اق جول جامبىل وبلىستىق قوعامدىق- ساياسي گازەت
جامبىل وبلىسى قاراتاۋ قالاسىنداعى جيىرما التى جاسار انا ۋليانا رومانقىزى كيم ون بالانى باعىپ وتىر دەپ جازادى اقجول باسىلىمى.
جاپ-جاس ورىس كەلىنشەگى شۇپىرلەگەن جاس وسكىندەردىڭ اسىراۋشىسى ءارى اناسى، ال بارىنە باس-كوز بولىپ جۇرگەن ۋليانانىڭ ەنەسى، بالاقايلاردىڭ اجەسى – نادەجدا گەنحۆانقىزى كيم دەپ جازادى باسىلىم.
«كەلىنىم بالالار ۇيىندە وسكەن. اتا-انانىڭ جوقتىعىنىڭ تاقسىرەتىن ابدەن تارتقان. جۇرەگى جۇمساق، جانى نازىك. جەتىم كورسە – جەبەپ، جان شۋاعىن توككىسى كەلىپ تۇرادى. ۋليانانىڭ ءوزى ۇشەۋ تۋدى. بالام ۆالەنتين وڭتۇستىك كورەيا مەملەكەتىندە جۇمىس ىستەپ جاتىر. جازعا سالىم كەلىپ، تۇرمىسىمىزدى كورىپ كەتەدى. نە كەرەك كەلىنىم جەتىم بالالاردى قامقورلىعىمىزعا الايىق دەدى. ءبىز قارسىلىق جاساعان جوقپىز»، — دەيدى ەنەسى كەلىنىن ماقتاپ.
ۋليانانىڭ بالالاردى اسىراپ الۋىنا ونىڭ ءوز باسىنان وتكەرگەن جاعدايى سەبەپكەر بولعان.
ء«اربىر ءسابي اتا-انا مەيىرىمىن اڭسايدى. بالالار ۇيىندە جىلى-جۇمساق جەپ وتىرسا دا، ايالى الاقاندى، ءوز ءۇيى بولعانىن اڭسايدى. ءوزىم دە سونداي ءساتتى باسىمنان وتكەردىم ەمەس پە؟!»، — دەيدى ۋليانا.
وسىلاي دەپ جاس كەلىنشەك كوزىنە جاس الدى.
ءسويتىپ جاس كەلىنشەك ەنەسى ەكەۋى اۋەلى مەركىدەگى ساۆۆا، كەيىن ونداعى بالالار ءۇيى جابىلعان سوڭ تاراز قالاسىنداعى سارمولداەۆ اتىنداعى بالالار ءۇيىن جاعالاپ، قامقورلىققا بالا اسىراپ الۋعا نيەت ەتكەن. سودان بەرى، ءتيىستى ۇيىمداردىڭ كەلىسىمىمەن 5 بالانى اسىراپ، باعىپ وتىرعان جاعدايلارى بار. ونىڭ ۇستىنە، قاراتاۋ قالاسىنان اتا-انا قاراۋىنسىز قالعان 3 قىز جازعى دەمالىستارىندا (ولار كوللەدجدە وقيدى) كەلىپ، وسى ءۇيدى پانالايدى ەكەن. سەگىز بالامەن بىرگە ءوزىنىڭ ۇل-قىزى مەن جيەنىنىڭ ءۇش بالاسى دا شاڭىراقتىڭ شاتتىعىنا اينالعان.
ۋليانانىڭ «ۇلكەندەرى» نينا پەتروۆنا الماتىدا كوللەدجدە ستيليست-مودەلەر ماماندىعىنا ماشىقتانۋدا، جاز شىعا تۋعان ۇيىنە اسىعادى ول. ال الەكساندر – 9، اننا – 7، پەتر 5-سىنىپتا، اناتولي العاشقى دايىندىق سىنىبىندا وقيدى. ءبارى دە قالاداعى كارل ماركس اتىنداعى ورتا مەكتەپتە ءبىلىم الىپ ءجۇر. ۆيكتوريا، سۆەتلانا، ليۋبوۆتار – قالاداعى كوللەدج بىلىمگەرلەرى. باۋىرداي بولىپ كەتكەن ءۇش قىز دا جازعى دەمالىستارىندا كيم وتباسىن پانالايدى.
«بەس بالاعا ۇكىمەت 106 مىڭ تەڭ جاردەماقى تاعايىنداعان. قۇدايعا شۇكىر، كيىمىمىز ءبۇتىن، تاماعىمىز توق»، – دەيدى ۋليانا.
ال جاس انانىڭ ەنەسى ءوز تىلەگىندە ءاربىر قازاقستاندىق سول بالالاردى اسىراپ السا، ەلىمىزدە جەتىم بولماسا دەگەن تىلەگىن ايتتى.
«بالالار ۇيىنە بارعان سايىن كوزدەرى مۇڭعا تولى بالالاردى كورىپ جۇرەگىم قارس ايىرىلادى. مەيىرىمدى جاندار تابىلىپ، سولاردى اسىراپ السا عوي، جەتىم دەگەن بولماسا عوي دەپ تىلەيمىن. «شىركىن-اي» دەگەننەن باسقا ەشتەڭە ايتا المادىم. كوز الدىما دۇنيەگە كەلگەن سابيلەرىن قوقىسقا زاتتاي لاقتىرا سالاتىن كوكەك انالار ەلەستەپ، قامىعىپ قالدىم. سولار، كيم اۋلەتىنەن ۇلگى الىپ جاتسا، قانەكي.
«بالالى ءۇي – بازار» دەگەنىمىز سول ەمەس پە؟!»، — دەپ ءسوزىن تۇيىندەدى نادەجدا كيم.