اق جول جامبىل وبلىستىق قوعامدىق- ساياسي گازەت
وقيعا جەلىسى نەگىزىنەن استانا، الماتى جانە الماتى وبلىسىنىڭ تۇرار اۋىلىندا تۇسىرىلگەن «ورالۋ» ءفيلمى ءمادەنيەت جانە سپورت مينيسترلىگىنىڭ تاپسىرىسى بويىنشا جۇزەگە اسىرىلعان «قازاقفيلم» كينوستۋدياسى مەن «كوركەم فيلم» كينوكومپانياسىنىڭ بىرلەسكەن جوباسى بولىپ تابىلادى. ورتالىق كوممۋنيكاتسيالار قىزمەتىندە فيلمنىڭ شىعارماشىلىق توبى كوركەم تۋىندىعا وراي ءوز ويلارىن ورتاعا سالىپ، باق وكىلدەرى تاراپىنان قويىلعان سۇراقتارعا جاۋاپ بەردى. ءباسپاسوز ءماسليحاتىنا شاكەن ايمانوۆ اتىنداعى «قازاقفيلم» اق ۆيتسە-پرەزيدەنتى – باس رەداكتورى ديدار امانتاي، قويۋشى-رەجيسسەر، ستسەناري اۆتورى، پروديۋسەر راشيد سۇلەيمەنوۆ، باستى رولدەردى سومداۋشى ءارتىستەر سانجار ماديەۆ، ارۋجان جازىلبەكوۆا مەن وبوننا ەندەبۋەزە قاتىستى.
ياپىر-اي، بۇل تۋىندى تۋرالى جۇرتتىڭ وسىنشاما رياسىز راۋىشتە، وي-بايلامدارىن باستاۋدىڭ مولدىرىندەي تازا كوڭىلمەن سىڭعىرلاتا الا جونەلۋىندە نە سىر دەيتىن الەۋمەت ءۇشىن ايتايىق، شىنىمەن دە بۇل تۋىندىنىڭ جاي-جاپسارى مەن ءجون-جوسىعى باسقا دۇنيەلەردەن الابوتەن، شىعار شىڭى شاعالا قانات شالقار بيىكتە، ال شالقار سارىنى ساردالانى كەستەلەي كەزىپ، قيالارعا شارق ۇرا ورلەيتىن اسقارالى اسپاندا. «بولاشاق» باعدارلاماسى بويىنشا الەمنىڭ كوپتەگەن جوعارى وقۋ ورىندارىندا ءبىلىم الىپ جاتقان ورىمدەي ورەندەرىمىزدىڭ بولاشاق تاعدىرى مەن ارمان-مۇراتى بۇگىنگى الەۋمەت ءۇشىن تولعاندىرار باستى ماسەلەنىڭ ءبىرى بولىپ سانالادى. كەز-كەلگەن اتا-انا تۋعان شاڭىراقتان ۇزاپ ۇشقان ۇلانىنىڭ بولاشاعىنا الاڭداي كوز تىگەدى. تۋعان جەرگە دەگەن سول ءۇمىت ساۋلەسى قالاي شاشىرار ەكەن دەپ ەلەڭدەي جول توسادى. كوزىنىڭ اعى مەن قاراسى قانداي ولجامەن ورالار ەكەن دەگەن الاڭ كوڭىل وي ويپاتىن كەزەدى. ەڭ باستىسى، ولار وتانعا، اتامەكەنگە كىم بولىپ ورالادى؟ تۋعان جەرگە دەگەن ماحاببات سەزىمىنە گۇل بايلاپ ورالا ما، جوق الدە سۇيىسپەنشىلىكتىڭ كۇنگەيىن بۇلت شالدىرىپ، وزگەنىڭ جىلتىراعىنا اربالىپ، تونالىپ تورىعا ما؟ مىنە، ماسەلە قايدا جاتىر؟
«ورالۋ» ءفيلمىن تاماشالاۋعا جۇرتتىڭ ىقىلاستانا جۇمىلىپ جاتۋىندا وسىنداي سىر بار دەسەك، جالپى، ەكىنشىدەن، قازىر ادامي قاسيەتتەرگە بارىپ تىرەلمەيتىن بىردە-ءبىر قۇندىلىق جوق ەكەنى تاعى راس. وسى جاعىنان ءفيلمنىڭ رۋحى توپىراقتىڭ قۇنارىن ارتتىراتىن كوكتەمگى جاۋىنداي بىزگە قىمبات اسەر قالدىردى. فيلم ءۇشىن ەڭ باستى جەتىستىك، حالىقتىڭ، كوپشىلىكتىڭ كوكەيىندەگىسىن ءدوپ باسۋدا، كەۋدەگە سەزىم ۇيالاتا بىلۋدە، جۇرەكتى لۇپىلدەتە الۋدا دەپ جوعارى تالاپ قويىپ جاتامىز. ءوزىنىڭ ىشكى الەمىنە، كەيىپكەرىنىڭ جان دۇنيەسىنە جۇرتتى باتىرا الماعان، باۋراي الماعان فيلم شىنايى تۋىندى بولا المايدى دەگەن پايىم دا ءجيى العا تارتىلادى. «ورالۋ» ءفيلمىنىڭ وسى جاعىنان قانداي جەتىستىگى بار دەيتىن بولساق، كەيىپكەر بەينەسى الاقاندا ەسىلگەن ارقانداي بىرتە-بىرتە شيراتىلىپ بارىپ، جاننىڭ ءبىر بۇرىشىنا ورنىعا جايعاسىپ كەتە بارادى. ەڭ باستىسى، كەيىپكەر تاعدىرى ءسىزدى بەيجاي قالدىرمايدى. وسى وعلانعا كوڭىل ويسىراي قۇلاپ، ءىش تارتا تۇسەسىز. شالعايدان تەك قانا شاپاعات جيىلا بەرسە، قانەكەي، ارينە. بىراق، شالعايدىڭ ءىشى، ول دا ءبىر جالعىز-جارىم جانعا الدىنان كوپ قيىندىق كەزىگەر قالىڭ ورمان سەكىلدى تىلسىم دۇنيە عوي. ودان ءار پەرزەنتتىڭ اداسپاي، اڭداۋ مەن الداۋعا اربالماي جول تابۋىن، اردا ازاماتتىڭ ابىرويمەن اتامەكەنگە ورالۋىن قالاپ حالىق وتىر دەگەندەي، مىنا فيلمدە دە ءبىر تالشىبىقتىڭ تۋعان جەردىڭ قۇنارىنا كەلىپ شانشىلعان ساتىنە كۋا بولامىز.
ونەر تۋىندىسىنىڭ وزەگى شالعايدا ءبىلىم الىپ جاتقان سانداعان ۇل-قىزدارىمىزدىڭ تاعدىرىن، ولاردىڭ ارمان-مۇراتىن باياندايدى. قازاق ەلىنىڭ ەرتەڭىنە، بولاشاعىنا ەلەڭدەمەيتىن ادام جوق قازىر. قاقتىعىستار مەن قىرعي-قاباق سوعىستار ورتىنە جەر بەتىندەگى بۇكىل ادامزات بالاسىنىڭ جۇرەگى الاڭداپ وتىرعان شاقتا ساياسي تۇراقتىلىق پەن تۇتاستىققا ۇيىعان قازاقستاننىڭ بىلىمگە ينۆەستيتسيا قۇيىپ، بولاشاققا بورىشتار جاستارعا، بىلىمگە ىنتالى تۇلەكتەرگە جول اشۋى، الەمنىڭ ەڭ وزىق، ەڭ دامىعان وقۋ ورىندارىندا ءبىلىم الۋىنا مۇمكىندىك تۋعىزۋى ەرتەڭى ءۇشىن ەلەڭدەگەن ەلباسىنىڭ تاعى ءبىر كورەگەن ساياساتىنىڭ ارقاسىندا جۇزەگە اسىپ جاتقانىن ايتىپ قويۋعا ءتيىسپىز. قازىر مىڭداعان قازاقتىڭ قارا كوز ۇل مەن قىزدارى دامىعان ەلدەردىڭ جوعارى وقۋ ورىندارىندا وقىپ جۇرگەنىن، ولاردىڭ ارقايسىسى ەرتەڭ قولدارىنا ءبىلىمنىڭ شامشىراعىن ۇستاپ كەلگەندە، قازاق دالاسىنىڭ ءۇستى قالاي جارقىراپ نۇرعا بولەنەتىنىن كوز الدىڭىزعا ەلەستەتسەڭىز، جان دۇنيە الابوتەن كۇي كەشەدى. ەلدىڭ ەرتەڭى، قازاقتىڭ بولاشاعى دەگەن تۇجىرىمدارعا تۇراقتى تۇسپالدار عانا تۇتقا بولا الادى. مىنە، مىنا فيلم وسى تۇتقانى وتە-موتە ءمان-ماڭىزى جوعارى كەسكىندە باياندايدى. فيلم كەيىپكەرى – ماقساتقا گەرمانيادا تۇرعان ءارى سول ەلدە وقىعان ۇنايدى. ول ءوزى ميكروبيولوگ جانە سونىمەن قاتار اۋقىمدى جوبالارمەن اينالىساتىن ءىرى كومپانيادا قىزمەت ىستەيدى. ماقسات الىستاعى تۋعان جەرىن تەك ءىسساپارلار كەزىندە، ماڭىزدى كەزدەسۋلەر بارىسىندا عانا ۇشاق تەرەزەسىنەن كورگەنگە ۇيرەنىپ كەتكەن. شالعايداعى اۋىلدا تۇراتىن اتاسىنىڭ كەنەتتەن دۇنيە سالۋى ونىڭ بۇكىل سانالى ءومىرىن ءبىر-اق ساتتە باسقا ارناعا بۇرىپ جىبەرەدى، كۇتپەگەن جاعدايلاردى باستان كەشۋىنە تۋرا كەلەدى. ول قازاقتىڭ اتادان اكەگە، اكەدەن بالاعا ميراس بولىپ قالاتىن ەجەلگى سالتى بويىنشا وزىنە ميراسقا قالعان ات فەرماسىن، جۇيرىك سايگ ۇلىكتەردى ساتىپ، اقشاعا اينالدىرۋ ماقساتىندا تۋعان جەرگە ورالادى.
از ۋاقىت ىشىندە باستى كەيىپكەرىمىز اۋىل تىنىس-ءتىرشىلىگىنىڭ، تۇرمىستىق دەڭگەيدىڭ مۇلدە وزگەرىپ كەتكەنىن، ال سول تامىرمەن ءوزى دە تاعدىرلاس ەكەنىن، ىشكى جان دۇنيە تەرەڭىندە بۇرق-سارق قايناپ تاعى ءبىر ىستىق سەزىمنىڭ مازا بەرمەسىن اڭعارادى. قازاقتىڭ سالت-ءداستۇرىن، ۇلتتىق قۇندىلىق-قاسيەتتەرىن بويىنا ءسىڭىرىپ وسكەن ماقسات اۋىلدا ءجۇرىپ ارۋجان دەگەن مۇعالىم قىزبەن تانىسادى. ول وسى ارقىلى ەلدەگى تاعى ءبىراز جاعدايدىڭ وزگەرگەنىنە كۋا بولادى. ەۋروپالىق كومپانيالار ءتارىزدى، بۇگىنگى قازاقستاندا دا قاراپايىم ادامدارعا تابىسقا جەتۋ ءۇشىن، ادال ەڭبەگى ارقاسىندا جاعدايىن جاقسارتۋ ءۇشىن كوپ مۇمكىندىكتەر جاسالعانىن كورەدى. ادام ءبىر جەردە، ءوز ەلىندە عانا قاناتى قاتايىپ، تامىرى تەرەڭگە كەتەتىنىنە كوز جەتكىزەدى.
فيلم تۋعان جەرگە ءسۇيىسپەنشىلىكتى قۇرعاق بايانداپ قويمايدى، ەلدەن جىراققا كەتكەن، بىراق ەلىنە كەلگەن سوڭ، تۋعان جەرىندە مۇمكىندىكتەردىڭ، ارتىقشىلىقتاردىڭ اشىلعانىن ۇعىنعان جاس ۇرپاقتىڭ كوكىرەگىندەگى كاۋسار ءۇندى جەتكىزەدى. وتاندى ءسۇيۋدى دالەلدەۋ ءۇشىن تاۋ قوپارىپ، تاس تالقانداپ تاستاۋدىڭ قاجەتى جوق، ادام مۇنى ءوزىنىڭ جۇدىرىقتاي جۇرەگىنەن ورىلگەن ءبىر عانا ىستىق سەزىمىمەن-اق دالەلدەپ شىعا الاتىنى وسى كەيىپكەر بويىنداعى قاسيەتتەردەن كورىنىس تابادى.
جاس رەجيسسەر راشيد سۇلەيمەنوۆتىڭ «ورالۋ» ءفيلمى ەلىمىزدىڭ ەرتەڭگى بولاشاعى –جاس ۇرپاقتى ەلجاندىلىققا، ءوز وتانىنىڭ ادال ازاماتى بولۋعا شاقىرعان ۇنىمەن ەرەكشەلەنسە، ەكراندىق تۋىندىنىڭ ءساتتى ورىندالۋىنا سانجار ماديەۆ، ارۋجان جازىلبەكوۆا، وبوننا ەندەبۋەزە، ەركەبۇلان دايىروۆ، سەرگەي شتەرن، سايات مەرەكە ۇلى، سىرىم قاشقاباەۆ سىندى اكتەرلەر شوعىرىنىڭ دا ەداۋىر تەر توككەنى انىق بايقالادى. مەملەكەت باسشىسى نۇرسۇلتان نازارباەۆتىڭ ساليقالى ساياساتىنىڭ ارقاسىندا جاستاردىڭ قول سوزعان ماقسات-مۇراتىنا جەتۋىنە جان-جاقتى مۇمكىندىكتەر جاسالعانى تۋرالى باياندايتىن تولىقمەتراجدى فيلم جايىندا شاكەن ايمانوۆ اتىنداعى «قازاقفيلم» اق ۆيتسە-پرەزيدەنتى – باس رەداكتور ديدار امانتاي، سونىمەن قاتار، ءفيلمنىڭ شىعارماشىلىق توبى قويۋشى-رەجيسسەر، ستسەناري اۆتورى راشيد سۇلەيمەنوۆ، ءفيلمنىڭ باستى كەيىپكەرلەرىن سومداعان اكتەرلەر سانجار ءماديەۆ، ارۋجان جازىلبەكوۆا جانە وبوننا ەندەبۋەزە كەڭىنەن اڭگىمەلەپ، كينوتۋىندى تۋرالى وڭ ءپىكىرلەر ءبىلدىردى. ۇزاقتىعى 90 مينۋتتىق كارتينانىڭ تۇساۋكەسەرى ەلورداداعى «قازاقستان» ورتالىق كونتسەرت زالىندا 9 ناۋرىزدا وتسە، سالتاناتتى كەشكە ەلىمىزدىڭ مەملەكەت جانە قوعام قايراتكەرلەرى، ۇلت زيالىلارى، ءفيلمنىڭ ءتۇسىرۋ توبى جانە «قازاقفيلم» اق وكىلدەرى قاتىستى. «ورالۋ» ءفيلمى 19 ناۋرىزدان باستاپ جالپىۇلتتىق پروكاتقا شىعىپ، ەلىمىزدىڭ بارلىق كينوتەاترلارىندا كورسەتىلەدى دەپ كۇتىلۋدە.
«ەۋرازيا» حالىقارالىق كينوفەستيۆالىندە «كورەرمەننىڭ كوزايىمى» اتالىمى بويىنشا جۇلدەگە يە بولعان كوركەم تۋىندى تۋرالى ءباسپاسوز ءماسليحاتىندا سويلەگەن سوزىندە شاكەن ايمانوۆ اتىنداعى «قازاقفيلم» اق ۆيتسە-پرەزيدەنتى ديدار امانتاي:
– مۇنى نەگىزىنەن ەلباسى ءجۇرگىزىپ وتىرعان جاستار ساياساتىنىڭ قانشالىقتى جاستارعا ءتيىمدى ەكەندىگىن، ولارعا مەملەكەت قانشالىقتى قامقورلىق كورسەتىپ وتىرعانىن كورسەتۋ ءۇشىن تۇسىرىلگەن فيلم دەپ ايتۋعا بولادى. فيلمدە ءوزىنىڭ ەلىن سۇيگەن ازاماتتىڭ شەتەلدە قانشالىقتى تابىسقا جەتسە دە، ءوز ەلىندەگى، ءوز وتانىنداعى ورنى ودان الدەقايدا بيىك دەگەن وي اكتەرلەردىڭ شىنايى ويىنى ارقىلى كورەرمەندەردى باۋراپ اكەتەدى. بۇل ءفيلمدى ءبىز ادامي فيلم، كىسىلىك تۋرالى، پاتريوتيزم تۋرالى فيلم دەپ ايتۋىمىزعا بولادى، – دەپ ءتۇيىندەدى. ال قويۋشى-رەجيسسەر راشيد سۇلەيمەنوۆ: «بۇل – ءبىز ءۇشىن ەرەكشە تۋىندى. مۇنداي جۇمىسقا ءبىزدى رۋحتاندىرعان نۇرسۇلتان ءابىش ۇلى. ناقتىراق ايتسام، ونىڭ ەلگە دەگەن شەكسىز ماحابباتى. ەلباسى ايتقانداي، پاتريوت بولۋ دەگەنىمىز – ءار ادامنىڭ قازاقستاندى ءوزىنىڭ جۇرەگىندە الىپ ءجۇرۋى. مەن كينوكارتينا ارقىلى كورەرمەندەرگە ەلباسىمىزدىڭ وسى ويىن جەتكىزە الدىق دەپ سەنەمىن. ويتكەنى، «ورالۋ» – جاستاردىڭ پاتريوتتىق سەزىمىن وياتاتىن كوركەم فيلم» دەسە، باستى ءرولدى سومداعان سانجار ماديەۆ: «فيلم قالانىڭ سىرتىنداعى تۇرار اۋىلىندا ءتۇسىرىلدى. ءتۇسىرىلىم بارىسىندا ءبىراز قيىندىقتارعا تاپ بولعانىمىز راس. ءتىپتى كەيدە ءبارىن اياق استىنان تاستاپ كەتە سالعىڭ كەلگەن ساتتەردىڭ ءوزىن قالاي جەڭدىك دەپ ويلايمىن. بىراق دەگەنمەن ءبارىن شىدامدىلىق جەڭەدى دەمەكشى، سونىڭ ارقاسىندا ۇجىمدىق جۇمىس ويداعىداي ورىندالدى. ءوزىمنىڭ رولىمە بولاشاقتىق ستۋدەنتتەرمەن بۇرىننان ارالاس-قۇرالاستىعىم كوپ كومەكتەستى. ءويتكەنى، بۇعان دەيىن «بولاشاق» باعدارلاماسى بويىنشا ءبىلىم العان جاستاردىڭ اراسىندا تانىستارىم بار بولاتىن. باستى رولگە كىرىسپەس بۇرىن ءوزىم وينايتىن ادامنىڭ تابيعاتىن جەتە زەرتتەۋگە تۋرا كەلدى. وسى ويىم ءۇشىن قاتەلەسپەگەن سياقتىمىن. تۋىندى كورەرمەن كوڭىلىنەن شىعادى دەگەن ويدامىن»، دەپ سەنىم ءبىلدىردى.
ارۋجان جازىلبەكوۆا ستسەناريدى وقىپ شىققاننان كەيىن فيلمگە تۇسۋگە بىردەن كەلىسىمىن بەرگەنىن ايتتى.
ويتكەنى، ءفيلمنىڭ سيۋجەتى مەنى وزىنە باۋراپ الدى. وقيعا ءبىز بەن سىزگە سونشالىق بەيمالىم نارسە دەي المايمىن. قوعامداعى كۇندەلىكتى ماڭىزدى ماسەلەگە، بۇگىنگى زامانداس بەينەسىنە قۇرىلعان. سول سەبەپتى مەن ويناعان ءرول ءوز تابيعاتىمنان الىس ەمەس. ال وزىڭە سونشالىق جاقىن وبرازدى سومداۋ ەشقاشان قيىندىق تۋعىزبايدى، شارشاتپايدى، تاۋىڭ شاعىلمايدى. وتانىڭناڭ الىستا ءومىر ءسۇرۋ، ساعىنۋ دەگەن سەزىمدەردىڭ نە ەكەنىن ءوزىمنىڭ ەت پەن سۇيەگىمنەن وتكىزگەن جانمىن. سوندىقتان بارشا ءوزىم سياقتى جاستاردىڭ ەلباسىنا دەگەن شەكسىز قۇرمەت سەزىمىن جەتكىزگىم كەلەدى. پرەزيدەنتىمىزگە جاستاردىڭ الدىنان جارقىن بولاشاعىن اشىپ بەرگەنى ءۇشىن، قاناتىمىزدى كەڭ سەرمەۋگە مۇمكىندىك تۋعىزعانىنا راحمەتىمىزدى ايتامىز. ساعىنا ۇشىپ كەلگەندە، انادايدان وشاعى ءبۇتىن ءۇيىڭنىڭ توبەسى اعاراڭداپ كورىنە باستاعان ساتتەگى جۇرەك شىركىننىڭ تۋلاپ سالا بەرەتىن كەزى قانداي عاجاپ! كاليفورنيا شتاتىندا ءبىلىم العاندىقتان ماعان دا كەيىپكەردىڭ ارمان-مۇراتى مەن سەزىمى ەتەنە تانىس. نەگىزى ماقساتتىڭ ەلدە قالىپ، ەڭبەك ەتۋ ويىندا جوق ەدى. دەگەنمەن، از ۋاقىتتىڭ ىشىندە قازاقستاندا دا ەۋروپاداعىداي جاس عالىمدارعا بارلىق جاعداي جاسالعاندىعىن تۇسىنەدى. ءارى قازاقتىڭ سالت-ءداستۇرى، ۇلتتىق قۇندىلىقتارىن بويىنا ءسىڭىرىپ وسكەن ارۋجانداي مۇعالىم قىزبەن تانىسىپ، ومىرگە، اۋىلعا كوزقاراسى وزگەرەدى. تۋعان جەرگە، وتانعا دەگەن ۇلى ماحاببات قانداي دا ماتەريالدىق قۇندىلىقتان جوعارى تۇرادى دەگەن يدەيا نانىمدى سۋرەتتەلەدى.
ءتورت-بەس جىلدان بەرى قازاقستاندا اعىلشىن تىلىنەن ساباق بەرىپ جۇرگەن ۇلىبريتانيالىق وبوننا ەندەبۋەزە وسى ارالىقتا مۇنداعى ەكى-ءۇش فيلمگە ءتۇسىپ ۇلگەرگەن ەكەن. وسىنى ماقتانىشپەن اڭگىمە ارقاۋىنا اينالدىرعان اكتەر: «ماعان فيلمگە قاتىسۋعا ۇسىنىس جاساپ، ستسەناريدى قولىما ۇستاتقان كەزدە مۇنداعى وقيعاعا ىشىمنەن قاتتى بەرىلىپ كەتتىم. تۋعان جەرگە دەگەن وسىنداي دا ساعىنىش سەزىمى بولادى ەكەن-اۋ دەپ تەبىرەندىم. كوپ فيلمدەردە ءومىر دەگەنىڭدى تاماشا، ۋايىم-قايعى جوق ەتىپ كورسەتىپ قوياتىنىنا قىنجىلامىن. ال شىن مانىندە ولاي ەمەس قوي. مىنا فيلم مۇلدە بولەك، ءبارى شىنايى وقيعاعا قۇرىلعان. راسىن ايتاتىن بولسام، قازاقستان، ونىڭ ىشىندە، اسىرەسە، استانا ءوزىنىڭ اشىق كەسكىن-كەلبەتىمەن، ادامدارىنىڭ اق جارقىن كوڭىلىمەن، مىقتى كوشباسشىسىمەن ۇنايدى. كوبىنە شەتەلدە قازاقستان تۋرالى اڭگىمە بولا قالعان كەزدە، كوپ ادام وسىنداي تاماشا مەملەكەت بار ەكەنىن ءبىلىپ جاتادى. ول سىزدەردىڭ مىقتى كوشباسشىلارىڭىزدىڭ ارقاسى»، دەدى.
ەل مەن جەردىڭ كيەسى، وتان، اتامەكەن دەگەن ۇعىمدار قازiر كەز كەلگەن جاستى تەڭىزدەي تەبىرەنتەر قۇندىلىقتار سانالادى. ەلباسىنىڭ «بولاشاق» باعدارلاماسىن دۇنيەگە الىپ كەلگەندەگى مۇراتى دا وسى ۇلتتىق يدەيامەن تىعىز ساباقتاسىپ جاتىر – دامىعان ەلدەردەگى ءىرى-ءىرى جوعارى وقۋ ورىندارىن وقىعان جاستار ولاردىڭ وزىق ويى مەن وزات ءىلىمىن وتاننىڭ، ەلدىڭ يگىلىگىنە جاراتۋ، تۋعان جەرگە ادال قىزمەت ەتۋ، اتاجۇرتقا ورالىپ، ءتول تامىرلاردىڭ بويىنا قايتا قان جۇگىرتۋ…تاعىسىن تاعى بولىپ ارى قاراي ول سوزىلا ءتۇسۋى مۇمكىن. ارينە، كوركەم فيلم دەگەنىمىز اۋەلى جۇرتقا رۋحاني ازىق رەتىندە قىمبات سانالادى. سوندىقتان شىنايى، نانىمدى وقيعا اكتەرلەر شەبەرلىگىمەن ۇيلەسە ورىلگەن كەزدە عانا كوركەم فيلمنىڭ كورۋشىسى ارتىپ، عۇمىرى ۇزارماق. وسى تۇرعىدان العاندا، قازاقستان جاستارىنىڭ بويىنداعى قاسيەتتەردىڭ فيلم وزەگىنەن وزگەشە ورنەكپەن كورىنىس تابۋى كينو كارتينانىڭ تاعى ءبىر ۇتار قىرىنا اينالارى ءسوزسىز. مۇنى فيلمدەگى اتاسىنان قالعان مۇرانى ساتىپ، كەرى قايتىپ كەتۋگە بەل بايلاعان جiگiتتiڭ iشكi دۇنيەسiندەگi ارپالىستان، تانىم-تۇيسىگىنىڭ وزگەرiپ سالا بەرگەن ساتىنەن، ەڭ سوڭىندا تۋعان جەرگە ورالۋ كەرەك دەگەن ۇستانىمعا بەكىنۋىنەن اڭعاراسىز. «مەن بۇل فەرمانى ساتپايمىن» دەيدى باستى كەيىپكەر. فەرمانى ساتۋ دەگەنىڭ ەلىڭدى ساتۋ، قازاعىڭدى ساتۋ سياقتى استارلى تەرەڭ ويىمەن كەز كەلگەن ادامنىڭ نامىسىنا شوق تۇسىرەتىن سوزدەر ەمەس پە؟ قازىر قالعىپ كەتكەن نامىس پەن سانانى وسىنداي شىنشىل ۇعىمدار شىمشىپ الۋى كەرەك. سوندىقتان وتانعا ورالۋ كەرەك، ءسويتىپ، حالقىڭنىڭ بۇتىندىگى مەن تۇتاستىعىنا جيعان-تەرگەن ءبىلىمىڭدى توكپەي-شاشپاي جۇمساپ، قازاقستاننىڭ گۇلدەنۋىنە اتسالىسۋىڭ كەرەك دەگەن يدەيانى ونەر ايدىنىنا الىپ شىققان شىعارماشىلىق توپ دىتتەگەن مەجەسىنە جەتىپ وتىر دەپ ايتا الامىز.
قاراشاش توقسانباي.
(«ەگەمەن قازاقستان»، 11 ناۋرىز، 2015 جىل).