ادامزات تاريحىنداعى ەڭ جويقىن سوعىستىڭ وتكەنىنە 70 جىل تولدى. سول سۇراپىل سوعىستى باستان وتكەرگەن مايدانگەرلەرگە قانداي قۇرمەت جاساساق تا جاراسادى. ولار قيىن-قىستاۋ كۇندەرى قولىنا قارۋ الىپ، وتانىن قورعاپ، ەل مەن جەردى ءسۇيۋدىڭ اسقان ۇلگىسىن كورسەتتى.  بۇل – كەيىنگى ۇرپاق ءۇشىن ۇمىتىلماس ساباق.

وتان قورعاۋعا جانىن شۇبەرەككە ءتۇيىپ اتتانعان ەرلەردىڭ قاتارىندا ناعاشى اتام تولەۋقۇل بايداليەۆ تە بولدى. سوعىس باستالعان مەزەتتە ول كىسى اسكەر قاتارىندا ەكەن. اسكەري قولباسشى، گەنەرال-پولكوۆنيك چايكوۆتىڭ 8 گۆارديالىق اسكەرىنىڭ قۇرامىندا ۇرىسقا كىرەدى. ماسكەۋگە دەيىن ەنتەلەپ جەتكەن جاۋ اسكەرىنە قارسى تۇرىپ، ستالينگراد مايدانىندا قيان-كەسكى ۇرىستاردى باستان كەشەدى. ۆارشاۆا، پراگا قالالارىن باسقىنشىلاردان ازات ەتىسىپ، جەڭىستى بەرليندە قارسى الادى. ءتورت جىل بويى قولىنان قارۋىن تاستاماي جاۋمەن ايانباي ايقاسقان اتام مايدانداعى ەرلىگى ءۇشىن ءىىى دارەجەلى «داڭق» وردەنى مەن «بەرليندى العانى ءۇشىن»، «كەنيگسبەرگتى العانى ءۇشىن»، «ەرلىگى ءۇشىن» جاۋىنگەرلىك مەدالدارىمەن ماراپاتتالعان. نەمىس-فاشيستەردى ۇياسىندا تالقانداعان كەڭەس اسكەرلەرى ءۇشىن ەندى ولاردىڭ وداقتاسى جاپونيادا سوعىس كۇتىپ تۇر ەدى. از عانا ۋاقىتقا سوزىلعان بۇل سوعىسقا دا قاتىسقان اتام 1947 جىلى تۋعان اۋىلى شولاققايىڭدىعا امان-ساۋ ورالادى. مايداننان ورالعان اتام كولحوزدىڭ سان-سالالى تىرلىگىنە بەل شەشە ارالاسىپ، قۇرىلىس سالاسىندا ەڭبەك ەتەدى. اۋدانداعى ءىرى شارۋاشىلىقتىڭ ءبىرى جامبىل اتىنداعى ۇجىمشاردا ۇزاق جىل №3 كومپلەكستى ءوندىرىس بريگاداسىنىڭ بريگادير قىزمەتىن اتقاردى.
مايداندا دا، بەيبىت ومىردە دە ابىرويمەن ءومىر سۇرگەن اتامىز اجەم پانۋرامەن ۇزاق جىل وتاسىپ، باقىتتى عۇمىر كەشتى. ون ۇل-قىزدى ءومىر كوشىنە قوستى. بۇگىندە وسى ۇرپاعىنان تاراعان نەمەرە، شوبەرەلەرى ءبىر قاۋىم ەل بولدى. ۇلى جەڭىستىڭ 70 جىلدىق مەرەكەسىندە وتان ءۇشىن وت كەشكەن مايدانگەر اتامىزدىڭ رۋحىنا باس ءيىپ، وسىناۋ بەيبىت ءومىردى سىيلاعان بارشا مايدانگەرلەرگە العىسىمىز شەكسىز.

بانۋ ءپىرنازاروۆا،
مايدانگەردىڭ ۇرپاعى، مەكتەپ وقۋشىسى.

ت.رىسقۇلوۆ اۋدانى.