گۋزاليا قارسىلاستان قايمىقپايتىن قىز

وبلىس اكىمى كارىم كوكىرەكباەۆ ازيادا چەمپيونى
گۋزاليا گافۋروۆا باستاعان جۇلدەگەر سپورتشىلاردى قابىلدادى

وڭتۇستىك كورەيانىڭ ينچحون قالاسىندا وتكەن ازيا ويىندارىندا جامبىلدىق سپورتشىلار اۋىز تولتىرىپ ايتارلىقتاي ناتيجەگە قول جەتكىزدى. بايراقتى باسەكەنىڭ سوڭعى كۇندەرىندە قورجىنعا التىن مەدال سالعان كاراتەشى گۋزاليا گافۋروۆا مەن ءجۇز مەترلىك تورتتىك ەستافەتادا كۇمىس جۇلدە يەلەنگەن سۆەتلانا يۆانچۋكوۆانى تارازدىقتار الدىمەن تەمىر جول بەكەتىندە ۇلكەن قوشەمەتپەن كۇتىپ الدى. ينچحوندا ەلىمىزبەن قوسا ءوڭىر اتىن اسپانداتقان سپورتشىلارىمىزدى وبلىس اكىمى دە قابىلدادى.
ءبىر رەكورد، ەكى تاريحي وقيعانى جامبىلدىقتار جاسادى

جالپى ازيا ويىندارىنا ەلىمىزدەن 420 سپورتشى اتتانسا، ونىڭ جيىرما ءبىرى ءبىزدىڭ وڭىردەن ەكەن. سول جيىرما ءبىر سپورتشىنىڭ ون سەگىزى جۇلدەمەن ورالدى. ارينە، ەلدوس سمەتوۆ، گۋزاليا گافۋروۆا، سۆەتلانا يۆانچۋكوۆا، ليناريا مينگازوۆا، كوماندالىق سىندا كۇمىس العان ازيز قالقامان ۇلى سەكىلدى قاھارماندارىمىزدان بولەك، سۋ دوبىنان قولا جۇلدە ەنشىلەگەن، ۇلتتىق قۇرامانىڭ نەگىزىن قۇراعان «ايشا ءبيبى» ۆوتەرپولو كومانداسىنىڭ وكىلدەرى دە وسى ساناتقا كىرەدى.
ازيادا قاھارماندارىن قابىلداعان وبلىس اكىمى كارىم كوكىرەكباەۆ: «بايراقتى باسەكەگە ەلىمىزدەن اتتانعان ءتورت جۇزدەن استام سپورتشىنىڭ قاتارىندا ءبىزدىڭ جيىرما ءبىر جەرلەسىمىز بولدى. جەكەلەگەن سىندا وزدەرىن كورسەتە بىلگەن التى سپورتشىمىزدان بولەك، تولىققاندى قولا جۇلدەنى يەلەنگەن سۋ دوبىنان قىزدار قۇراماسى دا بار. وسىدان ءبىراز بۇرىن «ايشا ءبيبى» سۋ دوبى قۇراماسىمەن جۇزدەسكەنىمدە بىزگە بەسىنشى، التىنشى ورىندار قاجەت ەمەس. نە جەڭىسكە جەتۋ كەرەك، نە ۇشتىككە ەنۋ قاجەت دەگەن تاپسىرما قويعان بولاتىنمىن. بۇگىن سول سەنىمنەن شىققاندارى ءۇشىن قۋانىشتىمىن. بۇل جەتىستىكتەر بىزدە سپورتتىڭ ءار باعىتتا دامىپ جاتقانىنىڭ ايعاعى. بارلىق جۇلدەگە قول جەتكىزگەن سپورتشىلاردى قۇتتىقتايمىن. وسى بەتتەن تايماۋىمىز كەرەك» دەدى ءوز سوزىندە. سونىمەن قاتار وبلىس باسشىسى ازيا ويىندارىندا التىنمەن اپتالعان گۋزاليا گافۋروۆاعا ميلليون تەڭگەنىڭ سەرتيفيكاتىن تابىستاسا، جەڭىل اتلەتيكادان كۇمىس مەدالدى قورجىنعا سالعان سۆەتلانا يۆانچۋكوۆاعا 500 مىڭ تەڭگەنىڭ سەرتيفيكاتىن تاپسىردى. بۇعان قوسا ءوزى ۋادە ەتكەن اۆتوبۋستىڭ كىلتىن «ايشا ءبيبى» كومانداسىنا تارتۋ ەتتى. ازيادادا ۇلتتىق قۇرامانىڭ نەگىزىن قۇراعان ءبىزدىڭ ارۋلاردىڭ توقسان پايىزى جەرگىلىكتى ەكەن. ولاردىڭ ىشىنەن ايجان اقىلباەۆا وبلىس اكىمىنە العىسىن ايتتى. ينچحوندا الدىمەن يراندىق پەگاح زانگەنەحكارۋتيدى 5:2، مالايزيالىق شري ءشارمينيدى 2:0، ال فينالدا باستى قارسىلاسى قىتايلىق لينگلينگ تانگتى 4:3 ەسەپتەرىمەن جەڭگەن گۋزاليا التىن جۇلدە يەگەرى اتاندى.
ءيا، ازيادادا قازاق سپورتشىلارى ءۇش مارتە تاريح پاراقتارىن جاڭالاعان بولسا، سونىڭ بارلىعى دا جامبىلدىق سپورتشىلارعا تيەسىلى. الدىمەن ەلدوس سمەتوۆ دزيۋدودان تۇڭعىش ازيادا چەمپيونى اتانسا، كاراتەشى گۋزاليا گافۋروۆا دا سول تۇڭعىشتاردىڭ قاتارىن تولىقتىردى. ءۇشىنشى ەرەكشەلىك سول، بۇعان دەيىن 1994 جىلى حيروسيمادا وتكەن ازيادادا ەلىمىز جيىرما جەتى التىن السا، بيىل سول رەكوردتىڭ مۇرتى بۇزىلدى. جانە سول رەكوردتىڭ بۇزىلۋىنا گۋزاليا گافۋروۆا سەبەپكەر بولدى. ويتكەنى، گۋزاليا ەلىمىز ءۇشىن ەڭ سوڭعى، ياعني، جيىرما سەگىزىنشى التىن مەدالدى الىپ بەردى! مىنە، ءبىزدىڭ قىز-جىگىتتەر وسىلاي ەرلىك جاسادى.
دۋلاتبەك قۇسبەكوۆ، گۋزاليا گافۋروۆانىڭ جاتتىقتىرۋشىسى:
– دۋلاتبەك، گۋزاليانىڭ ازيادادا توپ جارعانىن كوز كوردى. الەمدىك رەيتينگتە ءبىزدىڭ ارۋ قانشاسىنشى ورىندا؟ جالپى، قىتايلىق تانگتەن وزگە قارىمدى قارسىلاستارى بار ما؟
– گۋزاليانىڭ بۇل جەڭىسى ونىڭ ون جىلعى ەڭبەگىنىڭ جەمىسى. ون ەكى جاسىندا جاتتىعۋ زالىنا كەلگەن گافۋروۆا مەنىڭ شاكىرتتەرىمنىڭ العاشقىسى. ەڭ ءبىرىنشى بولىپ جاتتىعۋ زالىنىڭ ەسىگىن قاققان دا وسى قىز. ازياداعا دەيىنگى رەيتينگتە گۋزاليا الەمدە ونىنشى ساتىدا بولاتىن. نەگىزگى قارسىلاستارى وسى تانگ جانە جاپون ارۋى. بۇلار سارى قۇرلىقتا دا،  الەمدىك دودادا دا ءبىزدىڭ باستى قارسىلاستار سانالادى. رەيتينگتىڭ ءوزى ءار قيلى جارىستارعا وراي تۇزىلەدى. كەيبىر سپورتشىلار بارلىق دوداعا قاتىسىپ، ناتيجەسىندە جوعارى بولىپ شىعادى. ەندى ازيا ويىندارىنان كەيىنگى رەيتينگتە گۋزاليانىڭ كورسەتكىشى جوعارىلايتىنى داۋسىز.
– ون جىل ىشىندە گۋزاليا تالاي جاراقات العان بولار. 68 كەلىدە ەلىمىزدىڭ ءنومىرى ءبىرىنشى سپورتشىسى اتانعان شاكىرتىڭىز توزىمدىلىكتىڭ ارقاسىندا جەڭىسكە جەتكەن شىعار…
– ءيا، گۋزاليا جاراقات اتاۋلىعا وتە ءتوزىمدى قىز. سوسىن وتە ەڭبەكقور. ىشكى دۇنيەسى، پسيحولوگياسى وتە مىقتى. العان جاراقاتتارىنا قاراماستان ءىرى ناتيجەلەر كورسەتە ءبىلدى. شاكىرتىمنىڭ ءالى تالاي دودالاردا ەل نامىسىن ابىرويمەن قورعايتىنىنا سەنىمدىمىن. گۋزاليادان بولەك  84 كەلىدە الەم چەمپيوناتىنا قاتىساتىن يگور شەحنورەۆ، سونىمەن قاتار اقەركە سۇرانشىقىزىنان دا ۇلكەن ءۇمىت كۇتەمىن. اقەركە مالايزيادا وتكەن جاستار اراسىنداعى ازيا بىرىنشىلىگىندە قولا جۇلدە يەلەندى. ءبىرىنشى كەزەكتە ازيادادا توپ جارعان گۋزاليامەن ماقتانامىن. ول كىشكەناي عانا قىزىل جۇلدىز اۋىلىنىڭ ەمەس، ەلىمىزدىڭ ماقتانىشىنا اينالدى.
گۋزاليانىڭ ءوزى قىتايلىق تانگتەن قارىمتا قايتارعانىنا ءدان ريزا. «بۇعان دەيىنگى ەكى كەزدەسۋدە ءبىر رەت جەڭىپ، ءبىر رەت جەڭىلگەن بولاتىنمىن. وسى جولى تانگتەن ايلامدى اسىرىپ، جەڭىمپاز اتانعانىما قۋانىشتىمىن. الداعى ءىرى دودالاردا ەلىمىزدىڭ اتىن اسپانداتۋ باستى ماقساتىم. باپكەرىمە العىسىم شەكسىز. ون جىلدان بەرى مەنى ءوز باۋىرىنداي باپتادى» دەيدى چەمپيوننىڭ ءوزى. جەڭىل اتلەتيكادان ەستافەتالىق سىندا كۇمىس مەدال ەنشىلەگەن سۆەتلانا يۆانچۋكوۆا دا وليمپيادا جۇلدەسىن يەلەنسەم دەگەن الدىنا ماقسات قويىپ وتىر.

تابيعات ابايلداەۆ،
«اق جول».