۇتتىقتاپ بارعان وبلىستىق ارداگەرلەر كەڭەسىنىڭ توراعاسى ەركىنبەك سولتىباەۆ ۇلى وتان سوعىسى مەن تىل ارداگەرلەرىنە جان-جاقتى قامقورلىق جاساپ، قۇرمەتتەۋمەن جۇرەتىن وبلىس باسشىلىعىنا العىس ايتىپ، قوعامدىق جۇمىستاردا ايرىقشا بەلسەندىلىگىمەن، بەدەلىمەن تانىلعان ارداگەردىڭ بۇل سىي-قۇرمەتكە ابدەن لايىقتى ەكەنىن اتاپ ءوتىپ، ءالى دە تۇعىرىنان تايماي، كوپ جاساي بەرۋىنە تىلەكتەستىگىن جەتكىزدى.

بۇگىندە 96 جاسقا تولىپ وتىرعان م. بەردىباەۆ جۋالى اۋدانىنىڭ قوڭىرتوبە اۋىلىندا دۇنيەگە كەلگەن ەكەن. سوعىس باستالعان جىلى اسكەر قاتارىنا الىنىپ، 1942 جىلى ستالينگرادتى ازات ەتۋ شايقاسىنا قاتىسقان. 1943 جىلى بەلورۋسسيادا، ودان كەيىن پريبالتيكا فلوتىندا مينومەتشى بولىپتى. 1945 جىلى جارالى بولۋىنا بايلانىستى ەلگە ورالعان ەكەن.
سوعىستان كەيىن اراعا 4 جىل سالىپ اۋداندىق پارتيا كوميتەتىندە نۇسقاۋشى، بۋرنىي متس-ىندە ديرەكتوردىڭ ورىنباسارى، 1963 جىلى ۋچيليششە ديرەكتورى، 1979 جىلى اۋداندا جاڭادان اشىلعان ەرەسەكتەرگە ارنالعان مەكتەپتىڭ ديرەكتورى قىزمەتتەرىن اتقارادى. ول ەڭبەك جولىن دا وسى مەكتەپتەگى قىزمەتىمەن ءتامامداپ، زەينەتكە شىققان.
قارت مايدانگەر ۇلى وتان سوعىسىنىڭ ءى-ءىى دارەجەلى وردەنىمەن، «قىزىل جۇلدىز»، «دوبراتا سپاسەت مير» وردەندەرىمەن، قازاق كسر جوعارعى كەڭەسىنىڭ گراموتالارىمەن ماراپاتتالعان.
ونەگەلى ءومىردىڭ ۇلگىسى بولعان مۇساحان بەردىباەۆ – 1 ۇل، 6 قىزدىڭ اكەسى. ولاردان 18 نەمەرە مەن 29 شوبەرە ءسۇيىپ، ءماندى دە ماعىنالى عۇمىر كەشىپ كەلە جاتقان اقساقال وزىنە كورسەتىلگەن بۇل سىي-قۇرمەت ءۇشىن رازىلىعىن ءبىلدىرىپ، «بارشالارىڭا مەنىڭ جاسىمدى بەرسىن! ەل-جۇرتىمىز امان بولسىن!» دەگەن اق باتاسىن بەردى.

قارلىعاش ەسبەرگەنوۆا
سۋرەتتى تۇسىرگەن
اقادىل رىسماحان.

About admin

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>