استانا تورىندە وتەتىن حالىقارالىق كورمەگە جول تارتادى

جامبىلدىڭ بىلىكتى، ىزدەنىمپاز جاستارىنىڭ تىڭ جوبالارىمەن دۇنيەگە كەلگەن ەرەكشە قۇرىلعىلار مەن قولدانىستا تاپتىرمايتىن قۇرال-سايماندار كورمەسى م.ح.دۋلاتي اتىنداعى تارمۋ-دىڭ م.ۇركىمباەۆ اتىنداعى «جاستار سارايىندا» كوپشىلىك نازارىنا ۇسىنىلدى.
وبلىس اكىمدىگىنىڭ جاستار ساياساتى ماسەلەلەرى باسقارماسىنىڭ ۇيىمداستىرۋىمەن وتكەن «ەحرو – 2017 – جاستار كوزىمەن» دەپ اتالاتىن يننوۆاتسيالىق جوبالار كورمەسىنە، شىن مانىندە، قىزىقتى دۇنيەلەر قويىلدى. جاستاردىڭ عىلىمي الەۋەتى مەن شىعارماشىلىق بەلسەندىلىگىن دامىتۋعا باعىتتالعان كورمە ەلىمىزدىڭ «جاسىل ەكونوميكاعا» كوشۋ باعىتىنداعى قارىشتى قادامدارىنىڭ ءبىرى جانە ءداستۇرلى ەمەس ەنەرگيا كوزدەرى تاقىرىبىنا ارنالعان يننوۆاتسيالىق جوبالاردىڭ كورمەسىنە ىرىكتەۋ كەزەڭى رەتىندە ۇيىمداستىرىلعان شاراعا قاتىسۋعا قىزىعۋشىلىق تانىتقاندار كوپ بولعان ەكەن. بارلىعى 35 جوبانىڭ ىشىنەن ىرىكتەلگەن 23-ءى اتالعان شاراعا قاتىستىرىلعان. وندا «ۇزدىك كورمە ەكسپوناتى»، «ۇزدىك يننوۆاتسيالىق جوبا» اتالىمدارى بويىنشا ون ءتورت پەن وتىز بەس جاس ارالىعىنداعى جاستار قاتىستى. ولار ۇسىنعان ەڭبەكتەردىڭ ىشىنەن «زاماناۋي كومپرەسسور جانە مۇناي ايداۋ بەكەتتەرى»، «جەل ەنەرگەتيكالىق قوندىرعىسى»، «قولجەتىمدى دايىن باسپانا»، «وسىمدىك قالدىقتارىنان بيوەتانول ءوندىرۋ»، «اۋىلدىق جەرلەردە التەرناتيۆتى ەنەرگيا كوزدەرىن قولدانۋ»، «يون» اپپاراتىن جاساۋ»، «كۇننىڭ ەنەرگياسىن پايدالانا وتىرىپ، جىلىجايدا بانان ءوسىرۋ»، «تۇرعىن ءۇي عيماراتتارىنىڭ ەلەكتر تارتىلىمدارى مەن جارىقتاندىرىلۋى»، «قانت ديابەتىمەن اۋىراتىن ناۋقاستارعا ارنالعان ورتوپەدتىك ونىمدەر جانە جايلى اياق كيىم جاساۋ»، «دالا جاعدايىندا ءورت سوندىرۋگە ارنالعان روتورلى توپىراق لاقتىرعىش ماشينا»، «اۋىل شارۋاشىلىعى قالدىقتارىنان بيوگاز وندىرۋگە ارنالعان جەراستى ەنەرگيا ۇنىمدەۋشى بيوەنەرگەتيكالىق كەشەن»، «لاس سۋلاردى تازالاۋعا ارنالعان فيلتراتسيكلون»، «كۇن ەنەرگياسى جانە پيرامي­دانىڭ قاسيەتتەرى» اتتى جوبالار ءساتتى قورعالدى.
استانا تورىندە وتەتىن حالىقارالىق كورمەنى قولداۋ مەن حالىق اراسىندا كەڭىنەن ناسيحاتتاۋ، وبلىس جاستارىنىڭ عىلىمعا قىزىعۋشىلىعىن ارتتىرۋ جانە يننوۆاتسيالىق يدەيالار مەن جاستار اراسىنداعى ۇزدىك يننوۆاتورلاردى انىقتاۋ، تالانتتى جاستارعا باعىت-باعدار بەرۋ مەن جاس عالىمدار اراسىندا تاجىريبە مەن وي-پىكىر الماسۋدى ۇيىمداستىرۋدى ماقسات ەتكەن كورمە ءوز ۇدەسىنەن شىقتى.
جوعارى وقۋ ورىندارى مەن عىلىمي ورتالىق قىزمەتكەرلەرى، عالىمدار جاستاردىڭ ۇسىنعان جوبالارىنا جوعارى باعا بەرىپ، باستامالارىنىڭ باياندى بولاتىنىنا سەنىم ءبىلدىردى.
– بۇل كورمەنى ۇيىم­داستىرۋداعى باستى ماقسات – «استانا ەكسپو – 2017» حالىقارالىق ارنايىلاندىرىلعان كورمەسىنە وبلىس اتىنان ۇسىنىلاتىن ۇزدىك جوبانى ىرىكتەۋ بولىپ تابىلادى، – دەدى وبلىس اكىمدىگىنىڭ جاستار ساياساتى ماسەلەلەرى باسقارماسىنىڭ باسشىسى ەركەبۇلان قۇرالباەۆ.

مارجان راقاي،
«اق جول».