"اق جول" جامبىل وبلىستىق قوعامدىق-ساياسي گازەت
قازاق حاندىعىنىڭ 550 جىلدىق مەرەيتويىنا وراي قالامىزداعى №56 ورتا مەكتەپتە ءبىر اپتالىق ءتالىمى زور ءىس-شارالار ۇيىمداستىرىلدى.
ماسەلەن، ديرەكتوردىڭ ادىستەمەلىك ءىسى جونىندەگى ورىنباسارى ءرازيا شالدانوۆا مەن تاريح ءپانىنىڭ مۇعالىمى ءساليما الىمبەكوۆانىڭ ۇيىتقى بولۋىمەن «قازاق حاندىعىنىڭ تاريحي قۇندىلىقتارى، قازىرگى كوزقاراستار مەن وركەنيەتتىك مۇراتى» تاقىرىبىنداعى دوڭگەلەك ۇستەلگە 11-سىنىپ وقۋشىلارى قاتىستى. باسقوسۋ بارىسىندا وتكەن داۋىرلەردەگى تاريحي تۇلعالاردىڭ ازاماتتىق بەينەلەرى اڭگىمەگە ارقاۋ بولدى. ءوز كەزەكتەرىندە ۇستازدار مەن وقۋشىلار تاقىرىپتى كەڭىنەن قاۋزاۋعا تىرىستى.
اپتالىق اياسىنداعى كەلەسى شارا «مەن تاريحىمدى جىرلايمىن» دەگەن تاقىرىپپەن ءوتتى. وندا مەكتەپ وقۋشىلارى اقىندارىمىزدىڭ تاريحي تاقىرىپتارداعى ولەڭدەرىن وقۋدان سىنعا ءتۇستى. ءبىر اپتانى قامتىعان ءىس-شارالار لەگى «قازاق حاندارى» كىتاپ كورمەسىمەن جالعاسىپ، «تاۋەلسىزدىك تولعاۋى» تاقىرىبىنداعى پاتريوتتىق اندەر بايقاۋىمەن قورىتىندىلاندى. اپتالىق بارىسىندا مەكتەپ وقۋشىلارى ەلىمىزدىڭ ءتول تاريحىنان مول تاعىلىم الدى.
اينۇر ابيىربەك،
تارمۋ-دىڭ ستۋدەنتى.