نازارباەۆ: ايەلدەر — مەنىڭ باستى تىرەگىم

قازاقستان پرەزيدەنتى نۇرسۇلتان نازارباەۆ 8 ناۋرىز قارساڭىندا ايەلدەرمەن «كوكتەم شۋاعى» اتتى ءداستۇرلى كەزدەسۋىن وتكىزدى، — دەپ حابارلايدى Tengriews.kz تىلشىسى اقورداعا سىلتەمە جاساپ.

نازارباەۆ قازاقستان ايەلدەرىن حالىقارالىق ايەلدەر كۇنىمەن قۇتتىقتادى. مەملەكەت باسشىسى ەلىمىزدىڭ قالىپتاسۋىنا قوسقان ماڭىزدى ءرولىن اتاپ ءوتىپ، ولارعا دەنساۋلىق، ماحاببات، وتباسى باقىتىن جانە ساتتىلىك تىلەدى.

قازاقستان پرەزيدەنتى بۇل جولعى كەزدەسۋدە ءتۇرلى ماماندىق وكىلدەرىنىڭ قاتىسىپ وتىرعانىنا نازار اۋداردى.

«سىزدەردىڭ ارالارىڭىزدا كوپبالالارى انالار، بيزنەس وكىلدەرى، اسكەريلەر، عالىمدار، دارىگەرلەر، پەداگوگتار، مادەنيەت جانە سپورت قايراتكەرلەر، جۋرناليستەر بار. ايەلدەر تاۋەلسىزدىكتىڭ بارلىق جىلىندا مەنىڭ سەنىمدى تىرەگىم بولدى. ءبىزدىڭ 25 جىلداعى جەتىستىكتەرىمىز سىزدەردىڭ بەلسەندى ەڭبەكتەرىڭىزدىڭ ارقاسىندا. سىزدەر — قوعامىمىزداعى بىرلىكتىڭ، جاسامپازدىقتىڭ جانە تۇراقتىلىقتىڭ بەينەسىسىزدەر»، — دەدى مەملەكەت باسشىسى.

قازاقستان پرەزيدەنتى ايەلدەردىڭ باستى مىندەتى انا بولۋ ەكەنىن اتاپ ءوتتى.

«جاستايىنان اناسىنىڭ ماحابباتى مەن تاربيەسىن العان بالا عانا جاقسى ازامات بولىپ ءوسىپ، باقۋاتتى ءومىر سۇرەدى. 25 جىل ىشىندە 7 ميلليون كىشكەنتاي قازاقستاندىق ومىرگە كەلدى. ءبىزدىڭ ەلدە ءبىر ساعاتتا 45 بالا نەمەسە جىلىنا 400 مىڭ بالا ومىرگە كەلەدى. مۇنىڭ بارلىعى ەرتەڭگى كۇنگە دەگەن سەنىمنىڭ ارقاسىندا. جاڭا ۇرپاق — قازاقستاننىڭ بولاشاعى. بيىل مەن قازاقستانداعى بالالاردىڭ قۇقىعى جونىندەگى وكىلدىگى تۋرالى جارلىققا قول قويدىم، بۇل بالالاردىڭ قاۋىپسىزدىگىنىڭ كەپىلى. وتباسى كۇنىن تويلاۋ مەن «مەرەيلى وتباسى» جالپىۇلتتىق كونكۋرسىن وتكىزۋ داستۇرگە اينالدى»، — دەدى نۇرسۇلتان نازارباەۆ.