اق جول جامبىل وبلىستىق قوعامدىق- ساياسي گازەت
بقو پروكۋرورلارى بالالاردىڭ تويدا ونەر كورسەتۋىنەن باس تارتۋعا شاقىردى، — دەپ حابارلايدى Tengrinews.kz تىلشىسى «موي گورود» باسىلىمىنا سىلتەمە جاساپ.
بقو پروكۋرورىنىڭ كومەكشىسى الماگۇل سماعۇلوۆانىڭ ايتۋىنشا، بالالاردىڭ ۇيلەنۋ تويلارىندا، مەرەيتويلاردا ونەر كورسەتۋلەرى دۇرىس ەمەس. سەبەبى ولاردىڭ جارتىلاي جالاڭاش كۇيدە ونەر كورسەتۋلەرى كامەلەت جاسقا تولماعاندارعا جىنىستىق ماندە قول سۇعۋشىلىق تۇرىندە جاسالعان قىلمىستاردىڭ ارتۋىنا اكەپ سوعىپ وتىر.
«2012 جىلى مۇنداي قىلمىستاردىڭ 12-ءسى تىركەلدى، ال 2015 جىلى ونىڭ سانى 52 دەرەككە دەيىن ارتتى جانە بيىل ەكى ايدىڭ ىشىندە 10 قىلمىس تىركەلىپ ۇلگەردى. مۇنداي قىلمىستاردىڭ الدىن الۋ ءۇشىن ولاردى زەرتتەپ، سەبەپتەرىن انىقتاۋ جۇمىستارى جۇرگىزىلدى. سونىمەن قاتار، بىرقاتار پسيحولوگيالىق زەرتتەۋلەردىڭ ناتيجەسى قۇربانى قالىپتاسپايىنشا، پەدوفيلدەردىڭ قالىپتاسپايتىنىن انىقتاپ بەرىپ وتىر»، — دەدى سماعۇلوۆا.
ونىڭ ايتۋىنا قاراعاندا، جارتىلاي جالاڭاش كيىنىپ، بەتتەرىن بوياپ، ۇلكەن ساحناعا شىققان بالالار كوپشىلىكتىڭ ورتاسىندا جۇرەدى جانە ولاردىڭ بيلەرىنىڭ كەيبىرى ادامداردى ازعىرادى.
«بۇل شارالار تۇنگى ۋاقىتتا وتكىزىلەدى، قوناقتار كوڭىل كوتەرۋ ءۇشىن بالالار شاقىرىلىپ، ولار بي بيلەيدى. بالالاردىڭ ونداي ورىنداردا ءجۇرۋى دۇرىس ەمەس. ول جەرلەردە سالاۋاتتى ءومىر سالتى ساقتالمايدى. جالپى، شىعىس بيلەرىنىڭ تاريحىنا ۇڭىلەتىن بولساق، ونى ايەلدەر كۇيەۋلەرى ءۇشىن ورىندايدى. قىزداردىڭ كوپشىلىك الدىندا جارتىلاي جالاڭاش كۇيدە بيلەگەنى قاجەت ەمەس «، — دەدى ول.
ايتا كەتەيىك، بالالاردىڭ تۇنگى ساعات 22.00-دەن كەيىن ونداي جەرلەردە اتا-اناسىنىڭ قاراۋىنسىز جۇرگەنى ءۇشىن قۇقىق قورعاۋ ورگاندارى ەرەسەكتەردى اكىمشىلىك جاۋاپكەرلىككە تارتا الادى.