مەملەكەت باسشىسى رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى.
نۇرسۇلتان نازارباەۆ تمد ەلدەرى باسشىلارىنىڭ بەيرەسمي سامميتىنە قاتىسۋعا شاقىرعانى ءۇشىن ۆلاديمير پۋتينگە العىس ءبىلدىرىپ، وتكەن كەلىسسوزدەردىڭ تابىستى بولعانىن ايتتى.
– ەلدەرىمىز اراسىندا شەشىمىن تاپپاعان ماسەلە جوق. تاۋەلسىزدىكتىڭ 26 جىلى ىشىندە ءبىز ءبىر-بىرىمىزگە جاقىن بولا تۇستىك، شارتتىق بازانى قالىپتاستىرىپ، ءوزارا ىنتىماقتاستىق ءۇشىن قولايلى جاعداي جاسادىق، – دەدى قازاقستان پرەزيدەنتى.
مەملەكەت باسشىسى ەۋرازيالىق ينتەگراتسيا ماسەلەلەرىنە ەرەكشە توقتالىپ، قازاقستان مەن رەسەي اراسىنداعى ىنتىماقتاستىقتىڭ تابىستى ەكەنىن اتاپ ءوتتى.
– ءبىز بارلىق ماسەلەلەر بويىنشا، سونىڭ ىشىندە كاسپي تەڭىزى، «بايقوڭىر» عارىش ايلاعى جونىندە كەلىسسوز جۇرگىزدىك. عارىشتى يگەرۋ سالاسىندا ەكولوگيالىق تۇرعىدان تازا جانارمايمەن جۇمىس ىستەيتىن زىمىران تاسۋشىلاردىڭ جاڭا ءتۇرىن جاساۋ جوسپارلانىپ وتىر، – دەدى نۇرسۇلتان نازارباەۆ.
رەسەي فەدەراتسياسىنىڭ پرەزيدەنتى ەكىجاقتى قارىم-قاتىناستار تابىستى دامىپ كەلە جاتقانىنا توقتالىپ، جوعارى ساراپشىلىق دەڭگەيدەگى مامانداردىڭ تسيفرلىق تەحنولوگيالاردى دامىتۋعا ارنالعان كەزدەسۋىن قازاقستاندا وتكىزۋ جونىندەگى باستاماسى ءۇشىن نۇرسۇلتان نازارباەۆقا العىس ايتتى.
– بيىلعى 10 ايدىڭ ىشىندە ەلدەرىمىز اراسىنداعى تاۋار اينالىمىنىڭ ءوسىمى 34 پايىزدى قۇرادى. ەڭ ماڭىزدىسى ءارى پەرسپەكتيۆاعا باعىتتالعانى – تسيفرلىق تەحنولوگيالار سالاسىنداعى ءبىزدىڭ ىنتىماقتاستىعىمىز بەن بىرلەسكەن جۇمىسىمىز. قازاقستان ەكونوميكا، وڭىرلىك جانە حالىقارالىق قاۋىپسىزدىك، سونداي-اق ەلدەرىمىزدىڭ قورعانىس قابىلەتىن قامتاماسىز ەتۋ سالالارىندا ءبىزدىڭ نەگىزگى سەرىكتەسىمىز بولدى جانە سولاي بولىپ قالا بەرمەك، – دەدى رەسەي پرەزيدەنتى.
سونداي-اق كەزدەسۋ بارىسىندا مەملەكەتتەر باسشىلارى ەنەرگەتيكا، عارىشتى يگەرۋ جانە تسيفرلىق ەكونوميكا سالاسىنداعى ىنتىماقتاستىق ماسەلەلەرىن تالقىلادى.