قۋانا قۇپتايمىن!

ءمۇتالىپ ەرەجەپباي ۇلى،
ۇلى وتان سوعىسىنىڭ ارداگەرى.

توقسانعا كەلگەن جاسىم بار، كوپتى كورگەن باسىم بار. ەلىمىز تاۋەلسىزدىك العالى ەڭسەمىزدى تىكتەدىك. ەل بولىپ تاققا وتىرعىزعان ەلباسىمىز دا سەنىمدى اقتادى، ۇدەدەن شىقتى، قازاقتىڭ كوكەيىندەگى ارمان-مۇراتقا جەتتىك. ءالى دە جەتەرىمىز كوپ. حالقى ءۇشىن قايدا جۇرسە دە كۇش-قايراتىن ايامايتىن ەلباسىمىزدىڭ الداعى ءساۋىر ايىندا وتەتىن سايلاۋعا قاتىسۋعا كەلىسىم بەرۋى مەنى دە مارقايتىپ تاستادى. بۇل ەل باسىندا ازداعان قيىن-قىستاۋ كۇن كەلگەن ەرەكشە كەزەڭدە قولعا الىنىپ وتىرعان ەلدىك ناۋقاندا بارشا قازاقستاندىقتار نۇرسۇلتان نازارباەۆقا سەنىم ارتادى دەپ ويلايمىن. ويتكەنى، ول حالقىنىڭ جاسىنا، ۇلتىنا، ءدىني-نانىمىنا قاراماستان بىردەي قاراپ، بىردەي قولداۋىن اياماي كەلەدى. بىزدەگى بىرلىك پەن ىنتىماقتى ساقتاپ وتىرعان سول – ەلباسىمىزدىڭ كوپ باعىتتى، گۋمانيستىك ساياساتى. ءبىز وسى ءۇشىن پرەزيدەنتىمىزبەن ماقتانامىز.
قاراپ وتىرساق، جەر ءجۇزىنىڭ جون ارقاسىندا نەبىر زوبالاڭدار ءوربىپ جاتىر. قۇددى ءبىر دۇنيەنىڭ استى ۇستىنە كەلگەندەي. سوڭعى 20-30 جىلدا الەمنىڭ ءتورت قۇبىلاسىندا قانشاما سويقاندى سوعىستار، نەقيلى قارۋلى قاقتىعىستار، اتاۋلى-اتاۋسىز قانشاما توڭكەرىستەر بولىپ ءوتتى. ءالى دە وتۋدە. كۇندەلىكتى تەلەديداردان كورەتىنىمىز دە، ەستيتىنىمىز دە سول بولدى.
اللاعا شۇكىر، ەلىمىز ونداي پالەلەردەن ءدىن امان. كەرىسىنشە ارا-جىگى اجىراعاندارعا اتالى ءسوز ايتىپ، ارا اعايىندىق تانىتاتىن بولىپ ءجۇرمىز. وسىنىڭ ءبارى – اللانىڭ ارقاسى. سوسىن كورەگەن باسشى ەلباسىمىز نۇرسۇلتان نازارباەۆتىڭ ارقاسى. ەلباسىنىڭ سايلاۋعا تۇسكەنىن قالاعانىمىز انىق. «نۇر وتان» پارتياسىنىڭ كەزەكتى وتكەن سەزىندە بۇكىل ەلدىڭ كۇتكەن جاۋابى تابىلدى. نۇرسۇلتان ءابىش ۇلىنىڭ كانديداتۋراسى بەكىتىلدى. وسىلايشا ەل تىزگىنىن ەلباسىعا تاپسىرۋعا كەزەكتى مارتە جول اشىلدى.