اق جول جامبىل وبلىستىق قوعامدىق- ساياسي گازەت
قازاقستان رەسپۋبليكاسى پارلامەنتى سەناتىنىڭ توراعاسى قاسىم- جومارت توقاەۆتان گازەتىمىزگە حات كەلدى. توراعا وز حاتىندا «اق جول» گازەتىنىڭ 17 اقپان (2015 جىل، №20) سەيسەنبى كۇنى «جەڭىسكە – 70 جىل» ايدارىمەن
جاريالانعان «جاۋىنگەر، جازۋشى كەمەل توقاەۆ قالامىنىڭ قارىمى
جامبىل ءوڭىرى تاريحىندا» اتتى ماقالانى تولىق وقىپ شىققانىن ايتا كەلىپ، ۇجىمىمىزعا شىعارماشىلىق تابىستار تىلەپتى.
«اق جول» گازەتىنىڭ باس رەداكتورى
ك. ءساتتىباي ۇلىنا
قۇرمەتتى كوسەمالى ءساتتىباي ۇلى!
كورنەكتى جازۋشى، قازاق ادەبيەتىندەگى شىتىرمان وقيعا جانرىنىڭ نەگىزىن قالاۋشى، ۇلى وتان سوعىسىنىڭ ارداگەرى كەمەل توقاەۆ تۋرالى «اق جول» گازەتىندە جارىق كورگەن ماقالاڭىزبەن تولىق تانىسىپ شىقتىم. اكەم
كەمەل توقاەۆتىڭ ەڭبەك جولىنا ىزدەنىس جاساپ، قۇندى دەرەكتەردى گازەت بەتىنە جاريالاعانىڭىز ءۇشىن سىزگە زور ريزاشىلىعىمدى بىلدىرەمىن. ەلباسىمىز نۇرسۇلتان ءابىش ۇلى نازارباەۆ ۇلى جەڭىستىڭ 70 جىلدىعىن اتاپ ءوتۋ اياسىندا سوعىس ارداگەرلەرى مەن تىل ەڭبەككەرلەرىنىڭ ەرلىگىن، قاھارماندىعىن كەڭىنەن
دارىپتەۋ قاجەت ەكەندىگىن اتاپ وتكەن بولاتىن. وسى باعىتتاعى قولعا العان اسا جاۋاپتى قىزمەتتەرىڭىزدىڭ جەمىستى بولۋىنا تىلەكتەسپىن. سىزگە جانە ءوزىڭىز باسقارىپ وتىرعان گازەت ۇجىمىنا الداعى ۋاقىتتا شىعارماشىلىق تابىستار تىلەيمىن.
قۇرمەتپەن، قاسىم-جومارت توقاەۆ».
قۇرمەتتى وقىرمان!
«قۋانىش بولىسسە، كوبەيەدى» دەگەن. ەلىمىزدەگى ەڭ
جوعارى لاۋازىمدى قىزمەتتەردىڭ ءبىرىنىڭ تىزگىنىن ۇستاپ
وتىرعان ابىرويلى ازامات قاسىم-جومارت توقاەۆتىڭ
التىن ۋاقىتىن ءبولىپ، گازەت ۇجىمىنا ارناپ جازعان جىلى
لەبىزگە تولى بۇل حاتى سىزدەردىڭ دە قۋانىشتارىڭىز.
ويتكەنى ءبىز ءبىر اۋىز ءسوز جازساق تا، ونى حالىققا،
حالىقتىڭ ادال پەرزەنتتەرىنە ارنايتىنىمىزدى ءتۇسىنىپ،
لايىقتى باعاسىن بەرەتىن دە سىزدەرسىزدەر.
قۋانىش قۇتتى بولسىن، اعايىن!
رەداكتسيا القاسى.