بەس رەفورما – بۇل ەلگە، قاراپايىم ازاماتتارعا كەرەك نارسە

ەلباسى قازاقستان حالقى اسسامبلەياسىنىڭ 20 جىلدىعىنا وراي وتكەن «ەلىمنىڭ تاعدىرى – مەنىڭ تاعدىرىم» فورۋمىنا قاتىستى.
فورۋمعا قاتىسۋشىلارعا ءسوز ارناعان مەملەكەت باسشىسى شارانىڭ اقمولا وبلىسىندا ءوتۋىنىڭ سيمۆولدىق ءمانى بار ەكەنىنە توقتالدى.
– مۇندا جۇزدەن استام ەتنوستىڭ وكىلدەرى تاتۋلىق پەن كەلىسىمدە ءومىر ءسۇرىپ جاتىر. رەسپۋبليكامىزداعى قوعامدىق كەلىسىم كەڭەستەرىنىڭ ەڭ كوبى وسى وبلىستا جۇمىس ىستەيدى، ولاردىڭ سانى – 266. بيىل قازاقستان حالقى اسسامبلەياسىنىڭ جىلى اياسىندا اقمولا وبلىسىندا 500-گە جۋىق ءىس-شارا وتكىزىلەدى. وبلىس اسسامبلەياسىنىڭ اكتيۆى بەس مىڭ ادامدى قۇرايدى، – دەدى قازاقستان پرەزيدەنتى.
نۇرسۇلتان نازارباەۆ وبلىستىڭ الەۋمەتتىك-ەكونوميكالىق دامۋ قارقىنىنا دا توقتالدى.
قازاقستان پرەزيدەنتى ەلىمىزدە داعدارىس قۇبىلىستارىنا قارسى تۇرۋعا قاجەتتى بارلىق مۇمكىندىكتەر بار ەكەنىنە نازار اۋداردى. اتاپ ايتقاندا، مەملەكەت باسشىسى «نۇر وتان» پارتياسىنىڭ تاياۋدا وتكەن XVI سەزىندە جاريالانعان، رەسپۋبليكانى دامىتۋعا ارنالعان حالىقتىق بەس رەفورما تۋرالى اتاپ ءوتتى. بۇل رەفورمالار – كاسىبي جانە اۆتونومدى مەملەكەتتىك اپپارات قالىپتاستىرۋ، زاڭ ۇستەمدىگىن قامتاماسىز ەتۋ، يندۋستريالاندىرۋ جانە ارتاراپتاندىرۋعا نەگىزدەلگەن ەكونوميكالىق ءوسىم، بولاشاعى ءبىرتۇتاس ۇلت، ترانسپارەنتتى جانە ەسەپ بەرۋشى مەملەكەت.
– بەس رەفورما – بۇل ەلگە، قاراپايىم ازاماتتارعا كەرەك نارسە. ءبىز يندۋستريالاندىرۋدى جالعاستىرامىز، ەڭبەك ونىمدىلىگىن ارتتىرامىز. مەملەكەت شاعىن جانە ورتا بيزنەسكە، اۋىل شارۋاشىلىعى ءونىمىن وندىرۋشىلەرگە كومەكتەسەتىن بولادى. بۇگىندە پارمەندى الەۋمەتتىك ساياسات جۇرگىزىلۋدە. ءبىز جاستارعا، زەينەتكەرلەرگە، سونداي-اق مەملەكەت قولداۋىنا مۇقتاج جانداردىڭ بارىنە قامقورلىق جاساپ وتىرمىز. بۇدان ءارى دە مەكتەپتەر مەن اۋرۋحانالار، وزگە دە الەۋمەتتىك نىسانداردى سالاتىن بولامىز، – دەدى قازاقستان پرەزيدەنتى.
نۇرسۇلتان نازارباەۆ العا قويىلعان ماقساتتارعا جەتۋ ءۇشىن ەلگە قازاقستان حالقى اسسامبلەياسى يدەيالارىنا ادالدىقتى، تۇراقتىلىقتى، دوستىقتى جانە باق-بەرەكەنى ساقتاۋ قاجەت ەكەنىن اتاپ ءوتتى.
ءىس-شاراعا جينالعان جاستار وكىلدەرىنە ءسوز ارناعان مەملەكەت باسشىسى قازاقستاندا جان-جاقتى جەتىلۋ جانە ساپالى ءبىلىم الۋ ءۇشىن بارلىق جاعداي جاسالعانىن ايتتى.
– سىزدەرگە قازىر قالعان بۇكىل ومىرلەرىڭىزگە قاجەتتى ءبىلىم جيناۋعا مۇمكىندىك بەرىلىپ وتىر. بوس وتكەن ۋاقىتتى قايتارىپ الۋ مۇمكىن ەمەس، ونى دۇرىس پايدالانا ءبىلۋ ماڭىزدى. سىزدەردى وتانىمىزدى سۇيۋگە جانە وعان قالتقىسىز قىزمەت ەتۋگە شاقىرامىن. بۇعان سىزدەر جاقسى وقۋ ارقىلى قول جەتكىزە الاسىزدار، ال ول سىزدەرگە كاسىپقوي مامان بولىپ، سىي-قۇرمەتكە بولەنۋگە جانە ءوز وتباسىلارىڭىزدى اسىراۋعا مۇمكىندىك بەرەدى، – دەدى ەلباسى.
فورۋم بارىسىندا سونداي-اق وبلىستىڭ ەتنومادەني ورتالىقتارىنىڭ وكىلدەرى دە ءسوز سويلەپ، ەلىمىزدە ءومىر ءسۇرىپ جاتقان بارلىق ەتنوس وكىلدەرىن بىرىكتىرگەن بىرەگەي قوعامدىق ينستيتۋت رەتىندەگى قازاقستان حالقى اسسامبلەياسىنىڭ ماڭىزىنا توقتالدى.