لەسبەك تۇرسىنبەك ۇلى سايلاۋبەك

لەسبەك تۇرسىنبەك ۇلى سايلاۋبەك

15بەۋ، بەيوپا دۇنيە-اي! قالامداس ارىپتەسىمىزدىڭ بەيمەزگىل دۇنيەدەن وزۋى بارلىعىمىزدىڭ دا قابىرعامىزدى قايىستىرىپ كەتتى. وسىلاي بولادى، كۇنى كەشە عانا ورتامىزدا جارقىلداپ جۇرگەن ارىپتەسىمىزدەن قاپيادا ايىرىلىپ قالامىز دەپ كىم ويلاپتى؟! «دۇنيە-جالعان» دەگەن وسى ەكەن-اۋ…
لەسبەك تۇرسىنبەك ۇلى سايلاۋبەك 1961 جىلدىڭ 20 قاراشاسىندا جامبىل قالاسىندا ومىرگە كەلدى. بوزبالا جاس العاشقى ەڭبەك جولىن وبلىستىق «ەڭبەك تۋى» (قازىرگى «اق جول») گازەتىندە 1979 جىلى بەت جاساۋشى بولىپ باستاعان ەدى. ودان كەيىنگى بار عۇمىرى ءباسپاسوز سالاسىمەن بايلانىستى بولدى. قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن سىرتتاي وقىپ ءبىتىردى. 1990 جىلى «ەڭبەك تۋى» گازەتىنە ءتىلشى بولىپ قابىلداندى. 1993-2002 جىلدار ارالىعىندا العاشىندا قازاق راديوسىنىڭ جامبىل وبلىسى بويىنشا مەنشىكتى ءتىلشىسى، كەيىننەن جامبىل راديوسىنىڭ ءتىلشىسى قىزمەتتەرىن اتقاردى.
ودان كەيىنگى جىلدارى ءوزىنىڭ تۇساۋىن كەسكەن، وبلىس ءباسپاسوزىنىڭ قارا شاڭىراعى «اق جول» گازەتىندە ۇزاق جىل ەڭبەك ەتتى. قالامى قارىمدى جۋرناليست بولىپ تانىلدى. اسىرەسە، ەكولوگيا تاقىرىبىنا تەرەڭ بويلاپ قالام تارتتى. ول ەڭبەگى ەلەنىپ، جۋرناليستيكا سالاسىنداعى بايقاۋلاردىڭ جۇلدەگەرى اتاندى. قالامداس ارىپتەسىمىز تانىمال بالالار اقىنى دا ەدى. ءوزىنىڭ رۋحاني ۇستازى، بەلگىلى بالالار اقىنى اسقارجان سارسەكوۆتىڭ اماناتىنا ادالدىق تانىتىپ، جەرگىلىكتى باسپالاردان جارىق كورگەن «بۇزىقتىڭ ءبىر اپتاسى»، «ءتىل تابىسۋ»، «پەيىل» اتتى كىتاپتارى جاس وقىرماندار تاراپىنان لايىقتى باعاسىن الدى. لەسبەكتىڭ سوزىنە جازىلعان امان مالدىباەۆتىڭ «جالىن كەشكەن» ءانى قازاق ەستراداسى جۇلدىزدارىنىڭ ورىنداۋىندا كەڭىنەن تانىمال بولدى.
ل. سايلاۋبەكوۆ ومىردەن وتكەنگە دەيىن اقپارات ءبولىمىنىڭ مەڭگەرۋشىسى قىزمەتىن اتقاردى. ول ءبولىمنىڭ جۇمىسىن بۇقارامەن، وقىرماندارمەن بايلانىستىرىپ وتىردى. قايتا تۇلەگەن «اق جولعا» بەلسەنە اتسالىسىپ، «وقىرمان وتاۋى»، «شوكەڭنىڭ شوشالاسىن» دايىنداپ، گازەت وقىرماندارىنىڭ زور ىقىلاسىنا بولەندى. سونىڭ ءبىر ايعاعى بىلتىرعى جىلدىڭ قورىتىندىسىندا وبلىستىڭ الەۋمەتتىك-ەكونوميكالىق ءومىرىن جاريالاۋ بويىنشا بۇقارالىق اقپارات قۇرالدارى اراسىندا وتكىزىلگەن كونكۋرستىڭ «ۇزدىك پۋبليتسيستيكالىق ماتەريال» اتالىمى بويىنشا ەكىنشى دارەجەلى ديپلومىن يەلەندى. ارىپتەسىمىزدىڭ قۋانىشىنا ءبارىمىز ورتاقتاسىپ ەدىك. لەسبەكتىڭ ءالى دە جازارى، وقىرمانعا بەرەرى كوپ ەدى. ناعىز شىعارماشىلىق شابىتى تولىسقان شاعىندا ەدى. امال نەشىك، جازمىشتىڭ ءىسى وسىلاي بولدى.
ايتىپ كەلمەيتىن اجال اناسىن، جان جارى اسەمگۇلدى، ۇل-قىزدارىن اڭىراتىپ، قايعىعا كومىپ كەتتى. اۋىر قايعىعا گازەت ۇجىمى دا ورتاق­تاسىپ، وتباسىنا، تۋعان-تۋىستارىنا كوڭىل ايتادى. باقۇل بول، ارىپتەس!
لەسبەك تۇرسىنبەك ۇلىنىڭ جارقىن بەينەسى ۇجىم قىزمەت­كەرلەرى مەن ونى بىلەتىندەردىڭ جادىندا اركەز ساقتالا بەرمەك.

«اق جول» گازەتىنىڭ ۇجىمى.

One comment

  1. دوسجان بالابەك ۇلى

    قالامىندا ومىرگە دەگەن ءادىل قوزعالىستىڭ ءىزى بايقالاتىن، سوزىندە قالجىڭمەن بىرگە ايتىلاتىن مىسقىلى باسىم، ءبىز سەكىلدى جاس بۋىن تولقىنعا قامقورلىعى مەن ادامگەرشىلىگى مول ابزال اعا ەدى. «وبلىستىق گازەتتىڭ رەداكتسياسى»،- دەپ شالعاي وڭىردەن حات-حابار اكەلىپ، شيمايلاعان دۇنيەمىزدى ەڭ الدىمەن وسى اعامىزعا ءبىر كورسەتىپ الاتىنبىز. ءجون سىلتەيتىن، باعىت كورسەتەتىن، باعدار بەرەتىن جاقسى جان ەدى. الماتىدان الىڭعى جىلى اۋىلعا بەتبۇرعاندا اعامىزعا جولىعىپ، جاڭالىقتارىمىزبەن ءبولىسىپ، ەركىن اڭگىمە دە قوزعاعان ەدىك. «مەنىڭ ءىنىم-عوي»،-دەپ ماقتاپ، ماداقتاپ، ارقامنان قاعىپ، مەنى تالپىندىرىپ، اعالىق اقىلىن ايتىپ، ءوزىنىڭ جاڭادان شىققان ولەڭ كىتابىن تارتۋ ەتىپ ەدى.مۇقاباسىنىڭ ءوزى اقىن اعامىزدىڭ شىن پەيىلىن كورسەتىپ تۇرعانداي ەدى. اق كوگەرشىن، مۇزبالاق تاۋ، ءبارى اق. اق نيەتتىڭ بەلگىسىندەي. كوك اسپان اشىق كۇننىڭ بەلگىسى. جارقىراعان كۇن نۇرى، اعالىق شۋاعىن شاشىپ تۇرعانداي ەدى. ءوز قولىمەن، قولتاڭباسىمەن جازىپ بەرگەن ەدى. ءومىر جالعان، قامشىنىڭ سابىنداي عانا… بۇل تىركەس بۇگىن تاعى دا، امالسىز، ەرىكسىز ايتىلىپ وتىر. جامبىل وبلىستىق «اق جول» گازەتىندە وبلىس جۋرناليستيكاسىنا ەلەۋلى ۇلەس قوسقان، قايسار قالامگەر، ادىلەتتىكتى سۇيەتىن ار-نامىسشىل اقىن اعا، جاتقان جەرىڭ جايلى، توپىرعىڭ تورقا بولسىن! دوسجان بالابەك ۇلى، قازۇۋ-دىڭ 4 كۋرس ستۋدەنتى، «جاس قازاق» ۇلتتىق اپتالىعىنىڭ ارناۋلى ءتىلشىسى. الماتى قالاسىنان

Leave a Reply

Your email address will not be published. Required fields are marked *

*

موجنو يسپولزوۆات سلەدۋيۋششيە HTML-تەگي ي اتريبۋتى: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>