فۋتبولدان ەۋروپا ليگاسى توپتىق كەزەڭىنىڭ ءۇشىنشى تۋرى اياسىندا ەلوردالىق «استانا» فۋتبول كلۋبى يزرايل ەلىنىڭ «ماككابي» كومانداسىن قابىلداپ، جارقىن جەڭىسكە قول جەتكىزدى.
«استانا» فۋتبولشىلارى بۇل ويىندا جاسىنداي جارقىرادى. عالامات ويىن ۇلگىسىن كورسەتكەن قازاقستاندىق كومانداعا سۇيسىنبەگەندەر كەم. تورەشى ىسقىرىعى ەستىلە سالىسىمەن شابۋىلعا يەك ارتقان ەل چەمپيوندارى شىن مىقتىعا تۇساۋ بولمايتىنىن ايگىلەدى. ويىننىڭ 34 مينۋتىندا «ماككابي» فۋتبولشىسى دور پەرەتس ايىپ الاڭىندا قولمەن وينادى. تورەشى ويلانباستان 11 مەترلىك نۇكتەنى نۇسقادى. دوپقا بەتتەگەن پاتريك تۆۋماسي 11 مەترلىك ايىپ سوققىسىن كەرەمەت ورىنداپ ەسەپ اشتى. ال كەزدەسۋدىڭ 42 مينۋتىندا پاتريك تۆۋماسي دۋبل اۆتورى اتانىپ، ەسەپتى ەسەلەدى. كەرەمەت كومبيناتسيالىق فۋتبول ۇلگىسىن كورسەتكەن قازاقستاندىق كوماندا ءبىرىنشى 45 مينۋتتىقتى بۇدان دا ءىرى ەسەپپەن اياقتار ما ەدى. تەك كەي ساتتەردە ساتتىلىك جەتىسپەدى.
«استانا» فۋتبولشىلارى ۇزىلىستەن كەيىن دە العان بەتىنەن تانعان جوق. تولاسسىز شابۋىلدار ءوز ناتيجەسىن بەردى. ويىننىڭ 47 مينۋتىندا جۋنيور كابانانگا بەلسەندى بولدى. ءوز مۇمكىندىگىن ءمۇلت جىبەرمەگەن كابانانعا ەسەپتى 3:0-گە جەتكىزگەن ساتتە كوڭىلدە قۋانىش وتى الاۋلادى. كابانانگا مۇنىمەن توقتاپ قالعان جوق. اراعا بەس مينۋت سالىپ، ول ءوزىنىڭ وسى ويىنداعى ەكىنشى گولىن ەنشىسىنە جازدى. تاماشا ناتيجە! «استانا» فۋتبولشىلارى بۇدان كەيىن دە ەسەپتى ەسەلەر مە ەدى. الايدا، شابۋىلدان سوڭ دەر كەزىندە قورعانىسقا كوڭىل ءبولىپ، سايىپقىراندارىمىز الاڭنىڭ بارلىق بولىگىندە ساۋاتتى ويناي ءبىلدى.
سونىمەن، كابانانگا مەن تۆۋماسي قوس-قوستان گول سوققان ويىندا «استانا» 4:0 ەسەبىمەن «ماككابيدىڭ» تاس-تالقانىن شىعاردى. الدا توپتىق كەزەڭنىڭ ءۇش ويىنى بار. ەگەر «استانا» فۋتبولشىلارى كەلەسى ويىنداردا دا جاقسى ناتيجە كورسەتىپ، ۇپاي قورىن مولايتا تۇسسە، توپتان شىعاتىن تاماشا مۇمكىندىك تۋىنداماق. ەندەشە، قازاقستاندىق كومانداعا تەك جەڭىس تىلەيمىز!
تابيعات ابايلداەۆ، «اق جول».