سامبو كۇرەسىنەن جاستار اراسىنداعى الەم چەمپيونى
جادىرا امىرتاەۆانى جامبىلدىقتار قوشەمەتپەن كۇتىپ الدى
سەربيانىڭ نوۆي-ساد قالاسىندا سامبو كۇرەسىنەن جاستار اراسىنداعى الەم چەمپيوناتى وتكەنى بەلگىلى. ءتورت كۇنگە سوزىلعان ايتۋلى الامانعا جامبىلدىق سپورتشىلار دا قاتىسىپ، جۇلدەلى ورىنداردان كورىنگەن بولاتىن.
بۇل دودا – جاس سپورتشىلار ءۇشىن ەڭ باستى باسەكەلەردىڭ ءبىرى. الەمدىك سىندا قاتارىنان وزا شاۋىپ، بايگە الۋ وڭاي ەمەس. دەسە دە تالپىنعاننىڭ مۇراتقا جەتەتىنى انىق. ويتكەنى، جەڭىسكە دەگەن قۇشتارلىق ءتۇبى باعالانادى.
بايراقتى باسەكەدە بارىن سالعان، جانىن سالعان جامبىلدىق سپورتشىلارعا ەكى بىردەي جۇلدە بۇيىرعان-دى. اتاپ ايتساق، 52 كەلى سالماق دارەجەسىندە قىزدار اراسىندا توپقا تۇسكەن جادىرا امىرتاەۆانىڭ مەرەيى ۇستەم بولدى. سەربيا تورىندە ءوزىن جاقسى قىرىنان كورسەتىپ، جاسىنداي جارقىراعان ول قارسىلاستارىنىڭ بارلىعىن قاپى قالدىرىپ، شىن مىقتى ەكەنىن ايقىنداپ، التىن جۇلدەنى موينىنا ءىلدى. كوك تۋىمىزدى كوكتە جەلبىرەتكەن ساڭلاقتىڭ اسقاق ارماندارى مەن الار اسۋلارى ءالى الدا ەكەنى انىق. سونىمەن قاتار، 56 كەلى سالماق دارەجەسىندە ەرلەر دوداسىنا ارالاسقان ەلنۇر سۇلەيمەن دە ءۇمىتىمىزدى اقتادى. ەلنۇر – قولا جۇلدەگەر.
الەم بىرىنشىلىگىندە اتوي سالعان جادىرا امىرتاەۆا مەن باپكەرى ابىلاي بوشقايدى جامبىلدىق جۇرتشىلىق تاراز قالاسىنىڭ شىعىس قاقپاسىنان كۇتىپ الىپ، قوشەمەت كورسەتتى. سايىپقىرانعا الداعى سىنداردا تولايىم تابىستار تىلەدى. جادىرا ءوز كەزەگىندە قانداي جارىستاردا بولسىن، قولداۋ ءبىلدىرىپ، قاسىنان تابىلىپ جۇرگەن باپكەرىنە، تۋعان-تۋىستارىنا ريزاشىلىعىن جەتكىزدى.
مۇنان سوڭ ءسوز العان باپكەرى ابىلاي بوشقاي: «مەن جادىرانى بالا كۇنىنەن جاتتىقتىرىپ كەلەمىن. جادىرا وتە ەڭبەكقور قىز. جاتتىعۋلاردا بارىن سالادى. قانداي جاعدايدا بولسىن سالقىنقاندىلىق تانىتىپ جاتادى. ول دزيۋدو كۇرەسىنەن دە بىرقاتار جەتىستىكتەرگە قول جەتكىزدى. ەندى مىنە، سامبو كۇرەسىنەن دە ءوزىنىڭ الار ۇلەسى بار ەكەنىن ايگىلەپ وتىر. جاستار اراسىنداعى الەمدىك سىندا الدىمەن سەربيالىقتى، سوسىن قىرعىز سپورتشىسىن جارىس جولىنان شىعاردى. اقتىق سىندا رۋمىنيالىق سپورتشىمەن كەزدەستى. قارسىلاسىنا قارسى مىقتى دايىندىقپەن شىققان شاكىرتىم سوڭعى جيىرما سەكۋندتا جەڭىستى ج ۇلىپ الدى. بايراقتى باسەكەدە توپ جارۋ – وتە قيىن. جادىرانىڭ جەڭىسكە جەتكەنىنە قۋانىشتىمىن. بىزگە قولداۋ بىلدىرگەن بارلىق اعالارىمىزعا، جانكۇيەرلەرىمىزگە العىسىم شەكسىز»، – دەدى ول ويىمەن ءبولىسىپ.
تابيعات ابايلداەۆ، «اق جول».