«100 جاڭا ەسىم» جوباسىنا جامبىل جەرىنەن ءۇش سپورتشى ەنگەنى بەلگىلى. ولاردىڭ قاتارىندا جامبىل فۋتبول مەكتەبىنىڭ تۇلەگى باۋىرجان يسلامحان دا بار. ونى كوپشىلىك «باتوري» اتاپ كەتكەن. جامبىل فۋتبول مەكتەبىنىڭ تۇلەگى باۋىرجان يسلامحان فۋتبولداعى كاسىبي مانسابىن «تاراز» فۋتبول كلۋبىندا باستادى. جاس تا بولسا جاسىل الاڭدا جاسىنداي جارقىراي بىلگەن باۋىرجاننىڭ شەبەرلىگىنە ەلىمىزدىڭ بەلدى كوماندالارى مەن كورشىلەس مەملەكەتتەردىڭ ۇجىمدارى قىزىعا باستادى. بالاڭ شاعىندا تاەكۆوندومەن شۇعىلدانعان ول كەيىننەن جاراقاتىنا بايلانىستى فۋتبولعا دەن قويدى. جاسىل الاڭدا تالماي تەر توكتى.
2011 جىلى «تاراز» ساپىندا العاش جاسىل الاڭعا بەتتەگەن جاس پەرى بىرنەشە ايدان سوڭ فۋتبولشىلاردى الاڭعا كاپيتان رەتىندە باستاپ شىقتى. وسىندا ءجۇرىپ رەسەيدەگى تمد ەلدەرى كوماندالارىنىڭ ءداستۇرلى تۋرنيرىنە قاتىستى. نەگىزگى امپلۋاسى جارتىلاي قورعاۋشى بولعانىنا قاراماستان، شابۋىلعا دا ءجيى ارالاساتىن يسلامحان ارىپتەستەرىنىڭ اشىلعان ءساتىن دەر كەزىندە كورىپ، تاماشا گولدىق پاستار شىعارا دا بىلەدى. بەينەلەپ ايتساق، ونىڭ الاڭداعى ءرولى – ەركىن سۋرەتشى.
«تارازدا» جاسىنداي جارقىراعان تالانتقا رەسەيدىڭ «كۋبان»، «رۋبين» كومانداسى مەن ۋكراينانىڭ «مەتاللۋرگ» فۋتبول كلۋبىنداعى مامانداردىڭ كوزى ءتۇستى. قازاقستان پرەمەر-ليگاسىندا ناتيجەلى ويىن كورسەتىپ جۇرگەن باۋىرجان 2013 جىلى كراسنوداردىڭ «كۋبان» فۋتبول كلۋبىمەن 3 جىلدىق كەلىسىمشارت جاساستى. الايدا «كۋبان» فۋتبول كلۋبى جاس تالانتتىڭ جولىن اشادى ما دەگەن ءۇمىتىمىز سۋ سەپكەندەي باسىلدى. ءتۇرلى سەبەپتەر باۋىرجاننىڭ رەسەي چەمپيوناتىندا ءوزىن جاقسى قىرىنان كورسەتۋىنە مۇمكىندىك بەرمەدى. كەيىننەن «استانا» فۋتبول كلۋبىنا جالعا بەرىلدى.
ءيا، 2014 جىلى باۋىرجان يسلامحان ءوز كومانداسىن تاپتى. ول الماتىنىڭ «قايراتىنا» اۋىسقان بەتتە-اق اتالمىش ۇجىمنىڭ كوشباسشىسىنا اينالدى. اتى اڭىزعا اينالعان كوماندانىڭ كاپيتانى رەتىندە ارىپتەستەرىن جىگەرلەندىرگەن يسلامحان 2014 جىلى ەل بىرىنشىلىگىندە قولا جۇلدەگەر اتانسا، ودان كەيىن بىرنەشە رەت كومانداسىمەن كۇمىس جۇلدەنى، ءۇش رەت ەل كۋبوگىن، ەكى رەت قازاقستان سۋپەركۋبوگىن ۇتىپ الدى. قازاقستاننىڭ جاستار قۇراماسىنان باستاپ، ەرەسەكتەر قۇراماسىندا دا كوشباسشىعا اينالعان جامبىلدىق جامپوز «قايرات» ساپىندا دا كەرەمەت شەبەرلىگىمەن كوزگە ءتۇسىپ، 2014 جىلى جىل فۋتبولشىسى اتاندى. ول بۇل جەتىستىگىن 2016 جىلى دا قايتالاپ، جانكۇيەرلەرىن قۋانتتى. سول ماۋسىمدا باۋىرجان 17 گولدىڭ اۆتورى اتانىپ، بومبارديرلەردىڭ دە قاتارىنان كورىنە ءبىلدى. «قايراتتىڭ» قۇرامىندا ءوز ورنىن نىقتاعان تارازدىق تالانت كوماندا تاريحىنداعى ۇزدىك شابۋىلشىلار تىزىمىندە كەلەدى.
24 جاسار جاس تالانتتىڭ اسقاق ارمانى – قازاقستان قۇراماسىمەن بىرگە الەم چەمپيوناتىنا قاتىسۋ. بۇل ارمان ورىندالا ما، جوق پا – وعان ۋاقىت تورەشى ارينە. «ماعان «بارسەلونا» فۋتبول كلۋبىنىڭ ويىنشىسى اندرەس ينەستانىڭ ويىن مانەرى قاتتى ۇنايدى. جاسىل الاڭدا جۇرگەندە سول فۋتبولشى سەكىلدى قيمىلداعىم كەلەدى. ينەستا – دەر كەزىندە پاس شىعاراتىن حاس تالانت. الاڭدى تاماشا كورەتىن قاسيەتى دە بار»، – دەگەن باۋىرجان ءوزىن دوستارى نەگە باتوري اتاپ كەتكەنىنىڭ سەبەبىن قۇپيا ۇستاعىسى كەلەتىنىن دە ايتىپ قالدى. باۋىرجاننىڭ 2016 جىلعى ەۋروپا ليگاسىندا شوتلانديانىڭ «ابەردين» فۋتبول كلۋبىنىڭ قاقپاسىنا سوققان گولى ۇلىبريتانيالىق تەلە ارنالاردىڭ بىرىندە ۇزدىك گول دەپ تانىلعان بولاتىن.
– توبەدەن قاراپ وتىرعاندا، ءبارى وڭاي. تەلەديداردان نەمەسە توبەدەن قاراپ وتىرسام، ماعان دا وپ-وڭاي. ال الاڭدا ءبارى دە مۇلدە باسقاشا. سوندىقتان كوپ سويلەگىم كەلمەيدى. ويتكەنى «قايراتتىڭ» چەمپيوندىعى – مەنىڭ جەكە ماراپاتتارىمنان مىڭ ەسە ارتىق! – دەيدى باۋىرجان ءوز ويىمەن ءبولىسىپ.
قازاق فۋتبولىنىڭ دامۋىنا جاس بولعانىنا قاراماي، تامشىداي بولسا دا ۇلەس قوسىپ جۇرگەن باۋىرجان يسلامحان ەلىمىزدىڭ «ءجۇز جاڭا ەسىمى» جوباسىنا قوسىلعانىن ۇلكەن جاۋاپكەرشىلىك سانايدى. ول «قايرات» كومانداسىنىڭ قۇرامىندا ويناپ ءجۇرىپ، «تاراز» فۋتبول كلۋبىنىڭ قاقپاسىنا بىرنەشە مارتە گول سوقتى. الايدا اسىپ-تاسىپ قۋانعان جوق. قۇتتىقتاۋعا ۇمتىلعان ارىپتەستەرىن توقتاتىپ، سابىرعا شاقىرادى. بۇل – فۋتبولدا بار ءداستۇر. تالابىن ۇشتاعان كومانداسىن قاتتى قۇرمەتتەيتىن باۋىرجاندى جامبىلدىق جانكۇيەرلەر جاسىل الاڭنان كورگەندە «ءبىزدىڭ باتوري!» دەپ ايقايعا باسادى. ونىسى فۋتبولشىنى ساعىنعاندىقتان بولار. جاۋاپكەرشىلىك جۇگىن قىڭباي كوتەرىپ جۇرگەن باۋىرجاننىڭ باعىندىرار بيىگى ءالى الدا دەپ بىلەمىز. سەبەبى «ءبىزدىڭ باتوري» ەشقاشان جالقاۋلىققا بوي الدىرمايدى.
تابيعات ابايلداەۆ