ءسۇيىنشى! ومىرگە ۇشەم كەلدى!

بيىلعى جىلدىڭ 9 ايىندا 4910 ايەل بوسانىپ، ونىڭ
109-ى ەگىز تاپتى. ەكى انا ۇشەم تۋدى. ايدانا – ءۇشىنشى ۇشەمنىڭ اناسى

ومىرگە ۇشەم كەلدى! قانداي قۋانىشتى حابار ەدى. جاعىمدى جاڭالىقتى ەستي سالا وبلىستىق پەريناتالدىق ورتالىعىنا قۇستاي ۇشقانبىز. ەلباسى قامقورلىعىمەن سالىنعان اۋماعى وتە ۇلكەن عيماراتتى شىر كوبەلەك اينالىپ ءجۇرمىز. ءبىر كەزدە قىزىل-جاسىل شارعا ورانعان ەكى جەڭىل اۆتوكولىكتى كوزىمىز شالدى. اينالاسى ادامعا تولى. جاقىنداعاندا بايقادىق، كولىكتەردىڭ تەرەزەسىنە «قوش كەلدىڭدەر، حانىمدار!» دەگەن ۇلكەن جازۋ جازىلعان ەكەن. «حانىمدار وسى جەردە مە؟» دەپ جاتىرمىز. «ءيا، ءدال كەلدىڭىزدەر!» دەپ كوڭىلدەرى قۋانىشقا تولى ازاماتتار جارىسا جاۋاپ بەردى.
سابيلەردىڭ اتاسى دا، اجەسى دە وسىندا. الدىمەن اۋلەتتىڭ باسشىسى جىلقىباي قىرباسوۆتى قۇتتىقتادىق.
«وتە قۋانىشتىمىن. بايزاق اۋدانى، سارىكەمەر اۋىلىندا تۇرامىز. قۇدايدىڭ بەرگەنى عوي، بەس ۇل-قىزىم بار. بيىلعى جىلدىڭ قاڭتار ايىندا وتاۋ قۇرعان كەنجە بالامنىڭ شاڭىراعىندا ۇشەم ومىرگە كەلىپ وتىر. وسى كەزگە دەيىن دە بۇيىرعان نەمەرەم بار ەدى، اللاعا شۇكىر ەندى 25 نەمەرەلى بولدىق. اپاسىنىڭ سۇراپ بىلۋىنشە سابيلەردىڭ دەنساۋلىعى جاقسى. بۇدان اسقان قۋانىش بولمايتىن شىعار. مەملەكەتى­مىزدىڭ مۇمكىن­دىگىمەن سالىنعان وسىناۋ ءىرى ورتالىقتىڭ قىزمەتىنە ريزامىن»، – دەدى ول.
ۇشەمنىڭ اجەسى كەنجەكۇل قىرباسوۆا دا قۋانىپ، قۇستاي ۇشىپ ءجۇر. جاستاۋ كەزىندە بۇل كىسى دە ومىرگە ەگىز پەرزەنت اكەلگەن ەكەن. سوندىقتان كەلىنىنىڭ جانىن تۇسىنەتىنى بايقالىپ تۇر. ال ۇشەمنىڭ اكەسى دۋلات قىرباسوۆتىڭ قۋانىشتان ەسى شىعىپ كەتىپتى. قۋانىشتان ءجۇزى بال-بۇل جانىپ تۇر.
«ءبىز ۇزاق جىلدان بەرى بال اراسىن وسىرۋمەن شۇعىلدانىپ كەلەمىز. اكەم دە وسى سالادا، جەكە كاسىپكەر. جىل باسىندا شاڭىراق كوتەرگەنمىن. مىنە، اللا بۇيىرتىپ بىردەن ءۇش قىزعا اكە بولدىم. شاتتىقتان، باقىتتان باسىم اينالىپ تۇر. ماعان، اۋلەتىمىزگە قۋانىش سىيلاعان جارىم ايداناعا وتە ريزامىن. وسى ورتالىقتا ايداناعا بارلىق جاعدايىن جاساپ، قاراعان باس دارىگەر ايگۇل ايتباەۆاعا، قاتارداعى دارىگەر ەلميرا مۇستافاەۆاعا العىسىم شەكسىز. نارەستەلەردىڭ دەنساۋلىعى قازىر قالىپتى. سابيلەرىمنىڭ ەسىمدەرىن ۇلكەندەرمەن كەڭەسىپ، سايانا، رايانا، دايانا دەپ قويىپ وتىرمىز. ەگىزدەر ءبىزدىڭ اۋلەتىمىزدە دە بولعان. كەلىنشەگىم جاقتا دا بار ەكەن. ايدانانىڭ ناعاشى اپاسى تورتەمنەن (4 بالانى بىردەن) ەكى رەت بوسانىپ، 8 بالانى ومىرگە اكەلگەنىنەن حاباردارمىز. بۇل جاعدايدى بايزاق اۋداندىق اكىمدىگى دە ەستىپ جاتىر. قۇتتىقتاپ، قولداۋ تانىتادى دەگەن ۇمىتتەمىن. وسىندا كەلىپ قۋانىشىمىزدى بولىسكەن بارلىق كىسىلەرگە، باق وكىلدەرىنە العىسىمدى بىلدىرەمىن»، – دەدى جاس اكە.
ۇشەمنىڭ اناسى ايدانا قابىلبەكقىزىنىڭ جۇزىنەن شەكسىز باقىت كوردىك. سابيلەردىڭ جاعدايىنا بايلانىستى ول باق وكىلدەرىمەن سۇحباتتاسا المادى. الايدا، ەلىمىزدىڭ دەموگرافياسىن دامىتىپ، ءۇش ءسابي سىيلاپ وتىر ەمەس پە؟ وعان باقىتتى باتىر اناسىڭ دەپ ريزا بولدىق. ايدانا – جۋالى اۋدانى، قاراساز اۋىلىنىڭ قىزى ەكەن.
ورتالىقتىڭ باس دارىگەرى ايگۇل ايتباەۆا دا بىزبەنەن وي ءبولىستى.
«ومىرگە ۇشەم كەلىپ جاتقانىنا ءبىز دە وتە قۋانىشتىمىز. ءبىرىنشى بوسانۋى بولعاندىقتان جاس انانى قولدان بوساندىردىق. قازىرگى تاڭدا ايدانا تولەتاەۆانىڭ دەنساۋلىعى جاقسى، سابيلەردىڭ دە دەنساۋلىعى قالىپتى. ورتالىقتا بيىلعى جىلدىڭ 9 ايىندا 4910 ايەل بوساندى. سونىڭ ىشىندە 109-ى ەگىز بالانى ومىرگە اكەلدى. ەكى ايەل ۇشەم تۋدى. ايدانا – ءۇشىنشى ۇشەمنىڭ اناسى. انالارىمىز بەن سابيلەرىمىز اۋىرماسىن، امان بولسىن، – دەدى باس دارىگەر.
…ۇشەمنىڭ قۋانىشىن بولىسكەن جۇرت سارىكەمەردى بەتكە الدى. سارىكەمەردە سابيلەر قۋانىشى! ومارتاشىلار وتباسىندا توي! ارانىڭ بالىن جيناعان اۋلەت بالانىڭ ءبارىن اياقتاندىرىپ، بالدان ءتاتتى نەمەرەنىڭ قىزىعىنا كەنەلۋدە.
قۋانىش ۇزاعىنان بولعاي!

سۋرەتتى تۇسىرگەن
اقادىل رىسماحان.

Leave a Reply

Your email address will not be published. Required fields are marked *

*