تاراز قالاسىنداعى №2 ارناۋلى الەۋمەتتىك قىزمەتتەر ۇسىنۋ ورتالىعىندا «قايىرىمدىلىق – جىلى جۇرەكتەن» اتتى سالتاناتتى شارا ءوتتى. بۇل ومىردەگى ەڭ يگى، ساۋاپتى ىستەردىڭ ءبىرى – مۇقتاج جاندارعا قامقورلىق جاساۋ دەسەك، اتالعان ورتالىقتان قىزمەت الۋشىلار ودان كەندە ەمەس. ولار مەملەكەتتىڭ قامقورلىعىنا الىنىپ، بارلىق جاعدايلارى جاسالعان. الايدا بۇل كونتسەرتتىك شارانىڭ ورنى ەرەكشە بولدى، ولاردىڭ كوڭىلدەرىن ءبىر سەرپىلىپ قالعانى جۇزدەرىنەن ايقىن اڭعارىلىپ تۇردى.
№2 ارناۋلى الەۋمەتتىك قىزمەتتەر ۇسىنۋ ورتالىعىنىڭ ديرەكتورى، «نۇر وتان» پارتياسى باستاۋىش ۇيىمىنىڭ ءتورايىمى گۇلجاۋھار قۇشانوۆا جينالعاندارعا ىزگى تىلەگىن ءبىلدىرىپ، وبلىس اكىمدىگىنىڭ دەنە شىنىقتىرۋ جانە سپورت باسقارماسىنىڭ ۇيىمداستىرۋىمەن وتكەن مۇمكىندىگى شەكتەۋلى تۇرعىندار اراسىنداعى سپارتاكيادادان جۇلدەلى ورىنعا يە بولعان ورتالىقتىڭ قىزمەت الۋشىلارىن ماراپاتتادى. ورتالىق قىزمەتكەرى ايگۇل رشىموۆا مەن ءىى توپتاعى مۇگەدەك سابيت ەسەباەۆتىڭ ورىنداعان «بولايىق بىرگە» ءانى، ۆلاديمير گريشيننىڭ جان سەزىمىنەن تۋىنداعان ولەڭدەرى، تاتيانا شۋميلوۆانىڭ «ۆاسيلەك» ءانى مۇگەدەك جانداردىڭ كوڭىلىن كوتەرىپ، اسەم اۋەنگە بيلەپ تە كەتتى. بىرىنەن كەيىن ءبىرى ەركىن سويلەگەن ارناۋلى الەۋمەتتىك قىزمەت الۋشىلار وزدەرىنە كوڭىل ءبولىنىپ، جاعداي جاسالىپ جاتقاندىعانا ريزا ەكەندىكتەرىن جەتكىزدى. ۇيلەرىنە كەتكەن كۇندە دە مۇنداعى قولايلى جاعدايعا ۇيرەنىپ قالعاندار قايتىپ ورتالىققا ورالىپ جاتادى ەكەن.
جالپى، بۇل ورتالىقتا ەلۋ قىزمەت الۋشى ورتالىق قىزمەتكەرلەرىنىڭ كومەگىمەن تاماقتانىپ، كۇندەلىكتى تۇرمىستىق داعدىلارىن ورىندايتىن بولسا، 103 جان وزدىگىنەن ءجۇرىپ-تۇرادى. ونىڭ ىشىندە 39-ى قازاق، 78-ءى ورىس، 36-سى وزگە ۇلت وكىلدەرى. ورتالىق الەۋمەتتىك-تۇرمىستىق، الەۋمەتتىك-مەديتسينالىق، الەۋمەتتىك-پسيحولوگيالىق، الەۋمەتتىك-ەڭبەك، الەۋمەتتىك-مادەني، الەۋمەتتىك-ەكونوميكالىق، الەۋمەتتىك-قۇقىقتىق باعىتتارى بويىنشا قىزمەتتەر كورسەتەدى.
شىنار ساعيەۆا،
«اق جول».