سەربيانىڭ نوۆي-ساد قالاسىندا سامبودان جاستار اراسىندا الەم چەمپيوناتى وتكەن بولاتىن. ءتورت كۇنگە سوزىلعان ءدۇبىرلى دوداعا قازاقستان سپورتشىلارى دا قاتىسىپ، تولايىم تابىستارمەن ورالدى. الەم بىرىنشىلىگىندە ەل نامىسىن جامبىلدىق سپورتشىلار دا ابىرويمەن قورعاپ، تۋىمىزدى كوكتە جەلبىرەتتى.
جاستار اراسىنداعى الەم چەمپيوناتى – سپورتشى ءۇشىن ەڭ باستى باسەكەلەردىڭ ءبىرى سانالادى. دۋى باسىم دودادا قاتارىڭنان وزا شاۋىپ، شىن مىقتى ەكەنىڭدى ايگىلەۋ – زور جەتىستىك. ايتۋلى الامانعا اتتانعان جامبىلدىق سپورتشىلار وسى ۇستانىمدى كوكەيلەرىنە مىقتاپ قوندىرعان بولاتىن. ناتيجەسىندە ءوڭىر ساڭلاقتارىنا ەكى بىردەي جۇلدە بۇيىردى. اتاپ اتيساق، 52 كەلى سالماق دارەجەسىندە قىزدار اراسىندا توپقا تۇسكەن جادىرا امىرتاەۆانىڭ مەرەيى ۇستەم بولدى. سەربيا تورىندە ءوزىن جاقسى قىرىنان كورسەتىپ، جاسىنداي جارقىراعان ول قارسىلاستارىنىڭ بارلىعىن قاپى قالدىرىپ، التىننان القا تاعىندى. كوك تۋىمىزدى كوكتە جەلبىرەتكەن سپورتشىنىڭ اسقاق ارماندارى مەن الار اسۋلارى ءالى الدا ەكەنى انىق. سونىمەن قاتار، 56 كەلى سالماق دارەجەسىندە ەرلەر دوداسىنا ارالاسقان ەلنۇر سۇلەيمەن دە ءۇمىتىمىزدى اقتادى. جارتىلاي فينالعا دەيىن القىنباي جەتكەن ەلنۇر اقتىق سىنعا شىعا الماسا دا، قولا جۇلدەنى قورجىنىمىزعا سالدى.
وسىلايشا سەربيا ەلىندە وتكەن الەمدىك دودادان جامبىلدىق سپورتشىلار دا جاقسى ناتيجە كورسەتىپ، مەرەيىمىزدى تاسىتىپ ورالىپ وتىر. ساڭلاقتارىمىزعا الداعى جارىستاردا دا تەك قانا جەڭىستەر تىلەيمىز!
تابيعات ابايلداەۆ، «اق جول».