حالىق تاڭداسا، قاتەلەسپەيدى

بەيسەنبى كۇنى «نۇر وتان» پارتياسى وبلىستىق فيليالىنىڭ توراعاسى، وبلىس اكىمى كارىم كوكىرەكباەۆتىڭ توراعالىق ەتۋىمەن پارتيا وبلىستىق فيليالىنىڭ كەزەكتەن  تىس   حV كونفەرەنتسياسى بولىپ ءوتتى. وبلىستىق قازاق دراما تەاترىندا وتكەن القالى باسقوسۋدا «نۇر وتان» پارتياسىنىڭ 2014 جىلى اتقارعان قىزمەتى جانە الداعى كەزەڭدەگى مىندەتتەرى،  سونىمەن قاتار پارتيا توراعاسى نۇرسۇلتان ءابىش ۇلى نازارباەۆتى قازاقستان رەسپۋبليكاسىنىڭ پرەزيدەنتتىگىنە كانديدات ەتىپ ۇسىنۋ تۋرالى ماسەلەلەر قارالدى. كۇن تارتىبىندەگى ماسەلەلەر بويىنشا پارتيا وبلىستىق فيليالىنىڭ توراعاسى، وبلىس اكىمى كارىم كوكىرەكباەۆ حابارلاما جاسادى.

– وزدەرىڭىزگە ءمالىم، وتكەن جىلى قاراشا ايىنىڭ سوڭىندا پارتيا وبلىستىق فيليالىنىڭ ەسەپ بەرۋ-سايلاۋ كونفەرەنتسياسى ءوتىپ، وندا ساياسي كەڭەستىڭ سوڭعى ەكى جىلدا اتقارعان جۇمىستارى تۋرالى جان-جاقتى ايتىلعان بولاتىن. ال بۇگىنگى كونفەرەنتسيادا سىزدەردى پارتيا تاراپىنان 2014 جىلى جۇزەگە اسىرىلعان اۋقىمدى شارالارمەن ارنايى تانىستىرا كەتكەندى ءجون كورىپ وتىرمىز، – دەپ باستادى كارىم ناسبەك ۇلى ءوزىنىڭ حابارلاماسىن، – وتكەن جىلى پارتيامىز ءوزىن ەلباسىنىڭ، پارتيا توراعاسىنىڭ سەنىمدى سەرىگى جانە پارتيالىق ارىپتەسى، قانداي دا ءبىر قيىن ساتتەر بولماسىن ۋادە ۇدەسىنەن شىعا بىلەتىن ۇلكەن ساياسي كۇش ەكەنىن تاعى دا دالەلدەي ءبىلدى.پارتيا جەتەكشىسى ن.ءا.نازارباەۆتىڭ پارتيانىڭ 15-سەزىندە پارتيا ۇيىمدارىنىڭ قىزمەتىن قايتا رەفورمالاۋ جونىندە بەرگەن ناقتى تاپسىرمالارى 2014 جىلى تولىعىمەن ىسكە اسىرىلدى دەپ ايتۋعا تولىق نەگىز بار. پارتيا ۇستانىمى ەلباسىنىڭ مەملەكەتتىك ساياساتىن ىسكە اسىرۋعا جانە قوعامداعى كەلىسىم، بىرلىك جانە تۇراقتىلىق سىندى قۇندىلىقتاردى ساقتاۋعا باعىتتالدى. ءبىزدىڭ وسىنداي باعا جەتپەس قۇندىلىقتارىمىز «نۇر وتان» پارتياسىنىڭ ساياسي دوكتريناسىندا ايقىن كورىنىس تاپقان بولاتىن. سونىمەن قاتار، پارتيا ۇلتتىق ايتىس ونەرى، كوكپار، قازاق كۇرەسى سياقتى باي داستۇرلەرىمىزدى قايتا جاڭعىرتۋعا ۇلكەن ۇلەس قوسىپ، حالىقتىڭ ريزاشىلىعىنا بولەنىپ ءجۇر.

ءبىزدىڭ ەڭ باستى قۇندىلىعىمىز – ەلىمىزدىڭ تاۋەلسىزدىگى بولسا، نەگىزگى ماقساتىمىز – قازاقستاننىڭ گۇلدەنۋى، ءبىزدىڭ يدەالىمىز – ەلى سۇيگەن، ەلىن سۇيگەن ەلباسىمىز! جالپى، پارتيانىڭ 2020 جىلعا ارنالعان باعدارلاماسىندا كورسەتىلگەن مەجەلى مىندەتتەر تولىعىمەن ورىندالدى. بىرىنشىدەن، پارتيا ۇيىمدارى قىزمەتىنىڭ تيىمدىلىگى ارتىپ، اتقارۋشى بيلىك پەن حالىق اراسىنداعى التىن كوپىرگە اينالدى.
جۇيەلى جۇمىستاردىڭ ناتيجەسىندە دۇنيەنى دۇربەلەڭگە سالىپ وتىرعان الەمدىك داعدارىستىڭ كورىنىستەرى بوي الا باستاعانىنا قاراماستان، سوڭعى 3 جىلدىڭ قورىتىندىسى بويىنشا پارتيانىڭ سايلاۋالدى تۇعىرناماسىندا بەلگىلەنگەن مەجەنى ورىنداۋدا جاقسى كورسەتكىشتەرگە قول جەتكىزىلىپ، كۇتىلگەن ناتيجە 69 پايىزعا ورىندالدى. ەل مۇددەسى، مەملەكەت بولاشاعى ءۇشىن وسىنداي جوسپارلى جۇمىستاردى ۇيىمداستىرۋدا پارتيا ساياسي كەڭەسىنىڭ ناقتى شارالاردى قابىلداۋداعى بەلسەندىلىگىن ايرىقشا اتاپ وتكەن ءجون دەپ ەسەپتەيمىن.
سىزدەر جاقسى بىلەسىزدەر، وتكەن جىلى پارتيانىڭ 2025 جىلعا دەيىنگى جەمقورلىققا قارسى ارەكەت جونىندەگى ۇزاق مەرزىمدى باعدارلاماسى قابىلداندى. سونىمەن قاتار، وسى باعدارلاما نەگىزىندە مەملەكەتتىك ورگانداردىڭ ستراتەگيالىق جوسپارلارى دا بەكىتىلدى. وكىنىشكە قاراي، قوعامدى الاڭداتىپ وتىرعان سىبايلاس جەمقورلىق ارەكەتتەرىنىڭ نىشاندارى پارتيا مۇشەلەرى اراسىنان ءالى دە بولسا اراگىدىك بەلەڭ الىپ قالادى.
مىسالى، وتكەن جىلى وبلىسىمىزدا ىشكىپارتيالىق ءتارتىپتى بۇزعان جانە سىبايلاس جەمقورلىق ارەكەتتەرىنە جول بەرگەن 21 ادامنىڭ پارتيا قاتارىنان شىعارىلۋى وسىنىڭ ايقىن دالەلى. دەگەنمەن، بۇل تەك قانا «نۇر وتان» پارتياسى عانا ەمەس، بارشا قوعام بولىپ كۇرەسەتىن بۇگىنگى كۇننىڭ ەڭ جاۋاپتى مىندەتتەرىنىڭ ءبىرى. سوڭعى جىلدارى «نۇر وتان» پارتياسى ورتالىق اپپاراتىنىڭ بىلىكتى باسشىلىعى ارقاسىندا پارتيانىڭ وبلىستىق، قالالىق جانە اۋداندىق فيليالدارىنىڭ جۇمىس قارقىنى جاڭاشا سيپاتقا يە بولدى.
وتكەن جىلى «نۇر وتان» پارتياسىنىڭ ايماقتىق جانە اۋماقتىق فيليالدارى ساياسي كەڭەسىنىڭ 470 جانە ساياسي كەڭەس بيۋروسىنىڭ 1271 وتىرىسىن وتكىزۋگە قول جەتكىزىلدى. وسى وتىرىستاردىڭ كۇن تارتىبىنە وڭىردەگى ەڭ وتكىر، ەڭ وزەكتى قوعامدىق-ساياسي جانە الەۋمەتتىك-ەكونوميكالىق ماسەلەلەر قويىلدى. بۇل جۇيەلى جۇمىستار الداعى ۋاقىتتا دا ءوز جالعاسىن تاباتىن بولادى.
ەكىنشىدەن، «نۇر وتان» پارتياسى پارتيانىڭ ماجىلىستەگى جانە ماسليحاتتارداعى دەپۋتاتتىق فراكتسيالارى ارقىلى جەرگىلىكتى جەرلەردەگى جانە ورتالىق اتقارۋشى بيلىكتىڭ جۇمىسىنا باقىلاۋدى كۇشەيتە ءتۇستى. ونىڭ ىشىندە، پارتيا «نۇرلى جول» باعدارلاماسىن ىسكە اسىرۋ مەن ۇلتتىق قوردان بولىنەتىن قاراجاتتىڭ ءتيىمدى ءارى ماقساتتى جۇمسالۋىنا باقىلاۋ جۇمىسىن جۇرگىزۋدى قولعا الىپ وتىر. وسى ماقساتتا قۇرامىنا پارلامەنت ءماجىلىسى مەن بارلىق دەڭگەيدەگى ءماسليحات دەپۋتاتتارى قامتىلعان ارنايى باقىلاۋ كوميسسيالارى قۇرىلدى. وسىنداي 4 كوميسسيا ءبىزدىڭ وبلىستاعى پارتيانىڭ ماسليحاتتارداعى دەپۋتاتتىق فراكتسيالارى جانىنان دا جاساقتالدى. جالپى، بۇگىنگى تاڭدا پارتيانىڭ بارلىق دەڭگەيدەگى ماسليحاتتارداعى دەپۋتاتتىق فراكتسياسىنىڭ مۇشەلەرى بەلسەندى ءىس-قيمىل ارەكەتتەرىمەن كوپشىلىكتىڭ كوڭىلىندەگى ماسەلەلەردى شەشۋگە باتىل قادام جاساپ وتىرعاندىعىن اشىق ايتۋ كەرەك.
ۇشىنشىدەن، «نۇر وتان» پارتياسى قاراپايىم حالىققا ەتەنە جاقىن، تۇرعىنداردىڭ سەنىمى مەن ءۇمىتىن اقتاپ كەلە جاتقان ەلىمىزدەگى باستى ساياسي قۇرىلىم ەكەنى ۋاقىت دالەلدەگەن شىندىق. بۇگىندە پارتيانىڭ قوعامدىق قابىلداۋلارى مەن «ەلەكتروندىق پارتيا» جۇيەسى تۇرعىندارمەن اراداعى كەرى بايلانىستى ەداۋىر وڭتايلاندىرا ءتۇستى. مىسالى، 2014 جىلى تەك قانا دەپۋتاتتار رەسپۋبليكا اۋماعىندا 20 مىڭعا جۋىق جەكە قابىلداۋلار وتكىزسە، وعان 1،2 ميلليونعا تارتا تۇرعىندار كەلىپ، 18 مىڭعا جۋىق وتىنىشتەر مەن شاعىمداردىڭ باسىم كوپشىلىگى وڭ شەشىمىن تاپقان. ال ءبىزدىڭ وبلىستاعى پارتيانىڭ قوعامدىق قابىلداۋلارىنا وتكەن جىلى وتكىزىلگەن 340 قابىلداۋلارعا 927 ادام ءوز ءوتىنىش-تىلەكتەرىمەن كەلگەن بولاتىن. حالىقتىڭ مۇڭ-مۇقتاجىنا قاشاندا بەيجاي قارامايتىن «نۇروتاندىقتار» وتىنىشتەردىڭ 32 (295) پايىزىنىڭ وڭ شەشىمىن تابۋىنا ىقپال ەتتى. قالعاندارى ءتيىستى ورگاندار مەن پارتيا وبلىستىق فيليالىنىڭ باقىلاۋىنا الىندى.
وسىنداي ناقتى شارالار حالىقتىڭ «نۇر وتان» پارتياسىنا دەگەن سەنىمىن بۇرىنعىدان دا ارتتىرىپ، اراداعى بايلانىسىن نىعايتا ءتۇستى.
پارتيا 2014 جىلى ءوز جۇمىسىنىڭ باستى باعىتتارىنىڭ ءبىرى – 12 پارتيالىق جوبانىڭ وڭىرلەردە بەلسەندى جۇزەگە اسىرىلۋىن باستى نازاردا ۇستادى. بۇل جوبالاردىڭ بۇگىنگى تاڭدا پارتيانىڭ يدەولوگيالىق جۇمىستارىنىڭ تەمىرقازىعىنا اينالعانى اقيقات. پارتيانىڭ «ءبىزدىڭ اۋىل»، «باقىتتى وتباسى»، «ارداگەرلەردى ارداقتايىق» سياقتى جوبالارى نەگىزىنەن الەۋمەتتىك توپتارعا ارنالعان. مىسالى، ەلىمىزدە وسى جوبا اياسىندا 850-دەن استام ۆولونتەرلىك توپتار ارداگەرلەرگە بەكىتىلگەن. سونداي-اق، رەسپۋبليكا بويىنشا جەتىم بالالارعا 360 پاتەر بولىنسە، تۇرمىس دەڭگەيى تومەن 2 مىڭ وتباسىنا ءتيىستى كومەك كورسەتىلىپ، اۋىلداردا بالالاردىڭ 2،5 مىڭعا جۋىق ويىن الاڭدارى مەن اۋلالىق سپورت نىساندارى قالپىنا كەلتىرىلگەن. مۇنداي يگى ىستەر ءبىزدىڭ وبلىسىمىزدا دا اتقارىلىپ، الدىمىزعا قويعان ماقساتتارىمىزدى ورىنداي بىلدىك. وتكەن جىلى «ارداگەرلەردى ارداقتايىق» جوباسى اياسىندا وبلىستاعى 298 ۇلى وتان سوعىسىنىڭ ارداگەرلەرىنە ءارتۇرلى الەۋمەتتىك كومەكتەر كورسەتىلدى. الەۋمەتتىك جانە مەديتسينالىق كومەكتەردىڭ الەۋمەتتىك كارتاسى جاسالدى. پارتيا وبلىستىق فيليالى «جاس وتان» جاستار قاناتىنىڭ بەلسەندىلەرى مەن ۇكىمەتتىك ەمەس ۇيىم وكىلدەرىنەن قۇرىلعان 1360 ەرىكتىلەر جاساقتالدى. ال تاياۋدا پارتيا جوباسى شەڭبەرىندە ۇلى جەڭىستىڭ 70 جىلدىعىنا وراي «جەڭىسكە تاعزىم!» پويىزى ءوڭىردىڭ تەمىر جول بەكەتتەرى بويلارىنا ورنالاسقان ەلدى مەكەندەردە بولىپ قايتتى. جەڭىستىڭ 70 جىلدىعىنا ارنالعان شارا بارىسىندا سوعىس جانە ەڭبەك ارداگەرلەرىنە، انالار مەن بالالارعا، جەرگىلىكتى تۇرعىندارعا مەديتسينالىق كومەكتەر كورسەتىلىپ، ارزانداتىلعان باعامەن اۋىل شارۋاشىلىعى ونىمدەرىن ساتۋ قامتاماسىز ەتىلدى. «ءبىزدىڭ اۋىل» جوباسى اياسىندا 2014 جىلى وبلىستا 343 تازالىق، اباتتاندىرۋ جانە كورىكتەندىرۋ شارالارى ۇيىمداستىرىلدى. جوبا شەڭبەرىندە بىرقاتار الەۋمەتتىك نىساندار جوندەۋدەن ءوتتى. ونىڭ ىشىندە كوشەلەرگە جارىقشامدار ورناتىلىپ، بالالاردىڭ ويىن الاڭشالارىن جاڭعىرتۋ قامتاماسىز ەتىلدى. «باقىتتى وتباسى» جوباسى اياسىندا وتكەن جىلى وبلىسىمىزدا 157 جەتىم بالاعا پاتەر بەرىلدى.
الەۋمەتتىك قولداۋ كورسەتۋ باعىتىنداعى جۇمىستار الداعى ۋاقىتتا ءوز جالعاسىن تاباتىن بولادى. سونىمەن قاتار، ەلىمىزدە جاستاردىڭ «ءساتتى قادام»، «ستوپ-قىلمىس» جانە «جاستار كادرلىق رەزەرۆى» سياقتى پارتيالىق جوبالارىنا 100 مىڭنان استام جاستار تارتىلعان. «نۇر وتان» پارتياسى بۇل جوبالاردا قالاعا كەلگەن اۋىل جاستارىنىڭ پروبلەمالارىنا ۇلكەن باسىمدىقتار بەرىپ وتىر. وبلىس بويىنشا «ءساتتى قادام» جوباسىنا 2014 جىلى 120 جاس تارتىلىپ، 3 ادام تاجىريبەدەن وتۋگە جىبەرىلسە، 1 ادام تۇراقتى جۇمىسقا ورنالاسقان. ال «STOP-قىلمىس» جوباسى اياسىندا ءوڭىر جاستارى ءۇشىن 4 مىڭنان استام ءتۇرلى فورماتتاعى 212 شارا ۇيىمداستىرىلدى. «جاستار كادرلىق رەزەرۆى» جوباسىنا وبلىس بويىنشا 108 جاس ازامات قاتىسىپ، ونىڭ ىشىندە 2 جەرلەسىمىز رەسپۋبليكالىق جوبا قورىتىندىسى بويىنشا جەڭىمپاز اتاندى.
«نۇر وتان» پارتياسىنىڭ ەلىمىزدە شاعىن جانە ورتا بيزنەستىڭ وركەندەپ، قانات جايۋىنا ۇلكەن قولداۋ كورسەتىپ كەلە جاتقانىن بارشا قوعام جاقسى بىلەدى.
بۇل ارادا پارتيانىڭ ۇلتتىق كاسىپكەرلىك پالاتاسىمەن بىرلەسكەن كەشەندى «مىقتى بيزنەس – قۋاتتى مەملەكەت» جوباسى ەلىمىزدە شاعىن جانە ورتا بيزنەس قوزعالىسىن ورىستەتە وتىرىپ، ەلىمىزدە وتباسىلىق بيزنەستىڭ ءداستۇرىن ورنىقتىرىپ، كاسىپكەرلىك رۋحتى قالىپتاستىرا ءبىلدى. ال ءبىزدىڭ وبلىستا اتالعان جوبا اياسىندا «ءوز كاسىبىڭدى باستا!»، «بيزنەس جانە مەن» سياقتى تاقىرىپتاردا اۋداندار جانە تاراز قالاسىندا وقىتۋ سەمينارلارى ۇيىمداستىرىلدى. ناتيجەسىندە 7 اۋىل تۇرعىنى ءوزىنىڭ جەكە كاسىبىن اشىپ، 12 ادام نەسيە الۋعا ءوتىنىش ءبىلدىردى.
كارىم ناسبەك ۇلى ءوز سوزىندە «نۇر وتان» پارتياسى ەلباسىنىڭ «نۇرلى جول – بولاشاققا باستار جول» جولداۋىنداعى ەلىمىزدەگى مۇمكىندىگى شەكتەۋلى جاندارعا قولداۋ كورسەتۋ ماقساتىندا بەرگەن تىكەلەي تاپسىرماسىنىڭ ورىندالۋى بويىنشا كوپتەگەن ناقتى ىستەردى جۇزەگە اسىرۋعا باس بولعانىن ايرىقشا اتاپ ءوتتى. ونىڭ ىشىندە، پارتيانىڭ «كەدەرگىسىز كەلەشەك» جوباسى اياسىندا ەلىمىزدە 12 مىڭ مۇگەدەك جۇمىسقا ورنالاستى. ونىڭ 7 مىڭعا جۋىعى تۇراقتى جۇمىسقا قابىلداندى. سونداي-اق، بۇل ماقساتتاعى جۇمىستارعا تىڭ سەرپىن بەرۋ جولىندا 400-دەن استام بوس ورىنداردىڭ جارمەڭكەسى وتكىزىلىپ، مۇمكىندىگى شەكتەۋلى جاندار ءۇشىن 750-دەن استام نىسانداردىڭ الەۋمەتتىك ينفراقۇرىلىمى ىڭعايلاستىرىلدى. پارتيا كوشباسشىسىنىڭ قولداۋىنىڭ ارقاسىندا بۇگىنگى تاڭدا ەلىمىزدە مۇمكىندىگى شەكتەۋلى جانداردىڭ تۇرمىس-تىرشىلىگى جاقسارا تۇسۋدە. بۇل جوبا ءبىزدىڭ وڭىردە دە تابىستى ىسكە اسىرىلۋى پارتيا وبلىستىق فيليالىنىڭ قاتاڭ باقىلاۋىندا بولدى. جۇرگىزىلگەن جۇيەلى جۇمىستاردىڭ ناتيجەسىندە وبلىستا وتكەن جىلى 819 مۇگەدەك، ونىڭ ىشىندە 494-ءى تۇراقتى جۇمىسپەن، 325 مۇمكىندىگى شەكتەۋلى ازامات ۋاقىتشا جۇمىسپەن قامتىلدى. سونداي-اق، 200-دەن استام مەملەكەتتىك جانە ءتۇرلى مەنشىك تۇرىندەگى نىساندارعا بارلىق تالاپتارعا ساي پاندۋستار ورناتىلدى.
تورتىنشىدەن، «نۇر وتان» پارتياسى وسى جىلدارى ەلىمىزدە اشىق قوعامدىق پىكىردى قامتاماسىز ەتۋدە ۇلكەن تىرلىكتەر اتقاردى. بۇگىندە پارتيا جۇرگىزگەن ناقتى شارالاردىڭ ارقاسىندا ماقساتى بولەك بولعانىمەن، مۇددەسى ءبىر ازاماتتىق قوعام ينستيتۋتتارىنىڭ وكىلدەرى ەلىمىزدىڭ وركەندەۋى جانە تۇراقتىلىق پەن ءوزارا كەلىسىمنىڭ قالىپتى دامۋى جولىندا ورتاق پىكىرگە ءۇن قوسىپ وتىر. وتكەن جىلى وسىنداي ورتاق پىكىردىڭ الاڭىنا اينالعان دەموكراتيالىق كۇشتەردىڭ جالپىحالىقتىڭ كواليتسياسىنىڭ 5 وتىرىسى وتكىزىلىپ، وندا ەڭ وزەكتى ماسەلەلەر تالقىلاندى. ولاردىڭ قاتارىندا، قازاقستاننىڭ ەۋرازيالىق ەكونوميكالىق وداققا كىرۋى، سىبايلاس جەمقورلىققا قارسى ستراتەگيا، كاسىپتىك وداقتار، جەرگىلىكتى ءوزىن-ءوزى باسقارۋ جانە اكىمدەردىڭ سايلاۋى تۋرالى زاڭداردىڭ جوبالارى بار.
وسى شارالاردىڭ بارلىعى ءبىرىنشى كەزەكتە حالىقتى كوپتەن الاڭداتىپ جۇرگەن تۇيتكىلدى ماسەلەلەرىنىڭ جۇيەلى شەشىلۋىنە ىقپال ەتسە، ەكىنشىدەن، ەلىمىزدەگى اسا ماڭىزدى رەفورمالاردىڭ تىڭ سەرپىن الۋىنا ءوز سەپتىگىن تيگىزدى. كواليتسيا قۇرامىنا ەلىمىزدەگى 6 جەتەكشى ساياسي پارتيا، 18 ءىرى قوعامدىق بىرلەستىك جانە 500-دەن استام وڭىرلىك ۇكىمەتتىك ەمەس ۇيىمدار كىرىپ وتىر. ەڭ باستىسى، بۇگىندە جالپىحالىقتىق كوليتسيا 6،5 ميلليون حالىقتىڭ مۇددەسىن بىلدىرەتىن ۇلكەن ۇيىمعا اينالدى. دەموكراتيالىق كۇشتەر كواليتسياسىنىڭ ءتيىستى قۇرىلىمى ءبىزدىڭ وبلىستا دا قۇرىلعان.
بۇگىندە وبلىستىق دەموكراتيالىق كۇشتەر كواليتسياسىنىڭ قۇرامىنا 5 ساياسي پارتيانىڭ جەرگىلىكتى قۇرىلىمدارى مەن 16 قوعامدىق بىرلەستىك پەن ۇيىمدار كىرىپ وتىر. وبلىس باسشىسى وسى ورايدا ويىن ورتاعا، پىكىرىن ءبىر ارناعا توعىستىرعان وسى قوعامدىق ۇيىم باسشىلارىنا راحمەت ايتىپ، مارتەبەسى بيىك بۇل ۇيىمنىڭ الداعى جۇمىسىنا ساتتىلىك تىلەدى.
بەسىنشىدەن، پارتيا ءوزىنىڭ بارلىق ىشكىپارتيالىق جۇمىستارىن اشىقتىق جانە جاريالىلىق جاعدايىندا ۇيىمداستىرىپ وتىرعان بىرەگەي قوعامدىق ۇيىم. اشىقتىق پەن جاريالىلىق ءپرينتسيپىن ۇستاعان «نۇر وتان» پارتياسى 2014 جىلى تۇڭعىش رەت كىرىستەر مەن شىعىستار ەسەبىن جاريا ەتتى. پارتيا قۇرىلىمدارى ءتيىمسىز شىعىندار كولەمىن ەداۋىر قىسقارتتى جانە ءاربىر «نۇروتاندىقتىڭ» پارتيالىق جاۋاپكەرشىلىگى ارتتى. سونىمەن قاتار، پارتيا مۇشەلەرىن تۇگەندەۋ جۇمىستارى مەن جاڭا ۇلگىدەگى پارتيا بيلەتتەرىن اۋىستىرۋ اياقتالدى. پارتيا قاتارىن «تازالاۋ» ناتيجەسىندە پارتيالىق ىشكىتارتىپتى بۇزعان 25 مىڭنان استام ادام پارتيا قاتارىنان شىعارىلىپ، بۇگىنگى تاڭدا پارتيا مۇشەلەرىنىڭ سانى 849 300 ادامدى قۇراپ وتىر. سونداي-اق، پارتيانىڭ ەلەكتروندى ورتالىقتاندىرىلعان دەرەكقورى جاسالدى. پارتيا ءوز قۇرىلىمدارىنىڭ ماتەريالدىق-تەحنيكالىق بازاسىن نىعايتۋ ماسەلەسىن ەشۋاقىتتا نازاردان تىس قالدىرعان ەمەس. تاياۋدا عانا پارتيا مەركى، مويىنقۇم، تالاس، قورداي جانە ت.رىسقۇلوۆ اۋداندىق فيليالدارىنىڭ زاماناۋي ۇلگىدەگى بىرنەشە جاڭا كومپيۋتەرمەن قامتاماسىز ەتىلۋى وسى سوزدەرىمنىڭ دالەلى بولسا كەرەك.
– اعىمداعى جىل رەسپۋبليكامىزدا «باستاۋىش پارتيا ۇيىمىنىڭ جىلى» بولىپ بەلگىلەنگەنىن بارشاڭىز بىلەسىزدەر. سوندىقتان دا، بارلىق ىشكىپارتيالىق، قوعامدىق-ساياسي جانە كوپشىلىك شارالار وسى جىل اياسىندا وتكىزىلەتىن بولادى. بۇگىندە وبلىستاعى 399 باستاۋىش پارتيا ۇيىمدارىندا 64 357 پارتيا مۇشەسى ەسەپتە تۇرادى. سونىمەن قاتار، باستاۋىش پارتيا ۇيىمدارى ىشىنەن 1440 پارتيالىق توپتار قۇرىلعان. جىل باسىنان باستاپ باستاۋىش پارتيا ۇيىمدارىمەن اراداعى بايلانىستى نىعايتۋ ماقساتىندا كەشەندى جۇمىستار قولعا الىندى. پارتيانىڭ وبلىستىق، قالالىق جانە اۋداندىق فيليالدارى ساياسي كەڭەسى مەن ساياسي كەڭەسى بيۋروسىنىڭ مۇشەلەرى باستاۋىش پارتيا ۇيىمدارىنا بەكىتىلدى.
سونىمەن قاتار، پارتيا اۋماقتىق فيليالدارىنىڭ توراعالارىنا اي سايىن باستاۋىش پارتيا ۇيىمدارىنىڭ جينالىستارىنا قاتىسىپ، پارتيا ۇيىمدارىنىڭ تىنىس-تىرشىلىگىمەن ەتەنە تانىسۋ مىندەتى جۇكتەلدى. فيليال توراعالارى وتكەن ەكى ايدا وسىنداي 22 كەزدەسۋ-جينالىستارعا قاتىستى.
قورىتا ايتقاندا، «نۇر وتان» پارتياسىنىڭ بۇگىنگى تاڭداعى الدىنا قويعان ەڭ باستى ماقساتى – قوعامداعى پارتيا بەدەلىن كوتەرۋ، ءيميدجىن ارتتىرۋ، قوعام بىرلىگى مەن مەملەكەت تۇتاستىعىن ساقتاۋعا، ۇلتتىق قۇندىلىقتارىمىزدى جاڭعىرتۋعا، قازاقستاندىق ءپاتريوتيزمدى ورنىقتىرۋعا جانە ىشكىپارتيالىق ءتارتىپتى نىعايتۋعا باعىتتالىپ وتىر، – دەدى كارىم ناسبەك ۇلى.
«نۇر وتان» پارتياسى وبلىستىق فيليالىنىڭ توراعاسى، وبلىس اكىمى كارىم كوكىرەكباەۆ كۇن تارتىبىندەگى ەكىنشى ماسەلە بويىنشا جاساعان بايانداماسىندا الداعى 26 ساۋىردە وتەتىن پرەزيدەنت سايلاۋىنىڭ ەل تاعدىرى ءۇشىن تاريحي جاۋاپكەرشىلىك جۇكتەيتىندىگىنە توقتالدى.
– ۇستىمىزدەگى جىلدىڭ 14 اقپانىندا ەلىمىزدەگى تاتۋلىق پەن بەرەكەلى بىرلىكتىڭ نىعايۋىنا ەرەكشە ۇلەس قوسىپ كەلە جاتقان قازاقستان حالقى اسسامبلەياسىنىڭ كەڭەسى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن وتكىزۋ تۋرالى باستاما كوتەرگەنىن جاقسى بىلەسىزدەر، – دەدى كارىم ناسبەك ۇلى. – بۇل باعالى باستاما كوپ ۇلتتى قازاقستاندىقتاردىڭ قىزۋ قولداۋىنا يە بولدى. ەڭ باستىسى – قاراپايىم حالىقتىڭ ويىنان شىعىپ وتىر. جالپى، الداعى 2016 جىلى – رەسپۋبليكا پرەزيدەنتى مەن پارلامەنت ءماجىلىسىنىڭ سايلاۋلارى قاتار ءوتۋى ءتيىس ەدى.
ال قازاقستان رەسپۋبليكاسى كونستيتۋتسياسىنىڭ 41-بابى، 1،3-تارماقتارىندا ەكى سايلاۋدىڭ تۇسپا-تۇس كەلمەۋى اشىق كورسەتىلگەن. وسىنداي ماڭىزدى ماسەلەگە ەرەكشە نازار اۋدارعان ەلىمىزدىڭ كونستيتۋتسيالىق سوتى ءوز شەشىمىن جاساپ، كەزەكتەن تىس پرەزيدەنت سايلاۋىن وتكىزۋگە ەشقانداي قۇقىقتىق كەدەرگىنىڭ جوق ەكەندىگىن رەسمي مالىمدەدى. ۇستىمىزدەگى جىلدىڭ 25 اقپانى كۇنى مەملەكەت باسشىسى «قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ تۋرالى» تاريحي جارلىققا قول قويدى. ەل ەرتەڭىن ويلاعان نۇرسۇلتان ءابىش ۇلى سول كۇنى قازاقستان حالقىنا ارناپ ءوزىنىڭ ۇندەۋىن جاريا ەتتى.
تۋعان حالقىنا ارناعان جۇرەكجاردى ۇندەۋىندە ەلباسى «سايلاۋ – اسا ماڭىزدى كونستيتۋتسيالىق جانە پاتريوتتىق اكت» دەپ، الداعى ساياسي ناۋقاننىڭ ءمانى مەن ماقساتىن ءبىر-اق سوزبەن اشىپ بەردى. ەل بىرلىگى مەن تۇعىرلى تۇتاستىعىنىڭ كەپىلىنە اينالعان نۇرسۇلتان ءابىش ۇلى سايلاۋدى مەرزىمىنەن بۇرىن وتكىزۋ تۋرالى ۇندەۋىندە بىرنەشە ماڭىزدى فاكتوردى ايقىنداپ بەردى.
بىرىنشىدەن، بۇل شەشىمدى الەمدە ورىن الىپ وتىرعان گەوساياسي جاعدايدىڭ كورىنىستەرىمەن تىعىز بايلانىستىرا وتىرىپ، ەلىمىزدەگى تۇراقتىلىق پەن قوعام بىرلىگىن نىعايتۋعا جەتە كوڭىل ءبولدى. ەكىنشىدەن، ەكونوميكالىق داعدارىستىڭ الدىن الۋعا باعىتتالعان شارالاردىڭ ۋاقىت كۇتتىرمەس ساتتەرىنە ەرەكشە توقتالدى. ۇشىنشىدەن، بۇگىنگى كۇردەلى ساياسي شاقتا ۇلتتىق قاۋىپسىزدىكتى قامتاماسىز ەتۋ مىندەتىن ايقىندادى. سونىمەن قاتار، قازاقستاننىڭ ورنىقتى دامىپ كەلە جاتقان ىشكى جانە سىرتقى ساياساتىن ءارى قاراي تابىستى جالعاستىرۋعا باعىتتادى.
بۇل سايلاۋ – ەلىمىزدە ىرگەلى ىستەرى العا باسقان، تىنىمسىز تىرلىكتەرى بيىك بەلەستەردى باعىندىرعان ەلباسى، ۇلت كوشباسشىسى، پارتيا ليدەرى ن.ءا.نازارباەۆتىڭ ساليقالى ساياساتى ارقاسىندا اتقارىلعان ۇلى ىستەردەن ساباقتاستىق تاباتىن ساياسي شارا بولارىنا سەنىمدىمىن.
اعىمداعى جىلدىڭ 26-28 اقپانىندا وبلىستاعى بارلىق 399 باستاۋىش پارتيا ۇيىمدارى جينالىستارىندا جانە 2-3 ناۋرىز كۇندەرى پارتيا تاراز قالالىق جانە اۋداندىق فيليالدارى كونفەرەنتسيالارىندا پارتيا توراعاسى ن.ءا.نازارباەۆتى قازاقستان رەسپۋبليكاسىنىڭ پرەزيدەنتتىگىنە كانديدات ەتىپ ۇسىنۋ تۋرالى ماسەلە كوتەرىلدى. بۇل ماسەلەدەن ءبىز دە سىرت قالا المايمىز. سوندىقتان، اتالعان ماسەلەگە بايلانىستى كونفەرەنتسيا دەلەگاتتارى وزدەرىنىڭ وي-پىكىرلەرىن بىلدىرەدى دەگەن ويدامىن.
ءبىزدى الدا وسىنشاما اۋقىمى ۇلكەن، مارتەبەسى جوعارى، ءمانى بيىك قىرۋار كەلەلى ىستەر كۇتىپ تۇر. اعىمداعى جىلدىڭ 11 ناۋرىزى كۇنى استانا قالاسىندا «نۇر وتان» پارتياسىنىڭ ءحVى سەزى ءوز جۇمىسىن باستاعالى وتىر. پارتيانىڭ باس فورۋمىندا ەل ومىرىندەگى كوپتەگەن قوعامدىق-ساياسي جانە الەۋمەتتىك-ەكونوميكالىق دامۋ باعىتىنىڭ ناقتى جولدارى ايقىندالارى انىق. وسىنداي كۇردەلى ءارى جاۋاپتى شاقتاردا ويىمىز – ورتاق، ماقساتىمىز – ءبىر، نيەتىمىز نۇرلى بولسىن، ارداقتى ارىپتەستەر، – دەدى كارىم ناسبەك ۇلى ءسوزىنىڭ سوڭىندا.
حابارلاما اياقتالعان سوڭ ونى تالقىلاۋعا كەزەك بەرىلدى. جارىسسوزگە شىققان ازاماتتار پارتيانىڭ ەسەپتى كەزەڭدە اتقارعان سان سالالى جۇمىستارىنىڭ كوڭىلدەن شىعىپ وتىرعانىن تىلگە تيەك ەتىپ، ءوز ويلارىن ارى قاراي الداعى 26 ساۋىردە وتەتىن پرەزيدەنتتىك سايلاۋدىڭ ماڭىزدىلىعى تۇرعىسىندا ساباقتادى.

جاندار كارىباي ۇلى، وبلىستىڭ قۇرمەتتى ازاماتى، ساياساتتانۋشى:

– الەمدەگى، ماسەلەن وڭتۇستىك امەريكاداعى، افريكاداعى، ازياداعى كەيبىر بوداندىقتان قۇتىلعان ەلدەردىڭ عاسىرعا تەڭ مەزگىلدە قول جەتكىزگەن تابىستارىن مەملەكەتىمىز نەبارى 15 جىلدا-اق ەڭسەردى. الەمدەگى وزىق 50 ەلدىڭ قاتارىنان ورىن العان قازاقستاننىڭ ەندىگى پرەزيدەنتىنىڭ كىم بولاتىندىعى حالقىمىزعا ءبارىبىر ەمەس. بۇگىنگى شىققان بيىكتى الاسارتپاۋ، قايتا ونى شىڭعا شىعارۋ قازاقستاندىقتاردىڭ قانىندا بار قاسيەت. ولاي بولسا «ەلدى باسقارۋ تىزگىنىن كىمگە سەنىپ تاپسىرۋعا بولادى؟» دەگەن سۇراق اركىمدى دە مازالاۋى ءتيىس. قازاقستاننىڭ اينالاسى 23 جىلدىڭ بەدەرىندە قول جەتكىزگەن تابىستارىنىڭ سىرى نەدە؟ ەلباسىدا. مۇنى بۇگىن ايتپاساق، قاشان، قايدا ايتامىز؟
ەگەر، قازاق ەلىن دۇنيەجۇزى قاۋىمداستىعى وزگە ەلدەرمەن تەرەزەسى تەڭ مەملەكەت رەتىندە تانىسا، قازاقستان بىرىككەن ۇلتتار ۇيىمىنا، 80-نەن استام حالىقارالىق ۇيىمدارعا، كونۆەنتسيالارعا مۇشە بولسا، وزگەلەر ءبىزدىڭ ەلگە ستراتەگيالىق ارىپتەسى رەتىندە قاراسا، ەلىمىزدى سارا ءارى دارا ىشكى جانە سىرتقى ساياساتى ءۇشىن قادىرلەسە، ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتسەك، «ەكسپو-2017» حالىقارالىق كورمەسىنىڭ استانادا ءوتۋىن 150-دەن استام مەملەكەتتەردىڭ اراسىنان وزا شاۋىپ جەڭىپ السا، وندا ول نۇرسۇلتان ءابىش ۇلىنىڭ الەمدەگى بەدەلى مەن تىنىم كورمەي ەتكەن ەڭبەگىنىڭ، توككەن تەرىنىڭ ناتيجەسى.
شيرەك عاسىرعا جۋىق ۋاقىت ىشىندە ەلىمىزدە ەتنوسارالىق رۋحاني بىرلىك، ازاماتتىق كەلىسىم، ساياسي تۇراقتىلىق ورنىعىپ، كەيبىر ەلدەردەگىدەي تىنىشتىعىمىز كەتىپ، تىنىسىمىز تارىلماسا، ۇلتىمىزدىڭ تاريحي زەردەسىنە قايتا ورالىپ، قازاق حاندىعىنىڭ 550 جىلدىق تويىن ۇلىقتاپ جاتساق، قازاقستان حالقى اسسامبلەياسى الەمگە ونەگە رەتىندە تانىلسا، بۇل دا ۇلت كوشباسشىسىنىڭ ايرىقشا ىنتاسى مەن ىقىلاسىنىڭ، ۇلتجاندىلىعىنىڭ ءىس جۇزىندەگى كورىنىسى.
«ماڭگىلىك ەل» يدەياسىن باستى باعدار ەتىپ، تاۋەلسىزدىگىمىزدىڭ دامۋ داڭعىلىن «نۇرلى جولعا» اينالدىرۋ، الەمدەگى وزىق 30 ەلدىڭ قاتارىنان ورىن الۋ بۇكىلحالىقتىق مەجە رەتىندە كۇن تارتىبىنە قويىلىپ، ونىڭ ۇدەسىنەن شىعۋعا پارمەندى شارالار قولدانىلىپ جاتسا، و دا قازاق توپىراعىنداعى جاسامپازدىق قۇبىلىستاردىڭ تىكەلەي باستاۋشىسى، قوعام دامۋىنىڭ «قازاقستاندىق جول» دەپ اتالاتىن جاڭا مودەلىن قالىپتاستىرۋشى نۇرسۇلتان ءابىش ۇلىنىڭ كەمەڭگەرلىگى. ءبىر سوزبەن ءتۇيىپ ايتساق، تاۋەلسىز ەلدىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ ءوزى باستاعان كەلەلى كەمەل ىستەرىن ءوزى جالعاستىرۋعا ابدەن لايىق. كونفەرەنتسيا اتىنان «نۇر وتان» پارتياسىنىڭ الداعى 16- سەزىنىڭ قاراۋىنا 26 ساۋىردە وتەتىن كەزەكتەن تىس سايلاۋدا پرەزيدەنتتىككە ۇمىتكەر ەتىپ «نۇر وتان» پارتياسىنىڭ كانديداتۋراسىن ۇسىنامىن.

باتىربەك قۇلەكەەۆ، «نۇر وتان» پارتياسى جۋالى اۋداندىق فيليالىنىڭ توراعاسى، اۋدان اكىمى:

– «نۇر وتان» پارتياسى قۇرىلعان كۇننەن باستاپ، ارتتا قالعان بەلەسى مول، بەدەرى ايقىن 16 جىل ىشىندە قازاقستاننىڭ ساياسي كەڭىستىگىندە جەتەكشى قوعامدىق بىرلەستىككە اينالدى. پارتيا كوشباسشىسىنىڭ زور بەدەلى قازىرگى تاڭدا سەنىمدىلىكتىڭ باستى كاپيتالى بولعانى تاريحي شىندىق.
مەن ەلباسى نۇرسۇلتان ءابىش ۇلى نازارباەۆتى قازاقستان رەسپۋبليكاسىنىڭ پرەزيدەنتتىگىنە كانديدات ەتۋ جونىندەگى ۇسىنىستى تولىقتاي قولدايمىن. ويتكەنى، تاۋەلسىز قازاق ەلىنىڭ وسى جىلداردا قول جەتكىزگەن تولايىم تابىستارى مەن مەملەكەت تۇتاستىعىن ساقتاۋ، كوپ ۇلتتى حالقىمىزدىڭ تاتۋلىعى مەن ءوزارا كەلىسىمىن نىعايتۋداعى كەمەڭگەر ساياساتكەر نۇرسۇلتان ءابىش ۇلى نازارباەۆتىڭ ەڭبەگى ولشەۋسىز.
ءبىز وسىدان ەكى كۇن بۇرىن پارتيا جۋالى اۋداندىق فيليالىنىڭ كەزەكتەن تىس كونفەرەنتسياسىن وتكىزدىك. كونفەرەنتسيادا جارىسسوزگە شىققان اۋىلشارۋاشىلىعى، كاسىپكەرلىك، ءبىلىم، بيۋدجەتتىك سالا، ەتنومادەني ورتالىقتار مەن جاستار وكىلدەرى پارتيا توراعاسى نۇرسۇلتان ءابىش ۇلى نازارباەۆتىڭ كانديداتۋراسىن ۇسىنۋ تۋرالى ماسەلەنى ءبىراۋىزدان قولدادى. بۇل تابيعاتى قاتال، جۇرتى جومارت جۋالى حالقىنىڭ الداعى ساياسي ناۋقانعا باستاعان اۋىزبىرشىلىگىنىڭ العاشقى ءساتتى قادامى.

مەيرامبەك تولەپبەرگەن، «قازاقستان-تاراز» تەلەارناسىنىڭ ديرەكتورى:

– كەز-كەلگەن قوعام ءۇشىن حالىق تاڭداۋىنان اسقان كۇش-جىگەر بولمايدى جانە بولعان دا ەمەس. ونى قازاق ەلىنىڭ ارعى-بەرگى تاريحي جولىنان دا انىق اڭعارۋعا بولادى. « ۇلىنى ۇلى تۇتسا قۇت بولار» دەپ، وزىق ويلى اتا-بابالارىمىز ايتقانداي، قازاقستان حالقى تاۋەلسىزدىك جىلدارى وتكەن سايلاۋدا ءوز كوشباسشىسىن تاڭداۋدا قاتەلىك جىبەرمەگەنى ۋاقىت اقيقاتى. سۇيىكتى حالقىنىڭ زور سەنىمىنە يە بولعان نۇرسۇلتان نازارباەۆ وزىنە جۇكتەلگەن حالىق الدىنداعى پارىزى مەن مىندەتىن اسا جاۋاپكەرشىلىكپەن ورىنداپ، كەمەڭگەرلىك ساياساتىمەن قازاق ەلىن الەمگە تانىتتى. ال قازاق ەلىنىڭ باعىنا جاراتىلعان ەلباسىنىڭ ەكىنىڭ ءبىرى جەتە المايتىن ليدەرلىك بەدەلىمەن حالىقارالىق مارتەبەنىڭ بيىگىنە كوتەرىلگەنى بارشا قازاقستاندىقتار ءۇشىن ورتاق ابىروي ءارى ماقتانىش دەپ بىلەمىن.
ورتاق وتانىمىزدىڭ بەرەكەسى مەن بىرلىگىنە، تاتۋلىعى مەن دوستىعىنا تياناقتى دانەكەر بولىپ وتىرعان قازاقستان حالقى اسسامبلەياسى كەڭەسىنىڭ بيىل كەزەكتەن تىس پرەزيدەنت سايلاۋىن وتكىزۋ جونىندەگى باستاماسى الەمدىك ەكونوميكالىق داعدارىستى ەڭسەرۋدىڭ، تۇراقتىلىقتى ساقتاۋعا جانە ەل ەكونوميكاسىن دامىتۋعا زور مۇمكىندىك بەرۋ ەكەنىن اتاپ وتكىمىز كەلەدى.
جالپىۇلتتىق قولداۋعا يە بولعان بۇل سايلاۋ قارساڭىندا بايتاق ەلىمىزدىڭ تۇكپىر-تۇكپىرىنەن سان ءتۇرلى كاسىپ يەلەرى، اعا بۋىن مەن جاس ۇرپاق وكىلدەرى، قاراپايىم ادامدار، ساياساتكەرلەر مەن قوعامتانۋشىلار ەلباسىنىڭ اتىنا جولداپ جاتقان ۇندەۋلەرى مەن حاتتارىندا «ءسىز وتانعا قىزمەت ەتۋدىڭ ايرىقشا ۇلگىسىن كورسەتىپ كەلەسىز» دەپ، ءوز ويلارىن اشىق بىلدىرۋدە. وتانداستارىمىزدىڭ ورىندى جانە ورتاق وي-پىكىرگە كەلىپ، ءتۇيىن جاساۋىنا تولىق نەگىز بار. وعان قازاقستاننىڭ ەگەمەندىك جىلدارى قول جەتكىزگەن جەتىستىكتەرى مەن قارقىندى دامۋى دالەل بولىپ وتىر. مەن دە ەل ازاماتى رەتىندە وسى پىكىرگە قوسىلامىن.
ورايى كەلگەن سوڭ ءبىر ءجايتتى ايتسام دەيمىن. قازاق ءباسپاسوزىنىڭ قاراشاڭىراعى – «ەگەمەن قازاقستان» گازەتىندە قىزمەت ەتىپ جۇرگەنىمدە، ەلباسىنىڭ الىس-جاقىن، اسىرەسە، بىزگە بەيتانىس نەبىر مارقاسقا مەملەكەتتەرگە ىسساپارعا بارعان كەزىندە باسقا دا ارىپتەستەرمەن بىرگە بولعانىمدى قۇرمەتپەن ەسكە الامىن. قازاق «اتىڭ باردا جەر تانى» دەيدى. بۇل ءسوزدىڭ قۇدىرەتىن مەن سول كەزدە سەزىندىم. تالاي الپاۋىت ەلدىڭ ءومىرىن كورىپ، تاڭداي قاقتىق. «بىزدە دە وسىنداي بولادى ما ەكەن؟» دەپ تە ويلادىق. ۇلى دۇنيەنىڭ ءسان ساۋلەتى مەن تاريحى عاسىرلار قويناۋىنا تەرەڭدەپ كەتەتىن شاھارلاردىڭ كەرەمەتىن كورىپ، بىزدە دە وسىنداي بولسا ەكەن دەپ ارماندادىق.
ارادا كوپ جىلدار وتكەن جوق. سول تاڭداي قاقتىرىپ، كوز سۇيسىندىرگەن زامان عاجايىپتارى تاماشا كەيپىمەن، مۇلدەم جاڭاشا تۇرلەنۋىمەن قازاق ەلىنىڭ بايتاق دالاسىنا كەلىپ ورنىقتى. عاسىرعا بەرگىسىز عالامات دەرسىڭ. سونىڭ ءبىر جارقىن مىسالى رەتىندە جاڭا ەلوردامىز استانا قالاسىنىڭ بۇل كۇندەرى الەمدەگى ەڭ تارتىمدى، ەڭ كورىكتى، جەر دۇنيەنىڭ نازارىن اۋدارعان كەرەمەتىن ايتساق تا جەتكىلىكتى. مىڭ ءبىر ءۇمىتتىڭ يەسى دە، كيەسى دە ەندى ءبىزدىڭ ەلدە. تۇلا بويىڭا ماقتانىش سەزىم ۇيالاتقان، ءسويتىپ جاندۇنيەڭدى وياتقان تاريحي ءسات ۇلتىڭنىڭ بويتۇمارىنداي كورىنسە، نەگە اسەرگە بولەنبەيسىڭ؟
ال وسىنىڭ بارلىعى ەل تاۋەلسىزدىگىنىڭ جەمىسى. ءبىر ءۇيدىڭ بالاسىنداي، ءبىر قولدىڭ سالاسىنداي بولعان، بايتەرەك شاڭىراقتى كوتەرگەن ەلباسى نۇرسۇلتان نازارباەۆتىڭ تالاي ءتىس قاققان ساياساتكەرلەردى، دۇنيەنىڭ تۇتقاسىن ۇستاپ تۇرعان مەملەكەتتىڭ باسشىلارىن ءوزىنىڭ دانالىعىمەن، اللا تاعالا بەرگەن ەرەكشە قاسيەتتەرىمەن وزىنە قاراتا ءبىلىپ، ساناستىرعان ساتتەرى مىڭنان ءبىر مەزەت ەمەس، ەل تىزگىنىن ۇستاعاننان بەرگى تۇتاس دارا قاسيەتى بولىپ كەلەدى.
سوناۋ توقسانىنشى جىلدارى قازاق دەگەن ەلدى كورمەك تۇگىلى ەستىمەگەندەر كوپ ەدى عوي. ەندى ءبىزدىڭ قالامگەر ارىپتەستەرىمىز عانا ەمەس، شەت ەلدىك بۇقارالىق اقپارات قۇرالدارىنىڭ وكىلدەرى قازاقستانعا قىزىعا قارايدى. حالىق جازۋشىسى شەراعاڭ، شەرحان مۇرتازا ەل تاۋەلسىزدىگىنىڭ باستاۋىندا «ەلباسى بىرەۋ، قالعانىمىز تىرەۋ بولايىق» دەپ اقجارىلقاپ زاماننىڭ قازاق كوگىندە جۇلدىز بولىپ جاناتىنىن تالاي جولجازبالارىندا جازدى. قازاق جۋرناليستيكاسىنىڭ اتاسى بولعان اعانىڭ ءسوزى شىندىققا اينالدى.
ءبىز وسى ويلارىمىزدى ايتقاندا الداعى پرەزيدەنت سايلاۋىنا ەلباسىنىڭ كانديداتۋراسىن ۇسىنۋ جونىندە بۇگىنگى مىنبەردەن ەستىلىپ وتىرعان ەلدىك مۇددەنى كوزدەگەن كەلەلى سوزدەردىڭ تارقاۋى قازاق ەلىنىڭ ءوسىپ-وركەندەۋىمەن ورنەكتەلىپ وتىرعانىنا تاعى دا كوز جەتكىزۋگە بولادى. حالىقتىق تاڭداۋ – حالىقتىڭ ءوز تاعدىرى. سول سەبەپتى الداعى سايلاۋ قوعامدىق ساياسي جانە تاريحي ماڭىزى، ءسوز جوق بىرلىككە باستايدى. ەلباسىنىڭ ماڭىنا توپتاسۋعا شاقىرادى.
كونفەرەنتسيادا سونىمەن قاتار «نۇر وتان» پارتياسى وبلىستىق فيليالى پارتيالىق باقىلاۋ كوميسسياسىنىڭ توراعاسى، وبلىستىق ءماسليحاتتىڭ دەپۋتاتى اساۋباي مايلىباەۆ، «ءدنىپرو» ۋكراين ەتنومادەني ورتالىعىنىڭ توراعاسى فەدور كليمەنكو، «جاڭا جامبىل فوسفور زاۋىتى» باستاۋىش پارتيا ۇيىمىنىڭ توراعاسى، «پارتيانىڭ 50 تۇلعاسى» جوباسىنىڭ قاتىسۋشىسى ارمان قاراعاليەۆ ءسوز سويلەپ، جينالعانداردى «نۇر وتان» پارتياسىنىڭ توراعاسى نۇرسۇلتان ءابىش ۇلى نازارباەۆتى قازاقستان رەسپۋبليكاسىنىڭ پرەزيدەنتتىگىنە كانديدات ەتىپ ۇسىنۋعا شاقىردى.
باسقوسۋدا سونداي-اق، «نۇر وتان» پارتياسى وبلىستىق فيليالى ساياسي كەڭەسىنىڭ قۇرامىنا وزگەرىستەر ەنگىزىلىپ، پارتيانىڭ استانا قالاسىندا وتەتىن ءحVى سەزىنە دەلەگاتتار سايلاندى. كونفەرەنتسيا بارىسىندا كۇن تارتىبىندەگى ماسەلەلەر تولىعىمەن قارالىپ، ءتيىستى قاۋلى قابىلداندى.

تۇرسىنبەك سۇلتانبەكوۆ،
«اق جول».

سۋرەتتەردى تۇسىرگەن
اقادىل رىسماحان.