«نۇرلى جول»: مىندەتتەردى ورىنداۋعا بارلىق جاعداي بار

قازاقستان پرەزيدەنتى ينۆەستيتسيالار جانە دامۋ ءمينيسترى جەڭىس قاسىمبەكتى قابىلدادى.
كەزدەسۋدە نۇرسۇلتان نازارباەۆ ينۆەستيتسيالار جانە دامۋ مينيسترلىگىنە بەكىتىلگەن مەملەكەتتىك جانە سالالىق باعدارلامالاردى ىسكە اسىرۋدىڭ ماڭىزدىلىعىنا نازار اۋدارىپ، ولاردىڭ ورىندالۋىنىڭ ارالىق قورىتىندىلارى جونىندە ايتتى.
– يندۋستريالاندىرۋ باعدارلاماسى جۇزەگە اسىرىلعان جىلداردا 5،2 تريلليون تەڭگەنى قۇرايتىن 1060 جوبا ىسكە قوسىلدى. سونىڭ ارقاسىندا 100 مىڭنان استام جۇمىس ورنى اشىلدى. وسى باعدارلاما ىسكە اسىرىلعاننان بەرى جۇزەگە اسقان جوبالار 8 تريلليون تەڭگەنىڭ ءونىمىن بەردى. بۇل – ەلىمىز ءۇشىن اسا ماڭىزدى جەتىستىك. ءبىز بۇعان دەيىن وندىرىلمەگەن ءونىمنىڭ 500 ءتۇرىن شىعارامىز، – دەدى ەلباسى.
مەملەكەت باسشىسى «نۇرلى جول» ينفراقۇرىلىمدىق دامۋ باعدارلاماسىن جۇزەگە اسىرۋدىڭ ناتيجەلەرىنە نازار اۋداردى.
– 2010 جىلدان بەرى رەسپۋبليكالىق ماڭىزى بار 5 مىڭ شاقىرىم جولدىڭ قۇرىلىسى مەن قايتا جوندەۋ جۇمىستارى جۇرگىزىلدى. 2020 جىلعا دەيىن تاعى 4500 شاقىرىم جول ىسكە قوسىلادى. قازىر رەسپۋبليكالىق اۆتوموبيل جولدارىنىڭ 85 پايىزى جاقسى كۇيدە. باتىس ەۋروپا – باتىس قىتاي جوباسى جانە استانا – تەمىرتاۋ، الماتى – قاپشاعاي، بەينەۋ – شەتپە، كوكشەتاۋ – پەتروپاۆل باعىتتارى بويىنشا جولدار پايدالانۋعا بەرىلدى. سونداي-اق، ەرتىس وزەنى ارقىلى وتەتىن ورتالىق ازياداعى ەڭ ءىرى كوپىر سالىندى. وسى جوبالاردى ىسكە اسىرۋعا 75 مىڭ ادام تارتىلدى. بۇل رەتتە، بارلىق قۇرىلىس ماتەريالدارىنىڭ 90 پايىزى قازاقستاندا جاسالعان، – دەدى نۇرسۇلتان نازارباەۆ.
سونىمەن بىرگە، قازاقستان پرەزيدەنتى «قۇرىق» تەڭىز پورتى مەن «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ ەكونوميكالىق ماڭىزدىلىعىن اتاپ ءوتتى.
بۇدان بولەك، ەلباسى «نۇرلى جەر» باعدارلاماسىنىڭ ىسكە اسىرىلۋ ناتيجەلەرىنە توقتالىپ، ونىڭ اياسىندا 10 ميلليون شارشى مەتردەن استام تۇرعىن ءۇي سالىنعانىن ايتتى.
– 9 وبلىستا تۇرعىن ءۇي قۇرىلىسى جۇرگىزىلىپ جاتىر. بارلىق باعدارلامالار حالىقتىڭ تۇرمىسىن جاقسارتۋعا ارنالعان. جيناقتاعانىمىزدىڭ ءبارىن قازاقستاندىقتاردىڭ ءال-اۋقاتىن ارتتىرۋعا باعىتتادىق، – دەدى مەملەكەت باسشىسى.
سونداي-اق، قازاقستان پرەزيدەنتى مينيسترلىكتىڭ باسشىلىعى تاراپىنان ەرەكشە ءمان بەرۋدى قاجەت ەتەتىن جەكەلەگەن ماسەلەلەرگە توقتالدى.
– يندۋستريالاندىرۋ جونىندەگى مەملەكەتتىك باعدارلاما ءالى دە ەكونوميكامىزدىڭ ارتاراپتىعىن قامتاماسىز ەتە الماي وتىر. وڭدەۋ ونەركاسىبىنىڭ ىشكى جالپى ونىمدەگى ۇلەسى ايتارلىقتاي وزگەرگەن جوق. جالپى، قويىلعان مىندەتتەردى ورىنداۋعا قاجەتتى بارلىق جاعداي بار. ءسىز ەكونوميكالىق جانە الەۋمەتتىك باسىمدىقتاردى ىسكە اسىرۋعا تولىق جاۋاپتىسىز، – دەدى نۇرسۇلتان نازارباەۆ.
مەملەكەت باسشىسى ەلىمىزدى ودان ءارى دامىتىپ، قازاقستان حالقىنىڭ ءال-اۋقاتىن ارتتىرۋعا باعىتتالعان بارلىق باعدارلامالاردى ىسكە اسىرۋدىڭ ماڭىزدىلىعىن اتاپ ءوتتى.
سوڭىندا ەلباسى بىرقاتار ناقتى تاپسىرما بەردى.

Leave a Reply

Your email address will not be published. Required fields are marked *

*