اق جول جامبىل وبلىستىق قوعامدىق- ساياسي گازەت
«كوليوسا» پورتالىندا قازاقستاندا 2015 جىلدىڭ اقپان ايىندا ەڭ كوپ ساتىلعان 10 كولىكتىڭ ءتىزىمى جاريالاندى، — دەپ حابارلايدى Tengrinews.kz.
پورتالدىڭ مالىمەتىنشە، وتكەن ايدا ەڭ كوپ ساتىلعان كولىك - LADA Granta. قاڭتار ايىندا مۇنداي ماركالى كولىكتەردىڭ 910-ى ساتىلسا، اقپان ايىندا 1205-ءى ساتىلعان. ەكىنشى ورىندا - Hyundai Accent، اقپان ايىندا ونىڭ 1103-ءى جاڭا قوجايىندارىن تاپتى. ال ءۇشىنشى ورىندا LADA Largus تۇر، ساتىلعان كولىكتەردىڭ سانى — 909.
ءتىزىمنىڭ ودان كەيىنگى ورىندارىندا LADA Priora، Kia Rio، LADA Kalina، Volkswagen Polo Sedan، Hyundai Elantra، Toyota Corolla مەن Renault Logan اۆتوكولىكتەرى تۇر. ەڭ كوپ ساتىلعان كولىكتەر تۋرالى تولىق ماعلۇماتتى مىنا جەردەن كورۋگە بولادى.
جالپى، اقپان ايىندا كولىك ساۋداسى ەلىمىزدە 18 پايىزعا ارتقان. ىشكى ىستەر مينيسترلىگىنىڭ مالىمەتىنشە، قازاقستاندىقتار اقپان ايىندا 30 مىڭعا جۋىق اۆتوكولىكتى ساتىپ الىپتى، بۇل قاڭتار ايىمەن سالىستىرعاندا 9 مىڭ اۆتوكولىككە ارتىق. ماماندار اۆتوكولىك نارىعىنداعى مۇنداي جوعارى كورسەتكىشتى ديلەرلىك ورتالىقتاردىڭ ۇيىمداستىرعان جەڭىلدىكتەرىمەن بايلانىستىرىپ وتىر.
«قازاقستاندىق اۆتوبيزنەس قاۋىمداستىعى ماماندارىنىڭ ايتۋىنشا، رەسمي سەكتورداعى ساتىلىمنىڭ كۇرت ءوسۋى ديلەرلىك ورتالىقتاردىڭ كوپشىلىگىندەگى 10-نان 50 پايىزعا دەيىنگى جەڭىلدىكتەرمەن بايلانىستى. سونىڭ ناتيجەسىندە، جەڭىل اۆتوكولىكتەردىڭ اقپان ايىنداعى ورتاشا قۇنى 25 384 دوللاردان (قاڭتار) 18 817 دوللارعا دەيىن ءتۇستى. باعانىڭ تومەندەۋىنەن بولەك، بىرنەشە جىلعا تەگىن قىزمەت كورسەتۋ مەن ءنول پايىزدىق مولشەرلەمەمەن ءبولىپ تولەۋ ساتىپ الۋشىلاردى وزىنە تارتىپ وتىر»، — دەلىنگەن جاريالانىمدا.
اقپارات كوزى tengrinews.kz