انالار – اسىل جاندار، شۋاق بوپ شاشىلعاندار!

ايەل — انا، ايەل — ءومىر، ايەل — وتباسىنىڭ وزەگى، شاڭىراقتىڭ شاتتىعى. ادامزاتقا ۇرپاق سىيلاعان ۇلى قۇدىرەت يەسىنىڭ ەسىمى قاشاندا قاستەرلى. سول سەبەپتى دە ۇلى عۇلامالار «اناڭدى مەككەگە ءۇش رەت ارقالاپ اپارساڭ دا قارىزىڭنان قۇتىلا المايسىڭ» دەپ بەكەرگە ايتپاعان. قۇرساعى التىن انالاردان ادامزاتتىڭ نەبىر الىبى جاراتىلعان. انا سونىسىمەن اسىل، سونىسىمەن تۇعىرى بيىك، ءار ءسوزى وسيەت. بارشامىز ءۇشىن ونىڭ جۇرەگى مەيىرىمدى، قولى قايىرىمدى. ادامزات باستان وتكەرگەن نەبىر تار جول تايعاق كەشۋ مەن الماعايىپ اۋىر كەزەڭدەردە دە انا ارتتا قالعان ەمەس، ۇرپاعىنىڭ امان-ەسەندىگى ءۇشىن جانىن ساداعا ەتكەن. مىنە، وسى ءۇشىن بۇكىل الەم انالار مەرەكەسىن ەرەكشە قاستەرلەيدى، زور قۋانىشپەن قارسى الادى. ول توي كوكتەمنىڭ العاشقى كۇنىنەن-اق باستالىپ جاتاتىنى سودان.

سونداي مەرەكە لەگى وبلىسىمىزدا ءار جەردە وتۋدە. كەشە وبلىس ورتالىعىنداعى «بالاساعۇن» ورتالىق كونتسەرت زالىندا وبلىس باسشىلارىنىڭ قاتىسۋىمەن ۇلكەن سالتاناتتى جيىن ءوتتى. مەرەكە يەلەرىن قۇشاق جايا قارسى العان وبلىسىمىزدىڭ باس مادەنيەت سارايىنان شىن مانىندە ەرەكشە جىلىلىق پەن مەيىرىمنىڭ لەبى ەسىپ تۇرعانداي سەزىلدى. كىرەبەرىس دالىزدەن باستاۋ العان مەرەكەلىك بەزەندىرۋدىڭ سوڭعى نۇكتەسى ساحنادا تۇيىندەلگەن. ورتادا ورنالاسقان الىپ ەكراندى جان-جاعىن كومكەرە قىرىققا جۋىق ورتا كولەمدەگى لەد-ەكراندار گۇل بەينەسىندە توپتاستىرىلىپ، ەرەكشە ۇيلەسىمدىلىك تاپقان. ونداعى گرافيكالىق ويۋلار دا ساحنا كوركىنە ودان سايىن كورىك بەرە ءتۇستى.
سالتاناتتى كەشتە اۋليەاتانىڭ ءار ايماعىنان شاقىرتىلعان قىز-كەلىنشەكتەر مەن انالاردى وبلىس اكىمىنىڭ ءبىرىنشى ورىنباسارى بەكبولات ورىنبەكوۆ قۇتتىقتادى. ول ءوز سوزىندە تابيعات – انانى ۇيقىسىنان وياتىپ كەلەتىن انالار مەرەكەسىنىڭ ورنى ەرەكشە، ءمانى بولەك ەكەنىنە توقتالدى.

– ويتكەنى، وندا انالاردىڭ شۋاقتى جان دۇنيەسى مەن كوڭىل ءيىرىمى، ىزگى ماحابباتى مەن نۇرلى شاپاعاتى جاتىر. قوعامداعى بارلىق ىزگىلىك پەن قۇت-بەرەكە انا جۇرەگىنەن باستاۋ الادى. انا – ءومىردىڭ جالعاسى، ونەگەلى تاربيەنىڭ باستاۋى. انا – قوعامنىڭ تىرەگى. انا – ۇلتتىڭ – ۇيىتقىسى، وتاننىڭ – كيەسى. ءبىزدىڭ حالىقتا ءبىر شاڭىراق اناسىز كوتەرىلمەي، ءبىر كەرەگە اناسىز كەرىلمەگەن. انا ارقاشاندا قولىنداعى سابيىمەن سۇلۋ، الدىنداعى بەسىگىمەن اسەم. تالابى تاۋداي الىپ تا، جاۋ جۇرەك باتىر دا، اقيىق اقىن دا، عۇلاما عالىم دا – اسىل انانىڭ پەرزەنتى. سىزدەردى وسىناۋ مەيىرىمى داريا، سۇلۋلىعى مول – 8 ناۋرىز حالىقارالىق ايەلدەر كۇنى مەرەكەسىمەن شىن جۇرەكتەن قۇتتىقتايمىن! قۇشاقتارىڭىز – گۇلگە، ومىرلەرىڭىز – نۇرعا بولەنسىن، – دەدى بەكبولات سەرىكبەك ۇلى.

ودان ءارى ول ءوز سوزىندە مىڭ عاسىرلىق تاريحىمىزدا وزدەرىنىڭ دانالىعىمەن، اقىلى مەن اجارىمەن، ىسكەرلىگىمەن جانە مەيىرىمدىلىگىمەن ەل شەجىرەسىنە اتتارى التىن ارىپتەرمەن جازىلعان التىن قۇرساقتى، اسقان اقىلدى انالارىمىز از بولماعانىن ايتىپ ءوتتى. «نازىكتىك پەن سۇلۋلىق، ەرلىك پەن قايسارلىق دەگەندە اتى اڭىزعا اينالعان ۇمايدان باستاپ، ەجەلگى تۇمار، كەيىنگى دومالاق انا، زەرىپ، قاراشاش، كەشەگى وتكەن ۇلاعاتتى ۇلپان، اباي اتامىزدىڭ اجەسى زەرە مەن اناسى ۇلجان، شوقاننىڭ اجەسى ايعانىم، ايتۋلى اقىن ۇلبيكە اپالارىمىز، دينا كۇيشى، كەشەگى ءاليا مەن مانشۇككە دەيىنگى ارۋلارىمىز ەلەستەيدى»، – دەي كەلە كيەلى اۋليەاتا جەرى دە قاشاندا ارداقتى قىزدارىمەن، اتاقتى ەڭبەك مايتالمانى اتانعان ايەل ازاماتشالارىن ماقتان تۇتقان حالقىمىزدىڭ كيەلى بويتۇمارى سياقتى، ادال ەڭبەگىمەن ەل قۇرمەتىنە بولەنگەن، كەۋدەسىنە التىننان جۇلدىز تاققان ارداقتى اپالارىمىز ەڭبەك ەرلەرى داريحا جانتوقوۆا، سىندىبالا وڭعارباەۆا، تامدىكۇل جامبىلوۆا، ەلەنا سۆينكوۆسكايا سياقتى ەڭبەك جۇلدىزدارى بولعانىن كوپشىلىك ەسىنە سالدى.
سونىمەن قاتار، بۇگىندە ەرەن ەڭبەكتىڭ ۇلگىسىن كورسەتىپ، التىننىڭ سىنىعىنداي ورتامىزدا جۇرگەن ەڭبەك ەرى ءمارزيا يبراگيموۆانىڭ، وق پەن وتتىڭ، ءولىم مەن ءومىردىڭ اراسىنان ەلىنە امان-ەسەن ورالعان، ۇلى جەڭىس كۇنىن جاقىنداتقان سوعىس ارداگەرلەرى الەكساندرا كيچيگينا، زويا مامەدوۆا، ۆوستريكوۆا زينايدا مەن جۋالىلىق اننا پوپوۆانىڭ ەسىمدەرىن ەرەكشە اتاپ ءوتتى. وعان قوسا كەشەگى مەملەكەتتىك باسقارۋ جۇيەسىندە ۇزاق جىلدار تابىستى ەڭبەك ەتكەن، وبلىستىڭ دامۋىنا زور ۇلەس قوسقان ليديا احمەتوۆا، ءنىلزيا راحىشەۆا، نادەجدا ۆرۋبلەۆسكايا، انتونينا چيسلوۆا، كۇلاش ابدىكەشوۆا، كۇلاش نازاربەكوۆا، گۇلجامال نۋريليحينا، باتەس ەگەمبەرديەۆا، ساۋلە مۇساەۆا سىندى انالارىمىزدىڭ بۇگىندە ايماقتىڭ قوعامدىق-ساياسي ومىرىنەن تىس قالماي، جاس ۇرپاق تاربيەسىنە اتسالىسىپ كەلە جاتقانى ەرەكشە اتالدى. ب.ورىنبەكوۆ سونداي-اق، مادەنيەت، سپورت، كاسىپكەرلىك، قۇقىق قورعاۋ سىندى بىرقاتار سالالاردا تەر توگىپ، ەڭبەگى سىڭگەن نازىك جاندىلاردىڭ قۇرمەتكە يە ەكەنىنە توقتالدى.
مەرەكەلىك شارا ارمەن قاراي جامبىلدىق ونەرپازداردىڭ كونتسەرتتىك باعدارلاماسىمەن جالعاسىن تاپتى. شارانىڭ سازدى-مۋزىكالىق ءبولىمى الەكساندر زاتسەپيننىڭ اسەل ۋاشەۆانىڭ ورىنداۋىنداعى «كوكتەم ءۆالسى» انىمەن اشىلدى. ال بۇدان كەيىن ساحنا تورىنە كوتەرىلگەن عاني ماتەباەۆ ء(انشى)، ازيز كۋشاكوۆ (رويال)، الىبەك امان (ۇرمەلى گارمون)، راحات ساپاراليەۆا (قۇم سۋرەتشىسى) دا يگور نيكولاەۆتىڭ «تام نەت مەنيا» ءانىن بىرلەسىپ ورىنداپ، كەرەمەت كومپوزيتسيا شىعارا ءبىلدى. باسقا دا ونەر يەلەرى ۇسىنعان ءان مەن بي كوپشىلىكتىڭ كوڭىلىنەن شىقتى. سونداي-اق، بۇل كەشتە ەلىمىزگە بەلگىلى ەسترادا جۇلدىزى ۇلىقپان جولداسوۆ پەن «داۋىس.kz» توبى بىرنەشە اندەرىن تارتۋ ەتتى. انالار قۇرمەتىنە قويىلعان كونتسەرتتىك شارا مادينا ساعىمبەكوۆانىڭ ورىنداۋىنداعى ءۇمىت بيتەنوۆانىڭ سوزىنە جازىلعان «گۇل سىيلاشى ماعان» انىمەن اياقتالدى. ءان بارىسىندا ەرلەر قاۋىمى الدىڭعى قاتاردا وتىرعان قۇرمەتتى قوناقتارعا گۇل شوقتارىن سىيلادى.

جاسۇلان سەيىلحانوۆ،
«اق جول».