وڭىرىمىزدە تۇرعىن ءۇي قۇرىلىسىن جانداندىرۋعا بارىنشا باسىمدىق بەرىلىپ كەلەدى. مەملەكەتتىك باعدارلامالار ارقىلى اۋدانداردىڭ دا اجارى ارتا تۇسۋدە. بۇرىن ءىرى ءوندىرىس وشاقتارىنىڭ ماڭىنا شوعىرلانىپ، ۋاقىت وتە قۇلدىراۋعا ۇشىراعان قالالاردىڭ بۇگىنگى بەينەسى تىپتەن باسقا. قازىر شاعىن قالالاردان تۇراق تاپقىسى كەلەتىندەردىڭ سانى كوپ. ولاردى باسپانامەن قامتۋ ماسەلەسى دە كەزەڭ-كەزەڭىمەن شەشىمىن تاۋىپ وتىر.
ماسەلەن، شۋ قالاسىندا كەلەسى جىلدىڭ قىركۇيەك ايىندا «قولجەتىمدى تۇرعىن ءۇي – 2020» باعدارلاماسى اياسىندا «جەتىسۋ» القابىنداعى 75 پاتەرلى №4 تۇرعىن ءۇي جەرگىلىكتى تۇرعىنداردىڭ شاتتىق شاڭىراعىنا اينالاتىن بولادى. قازىر وندا قالپىنا كەلتىرۋ جۇمىستارى جوسپارعا ساي جۇرگىزىلۋدە.
ىرگەتاسى وتكەن عاسىردىڭ ەكىنشى جارتىسىندا قالانعان، ابدەن توزىعى جەتكەن اپاتتى ۇيلەردى جاڭعىرتۋدىڭ وڭاي شارۋا ەمەس ەكەندىگى تۇسىنىكتى. بۇگىنگى كۇنى اتالعان تۇرعىن ءۇي القابىن قالپىنا كەلتىرۋ جۇمىستارىمەن «نيك تاراز» جاۋاپكەرشىلىگى شەكتەۋلى سەرىكتەستىگى اينالىسىپ جاتىر. سەرىكتەستىك ديرەكتورى ءسابيت شوقاتاەۆتىڭ ايتۋىنشا، قۇرىلىسشىلار №4 ءۇيدىڭ ءىشى-سىرتىن تازارتۋدىڭ وزىنە قىرۋار كۇش جۇمساپتى.
– ۇزاق ۋاقىت ەشكىم تۇرماعان سوڭ، تۇرعىن ءۇي قوقىس الاڭىنا اينالىپ كەتكەن. ونداعى قولقانى قابار قولاڭسا ءيىستى كەتىرىپ، قوقىسقا تولىپ قالعان بولمەلەردى تازارتىپ، سىرتقى جانە ىشكى ارلەۋ، ەسىك، تەرەزە، ەلەكتر قۋاتىن ورناتۋ سىندى ىشكى ينجەنەرلىك جۇمىستاردىڭ بارلىعىن مەجەلى ۋاقىتقا دەيىن اياقتاۋدى جوسپارلاپ وتىرمىز. قۇرىلىس جۇمىستارىن قولعا العان 4 اي ىشىندە وبلىستىق قازىنادان قارالعان 98 ميلليون 448 مىڭ 324 تەڭگە بۇگىنگى كۇنى تولىعىمەن يگەرىلدى. ارنايى كەلىسىمشارت نەگىزىندە كەلەسى جىلى قايتا جاڭعىرتۋ جۇمىستارىن اياقتاۋعا جەرگىلىكتى قازىنادان تاعى 292 ميلليون 386 مىڭ 534 تەڭگە قاراجات بولىنبەك. ال نىساندى تۇرعىندارعا تاپسىرۋ مەرزىمى كەلەسى جىلدىڭ قىركۇيەك ايىنا دەيىن جوسپارلانعان، – دەيدى ول.
جەرگىلىكتى تۇرعىندار اراسىندا «اسكەري قالاشىق» اتالىپ كەتكەن «جەتىسۋ» تۇرعىن ءۇي القابىندا №4 ۇيدەن بولەك، ءتورت بىردەي كوپ قاباتتى ءۇي ورنالاسقان. قاناتقاقتى جوبا رەتىندە №4 تۇرعىن ءۇيدى قايتا قالپىنا كەلتىرۋ جۇمىستارىن قولعا العان جەرگىلىكتى بيلىك الداعى ۋاقىتتا ونداعى بارلىق ءۇيدى تۇرعىندار يگىلىگىنە بەرۋدى جوسپارلاپ وتىر. «مۇندا 3 بولمەلى 13 پاتەر، 2 بولمەلى 44 پاتەر جانە 1 بولمەلى 18 پاتەر بار. بۇگىنگى كۇنى القاپتاعى قالعان كوپ قاباتتى 3 ۇيدەگى پاتەرلەردى مەملەكەت مەنشىگىنە وتكىزۋ جوسپارلانۋدا. ولاردىڭ بارلىعىندا دا 75 پاتەردەن بار. تيىسىنشە، الداعى ۋاقىتتا ءبىر عانا القاپتاعى قۇرىلىس جۇمىستارىن جۇيەلى جۇرگىزۋ ارقىلى 300 تۇرعىندى باسپانامەن قامتۋ مۇمكىندىگىنە يە بولامىز. قازىرگى كەزدە اۋداندا 600-گە جۋىق ادام تۇرعىن ءۇي كەزەگىندە تۇر. ەسكى تۇرعىن ۇيلەردى قايتا قالپىنا كەلتىرۋ ارقىلى تۇرعىنداردى پاتەرمەن قامتۋ ماسەلەسى رەت-رەتىمەن شەشىلمەك. مۇنداعى قونىستانۋشىلاردىڭ العاشقى لەگى كەلەسى جىلدىڭ شىلدە ايىندا كەلە باستايدى»، – دەيدى اۋدان اكىمدىگىنىڭ ساۋلەت، قالا قۇرىلىسى جانە قۇرىلىس ءبولىمىنىڭ سەكتور مەڭگەرۋشىسى الىبەك جانباەۆ.
وسىنداي يگى باستامالاردى قولعا العان جەرگىلىكتى بيلىك وكىلدەرى تۇرعىنداردىڭ تىلەگىن قاناعاتتاندىرۋعا تىرىسۋدا. بۇل جۇمىستار الداعى ۋاقىتتا دا جالعاسا بەرسە، شىرايلى ولكەدەگى باسپانا ماسەلەسى كوپ كۇتتىرمەي ءوز شەشىمىن تابارى ءسوزسىز.
شۋ اۋدانى.
ەرعالي قارتايعان